НэхъыфIу къалъытэ

«Компьютер Iэмалхэр педагогикэ щIэныгъэр хэзыгъахъуэщ» урысейпсо онлайн олимпиадэм кърикIуахэр къап­щытэжащ. КъБКъУ-м педагогикэмкIэ, физическэ щэнхабзэмрэ спорт егъэ­джэ­ныгъэмкIэ и институтым и егъэджакIуэ нэхъыжь Пщыгъэуш Рузаннэ олимпиадэм щытекIуахэм ящыщщ.

ЕгъэджакIуэхэм иджырей технологиехэр къызэрагъэсэбэпыфыр, щIэныгъэ-къэхутэныгъэ лэжьыгъэхэм хуаIэ бгъэ­дыхьэкIэр, абыхэмкIэ я зэфIэкIыр зыхуэдэр гъэбелджылынырт олимпиадэм и къалэныр. Абы и къызэгъэпэщакIуэщ егъэ­джэныгъэмкIэ «Диплом педагога» дуней-псо зыужьыныгъэ центрыр. Олимпиадэм я зэфIэкI щеплъыжащ егъэджакIуэ ныбжьыщIэу 370-рэ. Зэпеуэм я щIэныгъэ-лэжьыгъэр ирагъэхьащ, тест лэжьыгъэхэри ирагъэщIащ.
Олимпиадэм щытекIуа Пщыгъэуш Ру­зан­нэ щIэх-щIэхыурэ хэтщ щIэныгъэ зэпеуэхэм икIи ехъулIэныгъэхэр зыIэрегъэхьэ. ВАК-мрэ РИНЦ-мрэ я журналхэм и щIэ- ныгъэ лэжьыгъэу 15 ихуащ.
- Университетым щылэжьэн зэрыщIэздзэрэ зэпеуэхэм сыхэтщ. Абыхэм Iэмал  къуат зыбгъэунэхужыну, щIэныгъэм хэбгъэхъуэну, уи зэфIэкIхэр къызыкъуэпхыну. Олимпиадэм езгъэхьа лэжьыгъэри гукIи псэкIи сызэлэжьащ. НэгъуэщIуи хъунукъым, Iуэху узыпэрыхьам гуащIэ иумы­хьэ­лIэмэ, къикIын щыIэкъым, - жеIэ Рузаннэ.
«Зыщыпсэу щIыналъэм и щхьэхуэныгъэхэр къэлъытауэ педагогикэм и лэ­жьакIуэхэр гъэхьэзырын» - аращ Пщыгъэуш Рузаннэ мы зэманым зэлэжь кандидат лэжьыгъэм и фIэщыгъэр. И щIэныгъэ унафэщIыр КъБР-м и Парламентым         Егъэ­джэныгъэмкIэ, щIэныгъэмрэ щIалэ­гъуа­лэм я IуэхухэмкIэ и комитетым и унафэщI Емуз Нинэщ.
Пщыгъэуш Рузаннэ езыр студентхэм фIыуэ ялъагъу егъэджакIуэщ. Ирегъаджэ, еунэтI, я гупсысэхэр къызыкъуахынымкIэ сэбэп яхуохъу.
- Студентхэр фIыуэ солъагъу. Я гупсысэр зэрыжаным, университетым щекIуэкI Iуэхухэм жыджэру зэрыхэтым, щIэныгъэм зэрыхуэпабгъэм сегъэгуфIэ. Еджэным хуэщхьэхынэ яхэту гу лъыстэми, ар тезгъэгушхуэныр Iуэху сощI, къыгурызогъаIуэ ­гъащIэм мурад щыгъэувын зэрыхуейр, а мурадхэр щIэныгъэншэу зэрызумыгъэ­хъулIэфынур, - жеIэ абы.