ЩIалэгъуалэ мелуани 10-м нэблагъэ хэтщ

«Пушкиным и картэ» программэр зэрырагъажьэрэ ар къагъэсэбэпу къащэхуа билетым и бжыгъэр мелуан 53-м щIигъуащ. Абы теухуауэ УФ-м щэнхабзэмкIэ и министр Любимовэ Ольгэ иджыблагъэ къыщыпсэлъащ «Урысей» гъэлъэгъуэныгъэ-зэхыхьэм ипкъ иткIэ ирагъэкIуэкIа «КъэкIуэнум хэлъхьэныгъэ хуэзыщIыр щэнхабзэрщ» зэIущIэм. 
Министрым къызэрыхигъэщамкIэ, щIалэгъуалэм къагъэсэбэпа билет мелуан 53-м щыщу мелуан 21-р кином зэрыкIуахэращ. 2023 гъэм и кIэм къызэрапщытэжамкIэ, «Пушкиным и картэр» къэзыгъэсэбэпар цIыху мелуани 9-рэ мин 600-рэ мэхъу, я ныбжьыр илъэс 14-м къыщыщIэдзауэ 22-м нэс хъууэ. 
- Программэм къыхыхьэхэм адэкIи я бжыгъэм хохъуэ икIи мы зэманым ахэр мелуани 9-рэ мин 800-м нэсащ. ЦIыху минрэ 600-р Урысейм и щIыналъэщIэхэм я щIалэгъуалэрщ, - жиIащ Любимовэм.
Министрым къызэригъэлъэгъуамкIэ, нэхъ жыджэру картэр къыщагъэсэбэпыр Чувашие, Оренбург, Тэтэр, Кострома, Нижегородск щIыналъэхэрщ. «А щIыналъэхэм я щIалэгъуалэм я процент 90-р къыхыхьащ мы Iуэхум», - къыхигъэщащ министрым.
Пушкиным и картэмкIэ щIалэгъуалэм Iэмал яIэщ музейхэм, театрхэм, кинотеатрхэм, гъэлъэгъуэныгъэхэм, филармонием, нэгъуэщI щэнхабзэ IуэхущIапIэхэми пщIэншэу кIуэну. Ар зытещIыхьар зи ныбжьыр илъэс 14-22-м итхэрщ. Зы картэм сом мини 5 илъщ. Фигу къэдгъэкIыжынщи, программэр ирагъэжьауэ щытащ 2021 гъэм и фокIадэм.