Хабзэ хъуауэ, илъэс къэс бадзэуэгъуэм и кIэухым ди къэралым щагъэлъапIэ Дзэ-Тенджыз флотым и махуэр. Ар Урысей Федерацэм и Президентым и УнафэкIэ ягъэувауэ щытащ 2006 гъэм. Абы лъандэрэ а махуэр Iэтауэ ягъэлъапIэ Дзэ-Тенджыз флотым къулыкъу щызыщIахэм, ноби къалэн езыхьэкIхэм, ар зи гъащIэр епхауэ псэухэм.
Адыгэхэми къытхэтщ Дзэ-Тенджыз флотым къулыкъу щызыщIахэр. Апхуэдэхэм ящыщщ Аруан щIына- лъэм хыхьэ Къэхъун жылэшхуэм и нэхъыжьыфIхэм халъытэ, адыгэ хабзэмрэ лъэпкъ нэмысымрэ зыгъэнэхъапэу гъащIэр езыхьэкI Такъ Беслъэн. Зэщхьэгъусэхэу Хьэсинрэ ГуащэлъапIэрэ я бынихым я нэхъыщIэщ ар, 1928 гъэм къалъхуащ. Совет къэралыгъуэм къикIуа тхыдэ гъуэгуанэм щыщ куэд и нэгу щIэкIащ Беслъэн. СССР-м гъащIэщIэр щыщаухуэ, лIэщIыгъуэ блэкIам и 20 - 30 гъэхэм хиубыдащ абы и сабиигъуэр, балигъ хъугъуэ ныбжьыр ирихьэлIащ 1941 - 1945 гъэхэм екIуэкIа Хэку зауэшхуэм.
- Ди адэ-анэу Хьэсинрэ ГуащэлъапIэрэ (я ахърэтыр нэху Тхьэм ищI) къуитхурэ зыпхъурэ зэдагъуэтат: Зырамыку, Урысхъан, Хьэбас, Таужан, Абдулчэрим, сэ. ЗэгурыIуэрэ зэдэIэужрэ зэрылъ, хабзэмрэ нэмысымрэ щызекIуэ адыгэ унагъуэшхуэщ сыкъыщыхъуар, - и сабиигъуэр игу къегъэкIыж нэхъыжьыфIым. - Адэ-анэм я псалъэр тIу дымыщIу, зэрыхъукIэ сэбэп дахуэхъуу дыкъэтэджащ, гуащIэдэкI лэжьыгъэми зыпыIудмыдзу дагъэсащ абыхэм.
Гугъу ехьами, дунейр и щIэщыгъуэу, гъащIэр фIэIэфIу къэхъуащ Беслъэн. Илъэси 10-м иту школым кIуа щIалэ цIыкIур еджэным дихьэхырт, щIэныгъэ зэгъэгъуэтыным хуэпабгъэрт, хъуэпсапIэхэмрэ гуращэхэмрэ и куэдт. Зи щхьэгъусэ пэжыр пасэу зыщхьэщыкIа ГуащэлъапIэ щыгуфIыкIырт гугъапIэу къыхуэна бын дыгъэхэм я къэхъукIэм, мурадыфIхэр щэхуу яхуигъэпсу. А псори къызэпиудащ 1941 гъэм къэхъея Хэку зауэшхуэм. А мафIае илъэсхэри ирахьэкIащ Такъхэ я унагъуэм, я къуажэм, Совет Союзым щыпсэу цIыху мелуанхэм хуэдэу, зауэм и бэлыхьхэмрэ абы къихь гуауэхэмрэ я нэгу щIэкIыу. Адрей къэхъундэс ныбжьыщIэхэм яхэту, Беслъэни абы и анэкъилъхухэри зауэ лъэхъэнэм колхоз губгъуэм итащ, фронтым Iут адэхэм, къуэш нэхъыжьхэм я къалэну щытахэр ягъэзащIэу. «Вы зимыIэм шкIэ щIещIэ», - щыжаIэ зэманти, ини цIыкIуи, цIыхухъуи бзылъхугъи гугъуехьышхуэхэр яшэчу фронтым Iутхэм ядэIэпыкъуащ, я къарурэ зэфIэкIрэ къызэрихьу.
- СощIэж 1942 гъэм и бжьыхьэм нэмыцэ зэрыпхъуакIуэхэр ди жылэм къыщыдыхьа зэманыр. Къуажэм зыщызыгъэбыда бийм ди школым пэмыжыжьэу щаIыгът гъэру яубыда совет зауэлIхэр, гъущI банэкIэ къэхухьауэ. Уэрам къэс езыхэм къулыкъу яхуэзыщIэ старостэхэр дэтт, нэмыцэ, румын сэлэтхэри унагъуэхэм ихьэрт, абы илъ ерыскъыхэкIхэр къащтэрт, джэдкъазри, гъэшхэкIхэри, джэдыкIэри зэдагъакIуэу, - а зэман хьэлъэм топсэлъыхь Беслъэн. - Советыдзэр ебгъэрыкIуэу бийр ди республикэм ирахужа нэужьщ хуиту дыщыбэуэжар. Абдеж дэ нэхъри ди фIэщ хъуауэ щытащ нэмыцэ фашистхэм дазэрытекIуэнур. А фIэщхъуныгъэращ ди гур мыкIуэду дыкъызэтезыгъэнар балигъхэри сабийхэри.
