ЩIалэгъуалэр япэ итщ

КъэкIуэнур зейр щIалэгъуалэращ жаIэ. Ар къагурыIуэрэ жэуаплыныгъэ ин яхэлъу президент хэхыныгъэхэм хэтащ республикэм ис щIалэгъуалэр. Псом хуэмыдэу мыхьэнэшхуэ зиIэ мы Iуэхум гупсэхуу бгъэдыхьащ Аруан куейм ис щIалэхэмрэ пщащэхэмрэ. Езыхэм я ныбжь итхэм щапхъэ яхуэхъумэ нэхъ къащтэу, иджыпсту ди къэралыр зыхуэныкъуэ хэкупсагъэр ягъэлъагъуэу, жьыуэ къыдэкIащ хэхыныгъэхэм я Iыхьэ мащIэр халъхьэну.

Нарткъалэ щыIэ 297-нэ хэхыпIэм щызэхуэсат волонтерхэр, щIалэгъуалэ зэгухьэныгъэхэмрэ зэщIэхъееныгъэхэмрэ хэтхэр, центрхэм я унафэщIхэр, спортсменхэр, IэщIагъэ зэмылIэужьыгъуэхэм ирилажьэ щIалэхэмрэ пщащэхэмрэ.

Абыхэм яхэтт зи паспортыр зратыжагъащIэ ныбжьыщIэхэр, балигъыпIэ иувауэ иджы япэу президент хэхыныгъэхэм ирихьэлIэхэр. КъэкIуэну илъэсихым ди къэралыр зи унафэ щIэтыну къулыкъущIэр езыхэм къыхахыным псом нэхърэ нэхъыбэу зи нэр къыхуикIыр ахэрат. А цIыхум гугъапIэфIхэр езыпх, куэдкIэ щыгугъ щIалэгъуалэр я гупсысэхэмкIэ дэгуэшащ Урысейм и «Мир 24» телеканалым.

Си ныбжьыр илъэс18 ирикъуати, сыгушхуэу сыкъыдэкIащ ди къэралым и тхыдэм сэри зы мащIэ хэслъхьэн мурад сиIэу. Мыхьэнэшхуэ зиIэ мыпхуэдэ Iуэху екIуэкIыу щIалэгъуалэр лъэныкъуэкIэ къыщыт хъунукъым, сэ сызэреплъымкIэ. Сыт щхьэкIэ жыпIэмэ, дэ нобэ къыхэтхым елъытащ дяпэкIэ къытпэщылъ гъащIэр зыхуэдэнур. Ар фIыуэ къызыгурыIуэхэрщ нобэ къызэхуэсар, – жеIэ пщащэм.

Дэ долъагъу икIи зыхыдощIэ зэманым къыздихь зэхъуэкIыныгъэхэр, къытхукъуэкI Iэмалхэр. Абы дытрегъэгушхуэ ди зэфIэкIхэр къыщызэкъуэтхыфын гъащIэ тхуэзыухуэнухэр къыхэтхын зэрыхуейм. Абы къищынэмыщIауэ, дыхуейщ ди къэралым и зыужьыныгъэм ди къару гуэр хэтлъхьэну, ипэкIэ кIуэтэн папщIэ нэхъыжьхэм защIэдгъэкъуэну. Абы и лъэныкъуэкIэ нобэ тчы лъэбакъуэм уасэшхуэ иIэу къытщохъу, икIи хуэфащэ пщIэ хуэтщIу ди пщэрылъыр дгъэзэщIэну дыхьэзырщ, – къыпещэ щIалэщIэм.

Мы хэхыныгъэ махуэхэр махуэшхуэ пэлъытэу щаIэт Нарткъали, абы къедза жылэхэми. А псори екIу зыщIыр цIыхухэм я гукъыдэжырщ, къэкIуэнум ирапх гугъапIэфIхэрщ, ар езыхэм я щхьэкIэ, я IэкIэ къызэрыхахыжырщ.