Дэчыхыныгъэм кърикIуар

Фронтым ныбжьэгъу щызэхуэхъуат куржы щIалэ Куржорэ адыгэ щIалэ Тэркъанрэ. Зауэм узыпэмыплъа куэд къыщохъу. Мазэ хъуауэ зызэфIамыхауэ, я щыгъынхэр зэрамыхъуэкIауэ, ахэр тылым пIалъэ кIэщIкIэ къагъэкIуат тIэкIу загъэкъэбзэну. Тэркъан цыбэти, и щIыфэм хьэпIацIэ цIыкIу хищIагъэнут. Хуэмышэчыжыххэ щыхъум, абы сэххэм, блынхэм зыщихъуэрт. Абы бгъэщIэгъуэни хэлътэкъым - зауэр зауэт, псори арат.  Жэщ-махуэ ямыIэу бийм пэщIэт зауэлI тхьэмыщкIэхэм зыкIэлъыплъыжыну зэман дэнэт къыздрахынур? Арати, цIэ мыгъуэжьыр етауэ псори гугъу иригъэхьырт, гъэкIуэдыпIи ямыIэу.

Абы гу лъызыта Куржо и ныбжьэгъум еупщIащ: «сыт къыпщыщIар, хъумпIэцIэджхэр къожауэ ара?» - жиIэри.

- Си джанэ щIагъым зыгуэрхэм къыщажыхь, - иритыжащ мыдрейми жэуап. Куржо и ныбжьэгъум и щIыфэр зэпиплъыхьри, Iуэхур зытетыр къыщыгурыIуэм, абы и хущхъуэ зэриIэр жриIащ икIи къыхуихьащ кумбыгъэ морафэм иту фэтыджэн - арат къагъэсэбэпыр. Ар хуэсакъыу и ныбжьэгъум и щIыфэм щыщихуэм, Куржо Iурыс тутыныр абы и щIыфэм еIусэну сыткIэ ищIэнт… А нэIэрыкум Тэркъан и щIыфэ цыбэм мафIэшхуэ къыщылыдри, мо къэщтар зэуэ къыщылъэтри щIэпхъуащ, мафIэр жьым нэхъри нэхъ иныжу зэщIигъэстарэ, гужьеигъуэу. Насып иIэти, абы къыхуэкIуэрт ротэм и старшина Начо. Ар къыхуэжэм псынщIэу пэуври игъэджэлащ, и къэпталыр тридзэри, мыщэ удж трищIыхьурэ, игъэункIыфIыжащ. ИтIанэщ адрейхэри къэсу Тэркъан госпиталым щашар. Ар абы махуэ тIощIым нэскIэ щIэлъащ. АпщIондэху  командирхэм зэхуагъэкIуащ Куржо тралъхьэну тезырыр. Дэтхэнэми  ищIэрт зы къуаншагъэм щхьэкIэ тезыритI зэрытрамылъхьэр. Псори зэжьэр командир Пастуховым и унафэрт - ари къэсащ.

Унафэм жиIэрт къуаншагъэр зыIэщIэщIа куржы щIалэм гущIэгъу хуэщIыпхъэу, тезырышхуэ тралъхьэрэ ягъэлъэпэрапэ нэхърэ, и хахуагъэ къигъэлъэгъуэну Iэмал иратмэ зэрынэхъыфIыр - фIы сощIэ жиIэурэ, зэрымыщIэкIэ къэхъуа Iуэхут. Полковникым и унафэкIэ щIалитIыр зэбгъэдашэри зэрагъэкIужащ, псэухукIэ зэныбжьэгъуну псалъэ быдэ зратри. А тIум я псалъэр яIыгъащ зауэм зэдыхэтыхукIи, зауэр иуха нэужьи.

ТIури Кавказым щыпсэурти, куэдрэ зэрылъагъухэрт, уеблэмэ я щхьэгъусэхэри шыпхъу зэрыгъэхъуауэ, унагъуэхэм я гур зэхуэIэфIу псэуащ, зым и гуфIэгъуэр адрейм диIэтрэ я гуауэри зэдаIыгъыу. Дэчыхыныгъэмрэ шыIэныгъэмрэ мыхъуамэ, зыми ищIэртэкъым, арыншами зауэ лыгъэм хэт а щIалитIым я Iуэхур зэрыхъунумрэ къызэрекIуэкIынумрэ.

ЖАНТЕМЫРОКЪУЭ БетIал.

Псыгуэнсу къуажэ.