Дэ дыхьэзырщ псоми дагурыIуэну

Дуней псом щыщыIэ щытыкIэм, Урысей Федерацэм абы щиубыд увыпIэм, Евросоюзыр къызэрытхущытым Путин Владимир щытепсэлъыхьым къыхигъэщащ  зэхущытыкIэфIыр ди закъуэкIэ ухуа зэрымыхъунур, ар зэпызыудахэм ди къэралыр къуэгъэнапIэм къуагъэувэну иужь зэритыр.

«Украинэм худиIэ пыщIэныгъэр хэт къызэпызыудар? 2014 гъэм абы къыщыхъуа зэпэщIэувэныгъэращ псоми я щхьэусыгъуэр. Абы и пэкIэ, илъэсипщI бжыгъэкIэ, тэмэму дахущытыну иужь дитащ. АдэкIэ къэрал зэхъуэкIыныгъэхэр къэхъуащ. Фэ къызэрывгурыIуэщи, урысхэмрэ украинецхэмрэ зы лъэпкъщ, иджыпсту зэкъуэшитI зэзэуэж хуэдэщ, ар гуауэшхуэщ. Мыр тхыдэкIэ къапщтэмэ, Урысейм хыхьэ щIыгущ, ар псоми ящIэ. Ауэ Украинэм къыщыхъуа къэрал зэхъуэкIыныгъэхэм яужь зэхущытыкIэ тэмэм абы дэпIыгъыныр гугъу хъуащ. АбыкIэ дэIэпыкъуэгъу хъуащ ди «америкэ ныбжьэгъухэр». Абыхэм я телъхьэ хъуащ евпропей къэралхэр. А псор и щхьэусыгъуэу ди гъунапкъэхэм гъунэгъу зыкъыхуащIащ. Илъэсий хъуауэ Донбасс щеIуэкI лъыгъажэмрэ дызэрыхуа щытыкIэмрэ дыхуашащ нобэрей Iуэхугъуэхэм.

А щытыкIэ гугъур къэзыгъэхъея США-мрэ абы щыму кIэлъыплъ е къуэувэ Европэмрэ  дауэ фIыуэ уазэрыхущытынур? Иджыпсту сыт тлъагъур? Украинэм и щхьэхуитыныгъэр зэрыфIэкIуэдарщ. Сыт хуэдэ унафэ къищтэми, езым зэран зэрыхуэхъужырщ.

Дэ дыхьэзырщ нобэ США-м дыдэлэжьэну, ди зэхущытыкIэхэр едгъэфIакIуэжыну. ИкIи Америкэр дунейр зыхуэныкъуэ къэралу къыдолъытэ. Ауэ ирагъэкIуэкI политикэр езым зэран къахуохъуж. Езым я къэралым щекIуэкIыр зэрагъэзахуэмэ, нэгъуэщIхэм пщIэ хуащIу зрагъасэмэ, санкцэхэмрэ зауэ Iэмалхэмрэ мыхъуу, зэгурыIуэныгъэм хуэпабгъэмэ, дэ дыхьэзырщ зэхущытыкIэр едгъэфIэкIуэжыну. Ауэ зэкIэ апхуэдэ Iэмал щыIэкъым", - жиIащ Президентым.