Мамырыгъэ щыщыIэнур мурадхэр зэдгъэхъулIэмэщ

Къэралым ис цIыхухэр псом нэхъыбэу зытегузэвыхьыр Урысейм Украинэм щригъэкIуэкI дзэ Iуэху хэхарщ. Абы теухуауэ Путин Владимир упщIэ иратащ пэшым щIэсхэми, фронтым щыIэхэми, эфир занщIэм тхэхэми. «ИлъэситI блэкIар дауэ екIуэкIа?», «Иджыпсту щытыкIэр сыт хуэдэ?», «ЕхъулIэныгъэ щыIэ?», «Дзэ Iуэху хэхам нэхъапэм и къалэну щытамрэ иджыреймрэ зы?», «Дапщэщ мамырыгъэ щыщыIэнур?». УпщIэ куэдым я жэуапу Путиным нэхъыщхьэу жиIахэм ящыщщ ди къэралым зыхуигъэувыжа мурадхэр къехъулIэмэ, мамыргъэри тепщэ зэрыхъунур.
- Мурадхэм я гугъу пщIымэ, ар япэ махуэм щегъэжьауэ зыхуэдгъэувыжа къалэнхэр зэдгъэхъулIэнырщ – Украинэм щыщ националистхэмрэ фашистхэмрэ дгъэкIуэдынырщ, нейтральнэ статус иIэу псэуныр къызэгъэпэщынырщ.   Абы папщIэ псалъэкIэ къыдгурыIуэну хуеятэкъыми, нэгъуэщI Iэмал, зауэ Iэмал,  къэдгъэсэбэпын хуей хъуащ. Нобэ Украинэм зыри къыщыщIагъэкIыжкъым, зыри къыщалэжькъым, къыхуашиимкIэ псэууэ аращ, ар зэ мыхъуми зэ иухынущ. А къыхуашийхэмрэ къыхуагъакIуэхэмрэ дэ зэтыдокъутэ, кхъухьлъатэуи, танкыуи ямыIэжым и бжыгъэр куэдщ. Аращ демилитаризацэкIэ дызэджэр. Е псалъэкIэ дагурыIуэн, е къарукIэ дапэщIэувэн хуейуэ аращ, - жиIащ Президентым.
Мобилизацэ иджыри щыIэнрэ щымыIэнрэ цIыхухэр щыщIэупщIэм Путин Владимир къыхигъэщащ иджыпсту апхуэдэ дызэрыхуэмыныкъуэр. 
- Мы упщIэм куэд зэригъэпIейтейр къызгуроIуэ. ЦIыху мин 300 дзэ къулыкъум къыщедджам куэд жаIащ, ауэ ахэр нобэ я къалэн пэлъэщу зауэ губгъуэм итщ. ФIы дыдэу мэзауэ щIалэхэр. ЦIыху 14-м «Урысей Федерацэм и ЛIыхъужь» лъэ лъапIэр къалэжьащ, адрей медалрэ орденхэмрэ зыхуэдгъэфэщам я бжыгъэм и гугъу сщIыкъым. Иджыпсту Украинэм щекIуэкI дзэ Iуэху хэхам цIыху мин 244-рэ щыIэщ, техникэр зэрагъэпэщыжу щыIэ IэщIагъэлIхэр куэдщ. Я ныбжь зэрынэсам, е я узыншагъэр зэрымытэмэмым къыхэкIыу, цIыху мин 41-рэ къаутIыпщыжащ. Абы иужькIэ дзэ Iуэху хэхам кIуэну жэрдэм зиIэхэр зэхуашэсу щIадзащ. Мы илъэсым и кIэухым ирихьэлIэу езым я фIэфIыныгъэкIэ фронтым кIуам я бжыгъэр цIыху мин 400-м щIигъунущ. Зи Хэкур зыхъумэну жэрдэм зиIэхэр ди къэралым щыкуэдщ, махуэ къэс цIыху мин 1,5-м зрагъэтх.  Дэ ди дежкIэ ахэр псори зэхуэдэщ, псори зауэлIщ, лIыхъужьщ. Абы къыхэкIыу иджыри зэ мобилизацие щIэтщIын щытыкIэ дихуакъым, - жиIащ Путиным.