Шынагъуэншагъэр къызэрагъэпэщ

Къэбэрдей-Балъкъэрым Транспортымрэ гъуэгу хозяйствэмкIэ и министерствэм и пресс-IуэхущIапIэм иджыблагъэ къызэритамкIэ, «ГъуэгуфI шынагъуэншэхэр» лъэпкъ пэхуэщIэм хыхьэу, дызэрыт илъэсым къриубыдэу сымаджэщхэм, поликлиникэхэм, нэгъуэщI медицинэ IуэхущIапIэхэм ухуэзышэ уэраму, автомобиль гъуэгуу 500-м щIигъу ди къэралым къыщагъэщIэрэщIэжынущ.

«Урысей Федерацэм и Президент Путин Владимир зэкъым зэрыжиIар, къэралым и цIыхухэм фIагъ лъагэ зиIэ медицинэ Iуэхутхьэбзэхэр и чэзум ягъуэтын зэрыхуейр, ахэр щыпсэу щIыпIэм емылъытауэ. Къуажэхэми къалэхэми я гъуэгухэр тэмэму щытын хуейщ икIи ди лъэныкъуэкIэ тхузэфIэкI къэдгъанэ хъунукъым, цIыхухэм я гъащIэм ехьэлIауэ шынагъуэ щымыIэу сымаджэщхэм псынщIэу ахэр нагъэсын папщIэ. Абы къыхэкIыуи, социальнэ мыхьэнэ зезыхьэ апхуэдэ лъагъуэхэр ди лэжьыгъэм щынэхъыщхьэу щытыщ.

Лъэпкъ пэхуэщIэм и фIыгъэкIэ щыIэ мардэм къидгъэтIэсэжащ сымаджэщхэм, поликлиникэхэм, амбулаторэхэм, ФАП-хэм ухуэзышэ гъуэгуу, уэраму мини 2,5-м щIигъу. Дызэрыт илъэсым апхуэдэ щIыпIэу 500 зыхуей хуэдгъэзэнущ, псори зэхэту километр мин 1,9-рэ я кIыхьэгъыу», - жиIащ иджыблагъэ УФ-м и Правительствэм и УнафэщIым и къуэдзэ Хуснуллин Марат.

Къэралым къыщаIэта Iуэхугъуэм хыхьэу «ГъуэгуфI шынагъуэншэхэр» лъэпкъ пэхуэщIэм ипкъ иткIэ, дызэрыт илъэсым Къэбэрдей-Балъкъэрым къыщызэрагъэпэщыжынущ республикэм и сымаджэщхэм, медицинэ IуэхущIапIэхэм ухуэзышэу щIыпIибл, псори зэхэту километр 35-рэ нэхъыбэ хъууэ. Абы хохьэ Къулъкъужын Ищхъэрэмрэ Ипщэмрэ, Шордакъ, Шэрэдж Ипщэм, Шэджэм ЕтIуанэм, Бабугент къуажэхэм я сымаджэщхэм ухуэзышэ автомобиль гъуэгухэр.

Лэжьыгъэхэм хыхьэу щIыпIэ псоми гъуэгущхьэфэхэр зэрахъуэкIынущ, лъэс лъагъуэхэр хашынущ, гъуэгу дэмыгъэхэр, къэухьхэр ягъэувынущ, зэхыхьэпIэ-зэхэкIыпIэхэр къыхагъэщхьэхукIынущ.

Псалъэм къыдэкIуэ, Къубэ-Тэбэ жылэмрэ Къулъкъужын Ипщэмрэ зэпызыщIэ, километр I8 зи кIыхьагъ автомобиль гъуэгум къыIутщ амбулаторэрэ участковэ сымаджэщрэ. Иджыпсту а щIыпIэм гъуэгущхьэр щытратхъунщIыкI, иужькIэ афальтрэ бетонрэ зэхэлъу тралъхьэжынущ, зыхуей-зыхуэфхэмкIэ къызэрагъпэщыжынущ.

Лъэпкъ пэхуэщIэм хыхьэу лэжьыгъэхэр шрагъэкIуэкI Шордакърэ Бабугентрэ я гъуэгухэми, цIыхухэр куэду щекIуалIэ амбулаторэхэм ухуашэ. ЩIыналъэ гъуэгу фондым къыхэкIыу Шэрэдж Ипщэм Лениным и цIэкIэ щыIэ уэрамыр къанэ щымыIэу зыхуей хуагъэзэнущ. Мыри къуажэ амбулаторэм йокIуалIэ.

Шэджэм ЕтIуанэмрэ Псыгуэнсумрэ я гъуэгухэри медицинэ IуэхущIапIэхэм, нэгъуэщI социальнэ мыхьэнэ зиIэ ухуэныгъэу жылэм дэтхэм ухуашэ – школхэм, сабий садхэм, ЩэнхабзэмкIэ унэхэм, спорт ухуэныгъэхэм, нэгъуэщIхэми. Мыхэри, цIыхухэм я шынагъуэншагъэр къызэрагъэпэщу, иджырей мардэм кърагъэтIэсэнущ.

Лэжьыгъэхэр щIыпIэ псоми иджыпсту щокIуэкI.