Бзэгу лъабжьэм щIэлъхьэ

           ГъащIэм цIыхур зригъэувэ щытыкIэ гугъу къэс абы акъылыфIэу къикIа нэгъуэщI зыгуэрым и хъыбар уигу къигъэкIыжу апхуэдэщ. «Чэнджащэр щыуэркъым», - щIыжаIэри арагъэнщ. ФIым зыдезгъэкIунщ жызыIэми, сыт щыгъуи щапхъэрэ пщалъэрэ игъуэтынущ.

          Къуажэ гуэрым фадэм дихьэхауэ лIы гуэр дэст. Махуэ къэмынэу, ар чэфу унэм екIуэлIэжырт. ИщIэн щимыщIэжым, фызыр къуажэ Iимамым деж тхьэусыхакIуэ кIуащ. «Зэрефэр зыгуэру сигу тезгъэхуэнт, и Iэр къимыIэттэмэ», - жиIэрт цIыхубзым. «Сыт къыщIоуэр?» «Хэт лIыр ефауэ зигу техуэнур? «Уемыфэ!», - жызоIэ. «Уи Iуэху хэлъкъым!» - жи езыми, къызоуэ. Ар сабийхэм ялъагъу, цIыхухэм зэхах. Тхьэ, схуэмышэчыж!»

        Молэр дурэшым деж щыт телъхьэпIэм бгъэдыхьэщ, нэмэз щыгъэ хуэдиз хъуну мывэ цIыкIу гуэр къищтэри, цIыхубзым деж къигъэзэжащ. «Мы мывэм сытебжащ, - жиIащ абы. – Чэфу къыщыкIуэжкIэ, мыр уи бзэгу лъабжьэм щIэлъхьи, щIэгъэлъ. Сэбэп хъунущ».

       Зэманыр макIуэ. ЦIыхубзыр Iимамым деж къокIуэ, лIым ефэн щигъэтащ, езыри къыпхуэмыцIыхужыну нэхъ лъагъугъуафIэ хъуащ. Къеуауи къешхыдауи зэхригъэхыжыркъым.  Апхуэдэу мази, мазитIи кIуащ, цIыхубзым зыкъиужьыжащ, унагъуэри Iэуэлъауэншэ хъужащ.

          Махуэ гуэрым цIыхубзыр аргуэру къокIуэ, и лIыр къызэрытеIэбам и IэпапIэ телъу.

- Сыт къэхъуар?

- Къызэпта мывэ цIыкIур сфIэкIуэдащ!

            Сыт хуэдиз унагъуэ хъума хъунут, мы молэм и мывэ хъурейм хуэдэ яIамэ?! 

                                                                                              ЧЭРИМ Марианнэ.