«Илъэсым кърикIуахэр - Путин Владимир и гъусэу»

Урысей Федерацэм и Президент Путин Владимир и пресс-конференцэ иным щIидзащ.  «Илъэсым кърикIуахэр Путин Владимир и гъусэу» зыфIаща  Iуэхур мы гъэм пресс-конференцэрэ теленэтын занщIэу зэхэтщ.  Мы дакъикъэхэм къэралым и цIыхухэм Президентыр йопсалъэ Iэмал зэмылIэужьыгъуэхэмкIэ: зэIущIэм кърихьэлIа журналистхэм, телевидением и IэмалхэмкIэ зыкъыхуэзыгъазэхэм, социальнэ сетьхэмкIэ къатхэхэм, нэхъ пасэу зи упщIэхэр къезыгъэхьахэм жэуап убгъуа ярет Путиным. 
ЗэIущIэм кърихьэлIащ ди къэралым и хэгъэгухэм щыщ журналистхэр, щIэуэ къыхагъэхьэжа щIыналъэхэм къикIахэр, хамэ къэралхэм щылажьэ репортерхэр.  
Дыгъэгъазэм и 1 лъандэрэ ЦIыхубэ фронтым зэхуихьэса упщIэхэр нэхъыбэу теухуащ социальнэ дэIэпыкъуныгъэхэм, гъуэгухэм я щытыкIэм, псэупIэ-коммунальнэ IэнатIэр къызэрызэгъэпэщам, пенсэхэр хэгъэхъуэным, дзэ Iуэху хэхам щыIэ зауэлIхэм защIэгъэкъуэным. УпщIэу мелуанитIрэ мини 100-рэ кърагъэхьащ.