Мультфильмхэр

Мультфильмхэр занщIэу тыншу трахакъым, атIэ абы епха ехъулIэныгъэхэр хуэм-хуэмурэ зэтраублащ. Пэжщ, абы тхыдэ иIэщ. Мультфильм техыным къыгуэхыпIэ имыIэу епха анимацэ къыфIэщIыныгъэ жыхуэтIэр япэ дыдэу къигупсысащ Франджым щыщ Рогет Пауль. Ар къыщыхъуар 1828 гъэрщ. Абы папщIэ Рогет къигъэсэбэпащ зы лъэныкъуэмкIэ бзу сурэт, адреймкIэ бзу хъар къыщыгъэлъэгъуа диск. Дискыр ягъэкIэрахъуэрти, мультфильмым еплъхэм къыфIагъэщIырт бзур хъарым ису.

Мультфильмхэм нэхъри заужьауэ щытащ IэщIагъэлI Эдисон Томас проекторрэ сурэт зэрытрах камерэрэ къигупсыса нэужь. 1906 гъэм Стюарт трихащ таурыхъ кIэщI. Абы папщIэ Блэктон мелкIэ сурэт ищIурэ сурэт трихырт, сурэт триха нэужь тригъэкIыжырти, нэгъуэщI ищIырт. Апхуэдэурэ куэд ищIын хуей хъурт.

Анимацэм и Iуэхум хэлъхьэныгъэшхуэ хуищIащ Дисней Уолт. 1923 гъэм абы «Алисэ - мультипликацэхэм я дунейм» мультфильмыр, 1928-м - Микки Маус теухуар къыдигъэкIащ.

Америкэм нэмыщI, а зэманым анимацэм зыщиужьырт Япониеми. 1917 гъэм абы къыщыунэхуащ зы дакъикъэм щегъэжьауэ дакъикъитхум нэс фIэкIа мыхъуу трах мультфильмхэр. 1933 гъэм анимацэ студием япэу щытрахауэ щытащ макъ зыщIэт мультфильм.

Урысей анимацэм и зэхэублакIуэу щытащ оператор, сурэтыщI Старевич Владислав. 1910 гъэм абы къигупсысащ гуащэхэр зыхэт анимацэ фильм. Графикэм тет анимацэ фильмыр Урысейм къыщыунэхуащ 1924 гъэм. СурэтыщIхэу Бушкин Александррэ Иванов Александррэ тхылъымпIэ Iувым къыхабзыкI сурэтхэр зи лъабжьэмкIэ теплъэ дахэхэр къыщызэгъэпэща абдж стIолым трагъапщIэурэ мультфильм трахырт. 1936 гъэм «Союзмультфильм» студиер къэунэхуащ. Япэ дыдэу къэралым мультфильм щхъуэкIэплъыкIэхэр щытрахыф хъуащ. 1969 гъэм «Ну, погоди!» мультфильм цIэрыIуэр къыдэкIащ.

1983 гъэм поляк Рыбинск Збигнев и «Танго» мультфильмым «Оскар» саугъэтыр къихьауэ щытащ. Абы япэ а саугъэтыр хуагъэфэщат Дисней Уолт и «Удз гъэгъахэмрэ жыгхэмрэ» мультфильмым. 1986 гъэм «Disney» студием компьютер анимацэ къыщагъэсэбэпу къаублащ.

1995 гъэм «Зэрыджэгу хьэпшыпхэм я тхыдэ» («История игрушек») мультфильм кIыхьыр къыдэкIащ. 1999 гъэм «ЛIыжьымрэ тенджызымрэ» мультфильмыр трахащ «IMAX» форматым тету. 2002 гъэм «Шрек» мультфильмым «Оскар» къихьащ. 2004 гъэм Афинхэм щекIуэкIа гъэмахуэ Олимп джэгухэм Урысейм и гупым я дамыгъэу хахащ мультфильмым и лIыхъужь Чебурашкэр.