Полицэм и лэжьакIуэхэр ягъэгуфIэ

КъБР-м и lэтащхьэ Кlуэкlуэ Казбекрэ КъБР-м къэралкlуэцl lуэхухэмкlэ и министр Павлов Василийрэ полицэм и лэжьакlуэхэм фэтэр lункlыбзэхэр иратыжащ. Унэщlэм щlэтlысхьэжынухэм защыхуигъазэм lэтащхьэм фlыщlэ яхуищlащ Урысейм и Президент Путин Владимиррэ УФ-м и МВД и Унафэщl Колокольцев Владимиррэ, хабзэхъумэ lэнатlэм зиужьыным гулъытэ хэха зэрыхуащlым щхьэкlэ. - Дэ дырищыхьэтщ къэралкlуэцl lуэхухэмкlэ министерствэм и мылъку-техникэ лъабжьэм еужьэрэкlыу зэрызиужьым, автомашинэхэмрэ техникэхэмрэ щэ бжыгъэкlэ къызэращэхум. Ахэр псори и сэбэпщ мы lэнатlэм щылажьэхэм я къалэныр зыхуей хуэзэу зэфlагъэкlынымкlэ. Унафэщlхэм сащlыхуэарэзыр, lэнатlэм и лэжьакlуэхэр нэхъ зэщlэузэдауэ щытыху, ди республикэми ущыпсэуну нэхъ шынагъуэншэу зэрыщытынурщ. Офицерыр, сержантыр зыхуей хуэзэу узэдамэ, щыпсэун и1эмэ, и пщэрылъхэр нэхъыфlу игъэзэщlэнущ. Нобэ фызыщlэтlысхьэжыну унэхэм насып щlэзу фыщыпсэуну сынывохъуэхъу. Фи хэкум хуэвлэжьым щхьэкlэ фlыщlэ фхузощl, - жиlащ Кlуэкlуэ Казбек. «Дэркlэ нэхъыщхьэхэм ящыщщ ди лэжьакlуэхэр псэупlэкlэ зыхуей хуэгъэзэныр. Урысейм и МВД-м и пашэхэм фlыщlэ яхузощl, апхуэдэуи дахуэарэзыщ а псори къыддэзыlыгъ республикэ унафэщlхэми. Фэ фи дэlэпыкъуныгъэм къэралкlуэцl lуэхухэмкlэ къулыкъущlапlэхэм щылажьэ дэтхэнэ зыри нэхъри трегъэгушхуэ и гугъуехьхэри щегъэпсынщlэ», - къыхигъэщащ Павлов Василий. Абы зэрыжиlамкlэ, фэтэри 144-уэ зэхэт унэ зытетхэр федеральнэ инвестицэ программэм ипкъ иткlэ ящlащ. Иджыкlэ ятар къатибгъу хъу унитlщ. Ахэр сыт и лъэныкъуэкlи зыхуей хуэгъэзащ. Фэтэрхэм унагъуэ 27-рэ щlагъэтlысхьэжащ, фэтэр 17-р лэжьакlуэхэм пlалъэкlэ ейуэ щытынущ. Адрейхэр хьэзыр зэрыхъуу зи чэзум иратынущ. Лэжьакlуэ 46-м унэ къращэхун папщlэ мылъку иратынущ.