Гуапагъэр зи фащэ

УсакIуэ зэчиифIэр къызэрысщыхъур къризгъэлъагъуэу Марие хуэстха усэм хэтщ «сабиипсэр зыхэзыщIэ, сабиибзэр зыIурылъ» жыхуиIэ псалъэхэр. Вындыжьым и усэхэр зи лъабжьэ уэрэдылъэр щэнхабзэм и лэжьакIуэ куэдым къагъэсэбэп. Сэри Къэсейхьэблэ къуажэм абыкIэ сабийхэм сфIэфIу сащыдолажьэ. Сыт хуэдэ лъэхъэни школакIуэ цIыкIухэм я дзапэ уэрэдхэм ящыщщ Марие и псалъэхэр зыщIэлъ «Си егъэджакIуэ», «Удз гъэгъа», «Школ вальс» уэрэд дахэхэр. 

Апхуэдэу жылэ зэхуэмыдэхэм куэдрэ къыщызэрагъэпэщащ Вындыжь Мариерэ сабийхэмрэ я пшыхьхэр. А зэхуэзэхэр икъукIэ щхьэпэщ лъэныкъуитIым я дежкIи: усакIуэм и къалэмыпэм щIэуэ къыщIэкIахэм цIыкIухэр щыгъуазэ мэхъу, Марии абыхэм я гупсысэхэмрэ Iуэху еплъыкIэщIэхэмрэ къещIэ. Марие «Iэхэр» зыфIища усэр куэдым гунэс ящыхъухэм ящыщщ:

Дэни нос Марие и псалъэр. Журналист Вындыжьым репортаж гъэщIэгъуэнхэр къыздримытыкIа щIыпIэ ди республикэм къыщымынами ярейщ, абыхэм къызэщIаубыдэ школхэм, сабий садхэм, егъэджакIуэхэм, гъэсакIуэхэм, еджакIуэхэм я зэпеуэ, зыкъэгъэлъэгъуэныгъэ, зэхыхьэ зэмылIэужьыгъуэхэр. Езыр мылэжьэжми, ахэр щахъумэ радиом и фондым икIи щIэх-щIэхыурэ къат. Апхуэдэуи, ди щIыналъэм анэдэлъхубзэр щезыгъэдж егъэджакIуэ пашэхэр, сабий садхэм щылажьэ гъэсакIуэ IэкIуэлъакIуэхэр радиом и студием иригъэблагъэурэ, Марие цIыхубэм я деж нихьэсащ абыхэм я Iуэху зехьэкIэ пэрытхэр, дуней еплъыкIэхэр, егъэджэныгъэ-гъэсэныгъэм щекIуэкI икIи къыхыхьэ зэхъуэкIыныгъэфIхэр. 

 Анэдэлъхубзэр пэщIэдзэ, курыт школхэм зэрыщрагъэджым кIэлъыплъ, ар егъэфIэкIуэнымкIэ щыIэ хэкIыпIэхэр къэзыхутэ икIи езыгъэфIакIуэ «Си бзэ – си псэ, си дуней» республикэпсо фестиваль-зэпеуэм и къэпщытакIуэ гупым хэткIэрэ, Вындыжьыр ящыщщ сабийм и бзэр дихьэхыу егъэджыным, лъэпкъым бгъэдэлъ псэкупсэ къулеягъым ар ешэлIэным, и хабзэр, тхыдэр фIэгъэщIэгъуэну зригъэщIэным хуэшэным хуэлажьэ хэкупсэхэм. Псалъэм къыдэкIуэу жысIэнщи, «Адыгэ псалъэ» газетымрэ КъБР-м Егъэджэныгъэмрэ щIэныгъэмкIэ и министерствэмрэ зэдрахьэжьауэ щыта а Iуэху дахэм мы зэманым хэпщIыкIыу зиужьащ, унэтIыныгъэ куэди иIэ хъуащ. Ар зи фIыгъэхэм ящыщщ зи бзэр фIыуэ зылъагъу, абы зиужьыным куэдрэ хуэлэжьа, ноби хуэлажьэ Марии. 

Лэжьыгъэ щхьэпэ куэд иджыри зэфIэзых бзылъхугъэ щыпкъэм нэхъыбэжкIи дыщогугъ. Апхуэдэу зи хэкур, къыщалъхуа щIыналъэр, и лъэпкъэгъухэр фIыуэ зылъагъу, зи бзэр IэфIу зигу илъ цIыхум и мурадхэр адэкIи зэрылъагэр икIи ахэр къызэрехъулIэнум шэч къытетхьэркъым. УзыншагъэкIэ, унагъуэкIэ, бынкIэ гукъеуэ имыIэу Тхьэм куэдрэ игъэпсэу Марие.