Дэтхэнэми къыдгурыIуэу къыщIэкIынщ егъэджакIуэ IэщIагъэм и мыхьэнэр зэрыиныр. ЕгъэджакIуэм сабийм щIэныгъэ ирит къудейкъым, атIэ абы къалэнышхуэ и пщэрылъщ - ар щIэгъэкъуэн хуохъу щIэблэр балигъ гъащIэм хэшэным, цIыхубэ лъапIэныгъэхэр фIыуэ иригъэлъагъуным, хэкупсэу къэгъэхъуным. Аращ егъэджакIуэм и махуэр дуней псом щагъэлъапIэу щIыщытым и щхьэусыгъуэ нэхъыщхьэри.
УФ-м и Президентым и унафэкIэ, ди къэралым 2023 гъэр ЕгъэджакIуэмрэ унэтIакIуэмрэ я илъэсу ягъэуващ. Илъэсым и кIуэцIкIэ Iуэхугъуэ дахэ куэд ирагъэкIуэкIащ, егъэджакIуэхэм я зэфIэкIыр къыщапщытэжащ зэхьэзэхуэ зэмылIэужьыгъуэхэм. Мы илъэсым Iэмал диIащ цIыхум дежкIэ егъэджакIуэм и гуащIэм мыхьэнэуэ иIэр зыхэтщIэным.
ЕгъэджакIуэм и дунейпсо махуэм ирихьэлIэу, КъБР-м и Музыкэ театрым пшыхь ин щекIуэкIащ. Абы щагъэлъэпIащ республикэм и егъэджэныгъэ IэнатIэм зи гуащIэ хэзылъхьэхэр. Пшыхьыр къызэIуахащ Урысей Федерацэмрэ Къэбэрдей-Балъкъэрымрэ я къэрал гимнхэмкIэ.
ЗэIущIэм хэтащ КъБР-м и Парламентым и УнафэщI Егоровэ Татьянэ, республикэм и Iэтащхьэм и Администрацэм и УнафэщI Къуэдзокъуэ Мухьэмэд, КъБР-м и Правительствэм и УнафэщIым и япэ къуэдзэ Говоров Сергей, УФ-м и Федеральнэ Зэхуэсым и Къэрал Думэм и депутат Родинэ Викторие, КъБР-м егъэджэныгъэмрэ щIэныгъэмкIэ и министр Езауэ Анзор, республикэм и Парламентым и депутатхэр, Правительствэм щыщхэр, егъэджэныгъэ IэнатIэм и ветеранхэр. ЕгъэджакIуэм и дунейпсо махуэм щIыгъуу, хьэщIэхэр къызэхуэсахэм ехъуэхъуащ ГъэсакIуэм, курыт щIэныгъэ езытхэм я махуэшхуэхэмкIи.
- ЕгъэджакIуэм и махуэр зэрыдгъэлъапIэм мыхьэнэшхуэ иIэщ. АбыкIэ жытIэну дызыхуейр дэтхэнэ зыми фIыщIэ зэрыфхуэтщIырщ. Фи гуащIэр республикэм хуэщхьэпэ зэпытщи, ехъулIэныгъэфIхэр Тхьэм къыфхудигъакIуэ. Си фIэщ мэхъу фи зэфIэкIымрэ лэжьыгъэм гу къабзэкIэ фызэрыбгъэдыхьэмрэ лъагапIэфIхэм фызэрыхуашэнур, - жиIащ Къуэдзокъуэ Мухьэмэд.
Къуэдзокъуэм Iуэхугъуэ гуапэ и пщэрылът. Абы КъБР-м и Iэтащхьэм игъэува саугъэтымрэ (сом мини 100) дипломкIэ игъэпажащ «Урысейм илъэсым и егъэджакIуэ нэхъыфI щыхъуа», «Урысейм и гъэсакIуэ нэхъыфI», «Илъэсым и IэщIагъэлI нэхъыфI» урысейпсо зэхьэзэхуэхэм я щIыналъэ Iыхьэхэм щытекIуахэр.
