ЗэныбжьэгъуитIым я хъыбар

Бдзэжьеящэмрэ пингвинымрэ я зэныбжьэгъугъэ телъыджэм щымыгъуазэ Бразилием щыпсэу къыщIэкIынкъым. Диндим зыфIаща пингвиным илъэс къэс километр мини 8 зэпичурэ Бразилием щыпсэу и ныбжьэгъу бдзэжьеящэм деж лъагъунлъагъу кIуэуэ щытащ илъэс бжыгъэкIэ.

Жоао Перейрэ де Соузэ, илъэс 71-рэ хъу цIыхухъум, 2011 гъэм Рио-де-Жанейрэ и псы Iуфэм деж пингвин цIыкIу къыщигъуэтат. Ар шхын щхьэкIэ лIэрт, щIыдагъэм игъаплъэртэкъым, зэ IуплъэгъуэкIэ зищIысыр къыбгурымыIуэу теплъаджэт. 
Перейрэ де Соузэ ар и унэм ихьри игъэкъэбзащ, тхьэмахуэкIэ бдзэжьей иригъэшхыу, кIэлъыплъу и деж щIигъэсащ. Къару къыхыхьэжащ, зэрыубыдыжащ жиIэри, пингвиныр псым хигъэтIысхьэжыну ар хы Iуфэм ихьа щхьэкIэ, цIыхухъум и хьэщIэм зыкъринэри, иджыри мазэ 11-кIэ щIыпIэ хуабэм щыIащ. И чэзур къэсщ, псэущхьэм и цы щабэр текIщ, нэхъ ткIийуэ къытекIэри, мис итIанэщ зыщигъэбзэхыжар. 
Пэжу, де Соузэ абы есати, хуабжьу игу къеуат ныбжьэгъу къыхуэхъуа, мылылъэ жыжьэм щыщ пингвиныр Антарктидэм зэрыкIуэжар. 
Илъэс дэкIыу, Диндим Бразилием къыщигъэзэжам, цIыхухэм зэрагъэщIэгъуэнур къахуэщIэртэкъым! Абдеж щыщIидзэри, пингвиным илъэс къэс къытригъазэурэ цIыхухъум деж щыIэрт бадзэуэгъуэ мазэм щыщIэдзауэ мазае хъуху. Ар зи нэгу щIэкIахэм яIуэтэж Диндим ажалым къыIэщIэзыха и ныбжьэгъум гу щимыхуэжу, дэнэ мыкIуэми иужь имыкIыу зэрыщытар. Апхуэдэ телъыджэ зэи зыми илъэгъуатэкъыми, псоми ягъэщIагъуэрт. 
Езы Перейрэ де Соузэ жиIэрт: «Си быным хуэдэу фIыуэ солъагъу Диндим. Быдэу си фIэщ мэхъу езыри къызэрысхуэгумащIэр. Сыту жыпIэмэ, сэ нэмыщI зы цIыху зыбгъэдигъэхьэркъым икIи зригъэIусэркъым. ХьэщIапIэ къыщысхуэкIуахэм деж ар си куэщIым илъу мэжей, зызегъэгъэпскI, си Iэгум йошхыкI, нэгъуэщI зыгуэр къыбгъэдыхьэмэ - йодзакъэ».