«Мансур» мэжджытым и Iимам, ислъам щIэныгъэхэмкIэ кандидат Щхьэныкъуэ Анзор Рэмэдан мазэм хиубыда и хъутIбэхэм я зым щытепсэлъыхьащ мэжджытым машинэкIэ екIуалIэхэм яхэлъыпхъэ Iэдэбым.
Хэти зэрищIэщи, мэжджытым псори лъэсу екIуалIэркъым. Лэжьыгъэм къыпэрыкIауэ, хамэ къуажэм къикIауэ, дакъикъэ бжыгъэ фIэкIа имыIэу, итIани, мэрем нэмэзым зыхимыгъэнын щхьэкIэ, гугъу зезыгъэхь куэд щыIэщ. Ауэ Алыхьталэм укъыщилъагъур мэжджыт кIуэцIым и закъуэкъым, атIэ абы узэрыкIуэ щIэкIэри и нэIэ щIэтщ.
«Зэгуэр ди Бегъымбар лъапIэу щэлатымрэ сэламымрэ зэхар щэхьабэ махуэхэр и гъусэу Мадинэ къалэм щыдыхьэжым, мыпхуэдэу яжриIауэ щытащ: «Иджыпсту фи къуэшхэм фахыхьэжынущи, фи щыгъынхэм тIэкIу факIэлъыплъыж, фи уанэхэр зэвгъэзахуэ, цIыхухэм фащыхэтым деж, анэл дахэм хуэдэу факъыхэщын щхьэкIэ», - псоми ягу къигъэкIыжащ Щхьэныкъуэ Анзор муслъымэным и цIыху хэтыкIэм тегъэщIапIэ хуэхъу хьэдисхэм я зыр.
Мэжджытым къекIуалIэхэми, нэмэз зыщIхэми я бжыгъэр Алыхьым и фIыщIэкIэ нэхъыбэ мэхъу, ауэ фIагъ и лъэныкъуэкIэ зэдгъэзэхуэн хуейхэр иджыри ди куэдщ, Iимамым зэрыжиIэмкIэ: «Бжыгъэ куэдыр фIыгъуэшхуэщ, ауэ абы хуэфэщэж хьэл-щэнрэ зэхэтыкIэ дахэрэ къыддалъагъун хуейщ цIыхухэм. Куэд къытхэтщ я машинэ гъэувыпIэм теухуауэ зыри зэзымыгъэзахуэ. КъащыпэщIэхуэм деж хыфIадзэрэ, зыгуэрым зэран хуэхъуну пIэрэ, жимыIэххэу. Зыгуэрым и гыбзэм е и шхыдэм ухиубыдэныр Iуэху цIыкIукъым. Гъуэгум телъыр тезыхым псапэ зэриIэм хуэдэ дыдэу, зэхэзекIуапIэр гугъу зыщIым гуэныхь къехь. Мэжджыт щIыбым хьэл Iей къыщыбгъэлъагъуэрэ, мэжджыт кIуэцIым Iэдэбу ущIэувэжмэ, псори къыпхуэгъуну уимыгугъэ.
Лъэсу узекIуэныр узыншагъэм дежкIи псапэщ. Iэмал имыIэу щыткъым щIыхьэпIэм нэс уи машинэр иумыхулIэнкIэ. Уеблэмэ цIыху къэс машинэ зырыз имысынри Iэмалыншэкъым. Зэгъунэгъухэм, зэIыхьлэгъухэм гъусэ зызэхуащIу, гъэувыпIэ къызыхуэлъыхъуапхъэ машинэхэр мэрем махуэм нэхъ мащIэ ящIмэ, хъарзынэщ», - чэнджэщ ярет Iимамым.
ЩIэныгъэлIыр тепсэлъыхьащ мэжджытым сабийхэр здэзышэхэр зыхуэсакъыпхъэхэми. Шэч хэлъкъым къыдэкIуэтей щIэблэр нэмэзми мэжджытми егъэсэн зэрыхуейм, ауэ ар апхуэдэ утыку щипшэнур уэ уакIэлъыплъыжыфынумэщ. Армыхъумэ, гупсэхупIэ къилъыхъуэу, и нэмэзыр зыхуей хуигъэзэным елIалIэу мэжджытым къэпIащIэ цIыхур сабий зэрыгъэкIий макъракъым къыщIэкIуэри, а Iуэхум утеплъэкъукI хъунукъым.