- ЕгъэджакIуэм и махуэр гъэ къэс щыдгъэлъапIэкIэ, псалъэ нэхъ дахэхэр къыдолъыхъуэ, дынывэхъуэхъун папщIэ, - пищащ Егоровэ Татьянэ. - Абы и щхьэусыгъуэр зыщ: дэ къыдгуроIуэ фи IэщIагъэм мыхьэнэуэ иIэмрэ цIыхум зиужьын щхьэкIэ ар лъабжьэшхуэ зэрыхъумрэ. Си лэжьэгъухэ! ИкъукIэ срогушхуэ апхуэдэу зыфхуэзгъэзэну Iэмал сызэриIэм щхьэкIэ. Егъэджэныгъэм сэри си гъащIэм увыпIэ хэха щиIэщи, фIы дыдэу къызгуроIуэ школым ущылэжьэныр зищIысыр. IэщIагъэ гугъущ жыпIэныр мащIэщ - абы уи зэман тебгъэкIуадэ къудейкъым, ар зыщыбгъэпсэхуи, жэщи махуи зэпымыууэ узэгупсысщ. Утогузэвыхь уи еджакIуэм зыгуэр къемыхъулIэмэ. Апхуэдэ дыдэуи къару къигъэхъуапIэ мэхъуж уи гъэсэнхэм я ехъулIэныгъэхэр щыплъагъукIэ. ЕхъулIэныгъэ къэс и щIыбагъ къыдэтщ жей ямыIэу щыс егъэджакIуэхэм я гуащIэр. ЕгъэджакIуэм дежкIэ гупыкIыгъуейщ, я нэпси къемыкIуэн яхузэфIэкIыркъым я нэIэм щIэта сабийхэр школым щыщIагъэкIкIэ. НэгъуэщI зы гугъуагъи хэлъщ мы IэщIагъэм - ар егъэджакIуэм и лэжьыгъэм жэуаплыныгъэ зэрыпылъырщ. Дауэ хъуми, псом япэу ар еджакIуэм и гъуазэщи, щапхъэ хуэхъуфын хуейщ. Арауэ къызолъытэ егъэджакIуэ IэщIагъэм и мыхьэнэ нэхъыщхьэ дыдэр. Сабийм иригъэдж дерсым езым фIыуэ зэрыхищIыкIым къыдэкIуэу, нобэ егъэджакIуэр хуэIэрыхуэн хуейщ иджырей техникэ Iэмалхэми. Ди зэманым еджакIуэм щIэныгъэ зэретыпхъэм къыдэкIуэу, ар бгъэсэфын хуейщ езыр гупсысэу, и Iуэху еплъыкIэ къигъэлъагъуэу, жэуаплыныгъэ хэлъу. Абы къыхэкIыу ди къалэнхэм ящыщщ нобэрей щIэблэр хэкупсэу, тхыдэр ялъытэу, ди лъэпкъ щэнхабзэмрэ щIэинхэмрэ пщIэ хуащIу къэгъэхъуныр. ЗэрыфщIэщи, ар Iуэху цIыкIукъым икIи тыншу зэфIэкIыркъым. Абы махуэ къэмынэу уи гуащIи зэмани текIуэдэнущ. Ауэ си фIэщ мэхъу адэ-анэхэри къытщIыгъуу, а пщэрылъым дызэрыпэлъэщынур. Иджыпсту къэралми ди республикэми куэд щызэфIагъэкI егъэджакIуэм и мыхьэнэр къэIэтыным, ныбжьыщIэхэр тыншу, зыхуей хуэзауэ еджэным теухуауэ. Си гугъэмкIэ, егъэджакIуэр зэрагъэгушхуэ Iэмалхэр дяпэкIи нэхъыбэж хъууэ екIуэкIынущ.
