Зи гупсысэхэр нахуэ

Хьэжнэгъуей Залинэ Налшык къалэ администрацэм «Къалэм и зыужьыныгъэмкIэ, курортхэмрэ туризмэмкIэ» и департаментым и щIэныгъэ лэжьакIуэщ. КIуэкIуэ Валерэ и цIэр зезыхьэ Къэбэрдей-Балъкъэр мэкъумэш къэрал университетыр къиухащ. Ар хуеджащ «Къэрал муниципальнэ управленэ» жыхуиIэм. Къулыкъу щIэным хуэIэижьщ, и IэщIагъэр фIыуэ елъагъу, абы къыдэкIуэуи ар гъуазджэм дехьэх. Залинэ сурэтыщIщ. Абы хуемыджа пэтми, и IэдакъэщIэкIхэм уатхьэкъу. 

  И сабиигъуэ гукъэкIыжхэр хуабэщ. Ар жану, куэд фIэщIэщыгъуэу щытащ щыцIыкIуми. 

- Дунейр щхъуэкIэплъыкIэт сэркIэ – къэзжыхьырт, сыджэгурт, сыгушхуэрт. Иджырей смартфонхэмрэ гаджетхэмрэ ди сабиигъуэм зэрыхэмытам и фIыгъэкIэ, ди джэгукIэхэр дахэт, узыгъасэт. Си гум IэфI куэд илъщ а зэманым теухуауэ. Сыт сыщыцIыкIум сыдэзыхьэхыу щытар жыпIэмэ, IэпэкIэ зыгуэрхэр зэIущэным, дэным, нэхъ иужьыIуэкIи сурэт щIыным. Сурэт щIыныр си гъащIэм къыхэнэпащ, - жеIэ абы. 

БалигъыпIэ иува нэужьи пщащэр зыдихьэххэм нэхъри къахэхъуэрт. Дауэ зыхищIа балигъ зэрыхъуар, жыпIэми, и гупсысэр гъэщIэгъуэнщ. 

- БалигъыпIэ уиувэным и нэщэнэщ уи къэкIуэнум уегупсыс зэрыхъур. Уи хъуэпсапIэхэми таурыхъ хьэл яIэжкъым абы щыгъуэм, атIэ зэбгъэхъулIэфынщ узыщIэхъуэпсыр. ГъащIэр къызэрымыкIуэу гъэщIэгъуэну зэхэлъщ, абы и хабзэхэр нэсу къыбгурыIуэфынукъым илъэс пщыкIутхуми, илъэс блыщIрэ тхурэ ухъуа нэужьи. Абы къыхэкIыу, балигъыпIэ уиувэным сэ къызогъэкI укъэзыухъуреихь дунейм уэ езыри узэрыщыщым уегупсыс щыхъуар. 

Хьэжнэгъуейр зэрыцIыкIурэ дехьэх къэралыгъуэхэм я тхыдэхэм, дунейм и зыужьыкIэри фIэгъэщIэгъуэнщ. Пэжым тетын, хеймрэ мысэмрэ зэхигъэкIын фIэфIщ, захуагъэм и лъыхъуакIуэщ. Абы къыхэкIыуи IэщIагъэр къыщыхихынум куэдрэ гупсысакъым. Школми университетми фIы дыдэу щеджащ. ЗэрыжиIэмкIи, щIэныгъэ зэгъэгъуэтыныр гугъуехьу щыткъым абы и дежкIэ, атIэ удэзыхьэх – узыIэпызышэщ. Залинэ фIэфIщ ди республикэм папщIэ сэбэпынагъ илэжьыну. 

- Къэрал IэнатIэр уи IэщIагъэу, сурэт щIыныр уи дуней тетыкIэу жыпIэ хъуну? – деупщIат хъыджэбзым. 

- Пэж дыдэщ. Ауэ, гъуазджэм теухуауэ къыхэбгъэщам тIэкIу сыкъытеувыIэнут… Гъуазджэр – зы псалъэ закъуэ щхьэкIэ, мы дунейр къыбгурыIуэнымкIэ нэхъ Iэмал пэж дыдэу щыIэрщ. Мы псалъэм и купщIэр куущ къызэрымыкIуэу, сыту жыпIэмэ ар хэплъагъуэфынущ сытми. Сэ егъэлеяуэ сфIэфIщ абы сыхэтыну, сыщыщыну.

Нэхъыбэу ещI цIыху сурэтхэр, ауэ абы и закъуэкъым. ЛIэужьыгъуэ куэдым дехьэх, абыхэм я Iэмалхэм теухуауэ щIэщыгъуэу щыIэхэр зэрегъащIэ. Залинэ и IэдакъэщIэкIхэм уоплъри, ахэр езым есхьэлIэмэ, бзылъхугъэ хьэлу, и гум хъуэпсапIэхэр щыкуэду, абыи къыдэкIуэу, Iуэхугъуэ куэдым пэлъэщыфын лIыгъэ къылъыкъуэкIыфыну согупсыс. 

- Си хьэл-щэным къыхэзгъэщхьэхукIын хуейIамэ: си гум фIы илъщ, сыерыщщ, - жеIэ езым. 

 Залинэ щыцIыкIум зыхуэпабгъэу щытахэмрэ балигъ хъуа нэужь и гур жан зыщIхэмрэ зэтехуэу пIэрэ, жыпIэмэ, абы къелъытэ сабийр зыщIэхъуэпсхэр нэхъ гъэщIэрэщIауэ, егъэлеиныгъэхэр хэлъу. 

- ХъуэпсапIэр къэкIуэнум дызэрыщыгугъ фIыгъуэ гуэрщ. Дауи, сабий хъуэпсапIэхэр балигъым ейм ещхькъым, сабийм и гупсысэр къэмыхъуфын Iуэхугъуэ куэдым зэрыщыIэм къыхэкIыу. Балигъыр зыщIэхъуэпсхэм мурадкIэ уеджэ хъуну си гугъэщ – ахэр зэбгъэхъулIэ мэхъу. 

Къапщтэмэ, си хъуэпсапIэ нэхъыщхьэщ дунейр мамырыну! – жеIэ Залинэ.