Апхуэдэуи хъуащ. «ЩхьэкIуэ зышэч щхьэ шхыгъуэ йохуэ», - жиIащ адыгэ псалъэжьым. Хэку зауэшхуэр СССР-м и текIуэныгъэкIэ 1945 гъэм иуха нэужь, ди къэралыр мамыр гъащIэм хуэкIуэжащ, абы и цIыху псори зэдэууэ еувэлIащ бийм зэтрикъута цIыхубэ хозяйствэр зэтегъэувэжыным. 1946 гъэм еджэным пищэжащ Беслъэни. Школыр ехъулIэныгъэкIэ къиухри, Аруан районым щыIэ «Мэкъумэштехникэ»-м лэжьэн щыщIидзащ. БалигъыпIэ иува щIалэр 1954 гъэм дзэм ираджащ, Хэкум къулыкъу хуищIэну. Беслъэн зыхэхуар Дзэ-Тенджыз флотырати, ар илъэси 4-кIэ ирихьэкIащ. Абы зэрыжиIэмкIэ, дзэм къулыкъу зэрыщищIа илъэсхэм къриубыдэу зы адыги гъусэ къыхуэхъуакъым, и къуажэгъу щIалэ Къардэн Албий Севастополь еджапIэ щыщыIам щыгъуэ зэрыхуэзам нэмыщI. Беслъэн япэ а флотым къулыкъу щызыщIауэ жылэм дэсар Бжьыхьэ МуIэед и закъуэт.
Дауи, тынштэкъым апхуэдиз зэманкIэ дзэ къулыкъум упэрытыну. И пщэрылъ къалэнхэр, зэрихабзэу, къызыхуэтыншэу зэригъэзащIэм папщIэ, Беслъэн илъэси 4-м къриубыдэу тIэунейрэ унэм къагъэкIуэжащ, и унагъуэр, Iыхьлыхэр илъагъуну, тIэкIу зигъэпсэхуну. Къулыкъум пэрыувэжырти, дзыхь къыхуащIа IэнатIэр ныкъусаныгъэншэу аргуэру зэфIихырт. Апхуэдэу пэжу, ехъулIэныгъэ иIэу къулыкъур зэрырихьэкIым папщIэ, 1956 гъэм Такъ Беслъэн къыхуагъэфэщауэ щытащ ВЛКСМ-м и Комитет Нэхъыщхьэм къыбгъэдэкI ЩIыхь тхылъыр.
ЩIыхьрэ щытхъурэ пылъу а къалэн гугъур зэфIихри, 1958 гъэм Такъым къигъэзэжащ щалъхуа щIыналъэм икIи псэ хьэлэлу къэралым хуэлэжащ иджыри илъэс 30-м щIигъукIэ. И лэжьыгъэфIым папщIэ къыхуагъэфэщащ дамыгъэхэр, щытхъу, фIыщIэ тхылъхэри.
Унагъуэ дахи иухуащ Беслъэн. Абы щхьэгъусэ ищIат Зэрэгъыж дэс Бэджий лъэпкъым япхъу бзылъхугъэ гуакIуэ. Беслъэнрэ Женярэ (и ахърэтыр нэху ухъу!) щIалитIрэ зы хъыджэбзрэ: Аслъэн, Мадинэ, Арсен сымэ - зэдагъуэтащ, зэдапIащ, гъащIэм гъуэгу пэж щытрагъэуващ. ГъащIэр матэщIэдзакъым. Зэщхьэгъусэхэм гуауэшхуи ягъэвын хуейуэ къахуиухат: я къуэ Арсен дунейм ехыжащ. Къуэм и фэеплъу, гурыфIыгъуэу къахуэнащ абы и щIэблэ дыгъэхэр.
Тыншыгъуи гугъуехьи, гуфIэгъуи нэщхъеягъуи хэтщ гъащIэм. Абы щынэхъыщхьэр сыт хуэдэ щытыкIэми зэпIэзэрыту, уи пщIэр, напэр пхъумэу, нэмысыр пIыгъыжу укъикIыфынырщ. Щапхъэу бгъэлъагъуэ хъуну апхуэдэ гъуэгуанэ купщIафIэщ Такъ Беслъэн къикIуар. НэхъыжьыфIым и гъащIэр ноби ирехьэкI адыгэ хабзэмрэ нэмысымрэ япэ иригъэщу. А лъэпкъ фIыгъуэхэм щIипIыкIащ абы и бынхэр, ахэращ зыхуиущийр абыхэм къащIэхъуэ щIэблэ дахэри.
Дзэ-Тенджыз флотым екIуу, щытхъу пылъу къулыкъу пэж щызыщIа, къэралым и фIыщIэ къэзылэжьа Такъ Беслъэн дохъуэхъу и махуэмкIэ. Узыншэу, и щIэблэм я гуфIэгъуэ куэд хэплъэу бэрэ Тхьэм игъэпсэу лъэпкъми къуажэми я нэхъыжьыфIыр!