Дунейр къызэриухуэрэ къэхъукъащIэхэр мащIэкъым. Ахэр цIыху гъащIэм хэмыкIыу къыдекIуэкI Iуэхущ. АрщхьэкIэ языныкъуэхэр зи Iэужьыр езы цIыхуращ, абы и нэпсеягъэрщ. Щапхъэхэр мащIэкъым.
Ла-Манш псы дэжыпIэр щIыпIэ къуейщIейщ. Мыбы толькъунхэр куэдрэ къыщоукъубий. Псом хуэмыдэу хэлъафэри щIыдагъэ зышэ кхъухьышхуэхэрщ. Апхуэдэ насыпыншагъэхэм я лъэужьхэр, зэрыгурыIуэгъуэщи, гъэкIуэдыжыгъуейщ.
1978 гъэм и мазаем Сауд Хьэрыпым икIри Роттердам кIуэну ежьащ «Амоко Кадис» танкерыр. Метр 340-м нэс зи кIыхьагъ а абрагъуэм щIыдагъэ тонн мин 220-рэ хуэдиз итт. Гъатхэпэм и I6-м и пщэдджыжьым кхъухьыр Ла-Манш псы дэжыпIэм Iухьащ. Капитан Бардари Паскуале унафэ ищIащ миль II-м нэблагъэ зи бгъуагъ дыхьэпIэм теувэну.
АпщIондэхукIэ дунейр къызэIыхьащ, жьышхуэ къыкъуэуащ. Пэжу, ар апхуэдэ кхъухьышхуэхэм я дежкIэ шынагъуэтэкъым. АрщхьэкIэ зыпэмыплъа къэхъуащ. Дакъикъэ 40 дэкIри, Уэссан хытIыгум нэблэгъауэ «Амоко Кадис» и рулыр къутэри, танкерыр «щхьэуназэ» хъуащ. Капитаныр къыдэIэпыкъуну елъэIуащ КъухьэпIэ Германием и «Пасифик» буксерым. Ауэ абы и капитан Вайнер Харитмунт хуит зыкъыригъэщIын хуейт Гамбург дэт и компанием. Лъэныкъуэхэр зэгурыIуэным пэплъэхукIэ, «Амоко Кадис» кхъухьым и капитаным мурад ищIащ хъурзэхэр иридзыхыну. Зым фIэкIа къехъулIакъым – адрейр зэпыудащ. Дунейр нэхъри зэIыхьэрт. КъегъэлакIуэр къыщыIухьар шэджагъуэущ. Абы танкерыр кIапсэкIэ илъэфын хуейт. АрщхьэкIэ буксирым и капитан Вайнер сондэджэрын щIидзащ, танкерыр къригъэлыным ипIэкIэ. Сыхьэти 3-кIэ екIуэкIа зэпсэлъэныгъэхэм яужькIэ зэгурыIуахэщ хьэлъэм и уасэм и проценти I0-р къегъэлакIуэм иратыну. Ар доллар мелуани 2-м щIигъурт.
Иджы танкерыр Iэмал зэриIэкIэ Iуфэм нэхъ пэжыжьэу Iушын хуейт. АрщхьэкIэ яхузэфIэкIакъым – троссыр зэпычащ, етIуанэми абы и махуэр къыхуэкIуащ. ЩытыкIэр пхуэгъэзэкIуэжынут, етIуанэ бусирыр – Франджым и «Семион» Iуэхум хыхьамэ. Ауэ итIанэ «Пасифик-м» - и капитаныр ахъшэмкIэ дэгуэшэн хуей хъунут абы. Ар Вайнер идакъым.
Кхъухь абрагъуэр хуэмурэ, ауэ мыувыIэу Iуфэм Iуихьэрт. Сыхьэтыр 2I-м нэблэгъауэ ар къытехутащ мывэ къырхэм, Танкерыр и щIэр зэхэфыщIат.
ПсынщIэу зызыпхъуэта вертолетхэм кърагъэлащ танкерым иса псори. Езыр нэхущым нэблэгъауэ зэпыщIыкIри, щIыдагъэ тонн мин 220-р тенджызым хэлъэдащ.
Псы Iуфэм Iус къалэ цIыкIум щыпсэухэм пщэдджыжьым къалъэгъуащ хы тхьэрыкъуэхэр зэрызэтелIар. Бдзэжьеящэхэр хущIэкъуащ фIыцIэ хъуа псым щIыдагъэр къыхахыну. АрщхьэкIэ яхузэфIэкIакъым, щIыпIэм мафIэгъэункIыфIхэри жандармэхэри псынщIэу къэса пэтми. Къыщепщэ лъэныкъуэр зыхъуэжа жьым IэнатIэ фIыцIэр Тхылъ Плъыжьым ит къуалэхэу мин 25-м я хэщIапIэ Герни, Джерси хытIыгухэмкIэ ихурт. Гъатхэпэм и 2I-м зауэлIхэмрэ волонтерхэмрэ лэжьэн щIадзащ.
ЩытыкIэр нэхъри хьэлъэ ищIащ франджхэм насос лъэщхэр зэрамыIам. Ахэр нэгъуэщI къэралхэм кърашын хуей хъуащ.
Франджым и правительствэм мы Iуэхум псори зэхэту франк мелуан 430-рэ тригъэкIуэдащ. АрщхьэкIэ насыпыншагъэм и Iэужьхэр ноби зыхащIэ.
Мис аращ нэпсеягъэм къишар. ИтIанэ къезэгърэ КъухьэпIэ Европэр хьэрэмыгъэншэу зэкъуэту жыпIэныр. Псори зытращIыхьыр фейдэмрэ ахъшэмрэщ.
