Къэрал экономикэм зеужь

Сыт щыгъуи Президентым псом япэу зэреупщIыр къэралым и экономикэ щытыкIэрщ. НобэкIэ дрипагэну сыт къэдэхъулIар? Абы и жэуапу Путин Владимир жиIащ къэралкIуэцI валовэ продукцэм и хэхъуэр мы гъэм и кIэм проценти 3,5-кIэ нэхъыбэ зэрыхъунур. 
«Ар ехъулIэныгъэфIщ. Ауэ, ди жагъуэ зэрыхъущи, инфляцэр тIэкIу дэкIуеящ, илъэсым и кIэм проценти 8-м нэблэгъэну хуагъэфащэ. Ауэ Центральнэ банкымрэ Правительствэмрэ ар зэпIэзэрыт щIыным теухуауэ ялъэкI къагъанэркъым. 
Псом нэхъыщхьэращи, ди къэралым къыщыщIагъэкIхэм хохъуэ, ар мы гъэм проценти 3,6-кIэ нэхъыбэщ. УзыщыгуфIыкI хъуну Iуэхущ къэралым и мылъкум инвестицэу къыхалъхьэр проценти 10-кIэ нэхъыбэ зэрыхъуар.  А псом къегъэлъагъуэ зыужьыныгъэм и лъагъуэм дызэрытетыр. Ахъшэ халъхьэ, къыщIагъэкIымрэ ящIымрэ хохъуэ, цIыхухэм папщIэ IэнатIэщIэхэр къоунэху. 
Предприятиехэм къахэхъуэр процент 24-м нэсащ. ДяпэкIэ, улахуэм хэхъуэнущ, проценти 8 хуэдизкIэ.  ЛэжьапIэншэхэм я бжыгъэм зэрыхэщIым ущымыгуфIыкIынкIэ Iэмал иIэкъым, ар процентищым нэдгъэсауэ щытамэ, иджы къызэрыдбжамкIэ, проценти 2,9-рэ хъуащ. Апхуэдэ Урысейм и тхыдэм къыщыхъуакъым. 2024 гъэм щIышылэм и I-м МРОТ-р процент  18-кIэ хэхъуэнущ. Зи гугъу тщIыхэр къэралым и экономикэм зэрызиужьым и зы щыхьэтщ.