НыбжьыщIэ пашэхэм яхуозэ

Илъэсыщlэр къихьэным и пэ къихуэу КъБР-м и lэтащхьэ Кlуэкlуэ Казбек яхуэзащ урысейпсо школ олимпиадэхэм, сабийхэм я зэчийр щагъэлъагъуэ зэпеуэхэм, спорт зэхьэзэхуэхэм щытекlуа ныбжьыщlэхэм. Зэlущlэм кърихьэлlащ КъБР-м и Парламентым и Унафэщl Егоровэ Татьянэ, КъБР-м и Правительствэм и Унафэщl Мусуков Алий, абы и къуэдзэ Хъубий Марат, министрхэр, жылагъуэ лэжьакlуэхэр. Илъэс къэс екlуэкl апхуэдэ зэlущlэм хэтащ волонтерхэр, юнармейцхэр, «Пэрытхэм я зэщlэхъееныгъэм» хэтхэр, еджакlуэ самоуправленэм и пашэхэр, лlыгъэрэ хахуагъэрэ къэзыгъэлъэгъуа сабийхэр. Зэхыхьэм кърагъэблэгъат Налшык къалэ дэт 2-нэ лицейм физикэмрэ астрономиемкlэ и егъэджакlуэ, «2022 гъэм Урысейм и егъэджакlуэ нэхъыфl» урысейпсо зэпеуэм лауреат щыхъуа, Урысей Федерацэм и егъэджакlуэ нэхъыфl 15-м яхэхуа, УФ-м Егъэджэныгъэмкlэ и министерствэм «Россия-1» телеканалым щригъэкlуэкlа «Классная тема» проектым щытекlуа Къэшэж Аслъэнрэ «Дыгъафlэ къалэ» сабий творчествэмкlэ республикэ академием физикэмкlэ и егъэджакlуэ, «2023 гъэм Урысейм и егъэджакlуэ нэхъыфl» урысейпсо зэпеуэм и щlыналъэ lыхьэм щытекlуа Суйдым Елдаррэ. Кlуэкlуэ Казбек ныбжьыщlэхэм защыхуигъазэм жиlащ: «Ныбжькlэ фызэрыщlалэм емылъытауэ, фэ къэвгъэлъэгъуэну фхузэфlэкlащ фи ныбжь итхэм фрапашэу, зыхуэвгъэувыжа мурадхэр зэвгъэхъулlэфу фызэрыщытыр. Абы щхьэкlэ пщlэ къыволэжь. Фэ фхуэдэхэм щхьэкlэщ, ди къуэшхэм ди Хэкур щlахъумэр. 2024 гъэм и мызакъуэу, фи гъащlэм и кlыхьагъкlэ ехъулlэныгъэхэр фиlэну, насыпыфlэу фыпсэуну сынывохъуэхъу. Ди Президент Путин Владимир фэ лъэ быдэкlэ гъащlэм фыхэувэн, насыпыфlэу фыпсэун папщlэ лъэкl къигъанэркъым. Икlи щlалэгъуалэ 1уэхухэр зыхуей хуэзэу зэтеубла хъунымкlэ Къэбэрдей-Балъкъэрыр сытым дежи ипэ итынущ». Ныбжьыщlэхэрlэтащхьэм хутепсэлъыхьащ я ехъулlэныгъэхэр къызыпэкlуа lуэхухэм, абыкlэ къадэlэпыкъуахэм, дяпэкlэ я мурадхэм. Зэlущlэр ягъэщlэрэщlащ «Арабеск», «Кавказым и пшэплъхэр» сабий къэфакlуэ гупхэм, урысейпсо, дунейпсо зэпеуэхэмрэ фестивалхэмрэ я лауреат Бэрэгъун Заур уэрэд жиlащ. Пшыхь гуапэм кърихьэлlа псоми саугъэткlэ яхуэупсащ КъБР-м и lэтащхьэр.