Егоровэр ехъуэхъуащ егъэджэныгъэ IэнатIэм и ветеранхэми. Абы нэхъыжьхэм фIыщIэ яхуищIащ сабийхэм гуапэу, я лъагъуныгъэр зыхрагъащIэу, жэуаплыныгъэ яхэлъу зэрахэтам папщIэ.
КъБР-м и Парламентым и УнафэщIым пщэрылъ къызэрыщащIам тету, КъБР-м Егъэджэныгъэмрэ щIэныгъэмкIэ и министерствэм и щIыхь тхылъхэр яритыжащ «2023 гъэм Урысейм и егъэджакIуэ нэхъыфI» урысейпсо зэпеуэм и щIыналъэ Iыхьэм щытекIуахэм.
Говоров Сергей махуэшхуэр зыгъэлъапIэхэм щехъуэхъум жиIащ: «Ар егъэджакIуэщ!» къыпхужаIэным пщIэшхуэ пылъщ. Абы къыхэкIыу сынывохъуэхъу узыншагъэ быдэрэ ехъулIэныгъэ куэдрэ фиIэну».
- ЕгъэджакIуэ IэщIагъэр нэхъ дахэ дыдэхэм ящыщщ икIи абы упэлъэщын щхьэкIэ ар къыбдалъхун хуейуэ къызолъытэ, - жиIащ Езауэ Анзор. - ЕджакIуэхэр вгъасэ къудейуэ аракъым, атIэ къэралым и къэкIуэнур зэфIэзыгъэу-вэр фэращ. Фи Iуэху бгъэдыхьэкIэм елъытауэ щытынущ ди къэкIуэнур зыхуэдэ хъунур. Сэ зэпымыууэ си егъэджакIуэхэм фIыщIэ яхузощI, нобэ сызыхунэсар зи фIыгъэр ахэращи. Дэтхэнэми сынывохъуэхъу еджакIуэ Iущ цIыкIухэр фиIэу, адэ-анэхэр къыфхуэарэзыуэ илъэс куэдкIэ фылэжьэну.
ЕгъэджакIуэхэм ехъуэхъуащ Родинэ Викториерэ Егъэджэныгъэмрэ щIэныгъэмрэ я лэжьакIуэхэм я профсоюзым и Къэбэрдей-Балъкъэр республи-кэ комитетым и унафэщI Карныш Сергейрэ.
- ПщIэ зыхуэтщI ди егъэджакIуэхэ! Къэрал псор дропагэ фи зэфIэкIым. Урысейм и егъэджэныгъэ IэнатIэр нэхъыфI дыдэхэм зэращыщыр зи фIыгъэр фэращ. ФIыщIэ фхудощI ди сабийхэм щIэныгъэ зэрефтым папщIэ, - къыхигъэщащ Родинэ Викторие.
ЕгъэджакIуэхэм я пшыхьым зыкъыщагъэлъэгъуащ республикэм и артист, къэфакIуэ нэхъ пажэ дыдэхэм: «Кабардинка», «Балкария», «Тэрч къэзакъхэр», «Кавказ пшэплъхэр», «Арабеск» ансамблхэм хэтхэм, Кавказ Ищхъэрэм и республикитхум я цIыхубэ артист Нэхущ Чэрим, КъБР-м и цIыхубэ артист, КъШР-мрэ Ингуш Республикэмрэ щIыхь зиIэ я артист Текуев Амур, КъБР-мрэ АР-мрэ щIыхь зиIэ я артист Гуазэ Тимур, КъБР-м щIыхь зиIэ и артисткэ Къул Ланэ, ТхьэкIумащIэ Аслъэн, КъБР-м щэнхабзэмкIэ щIыхь зиIэ и лэжьакIуэ Дым Елдаррэ «Новые имена России» дунейпсо зэпеуэм и саугъэт нэхъыщхьэр къэзыхьа Къардэн Алимрэ, нэгъуэщIхэми.
Сурэтхэр Елъкъэн Артур трихащ.
