Лъэпкъым хуэфащэ адыгэлI щыпкъэМы махуэхэм и илъэс 85-р егъэлъапIэ философие щIэныгъэхэмкIэ доктор, профессор, академик Хъурей Феликс Ахьмэд и къуэм. Абы и цIэр епхащ ди республикэм и егъэджэныгъэ-щIэныгъэ IэнатIэм зыIэригъэхьа ехъулIэныгъэ куэдым. Хэкупсэ нэсу зи гъащIэр зыхь адыгэлI щыпкъэм бгъэдэлъ акъыл шэщIам, зэфIих хэкупсэ Iуэхухэм щыгъуазэр мащIэкъым. Зигури зи псэри щIэм хузэIуха, зи гупсысэмрэ хъуэпсапIэмрэ здынэсым зи зэфIэкIри нэзыгъэсыф унафэщIым «Уи IэщIагъэр фIыуэ умылъагъумэ, абы ехъулIэныгъэ дэплъагъуфынукъым» псэлъафэр и Iэпэгъущ икIи апхуэдэу щапхъэфI яхуохъуф и гъэсэнхэми, и нэIэм щIэт дэтхэнэми. ЩIэныгъэлIым, егъэджакIуэ-гъэсакIуэ Iущым и зэмани, и къаруи хуегъэпс лъэпкъым цIыху нэс хуэгъэсэным, и зэфIэкIкIи хьэл-щэнкIи иджырей гъащIэм декIурэ абы увыпIэ дахэ щызэзыгъэгъуэтыф щIэблэ адыгэм къыщIэувэным. ГурыIуэгъуэщ ар зэрымыIуэху тыншыр, ауэ Хъурейми абы и унафэм щIэту Iуэху щхьэпэ куэд зэфIэзыхыу лэжьа гуп зэкъуэтми ар къазэрехъулIар нэрылъагъущ, я IуэхущIафэ дахэхэр, зыIэрагъэхьэ ехъулIэныгъэхэр наIуэ къыщыхъукIэ. Хъурей Феликс философие гупсысэ куу зыщIэлъ и тхыгъэхэм куэдрэ уащрохьэлIэ бзэм цIыху гъащIэм щиIэ мыхьэнэм хуэгъэпса псалъэхэм. «Бзэр акъылыр къэзыгъэщI, абы зезыгъэужь Iэмэпсымэ лъэщщ», - жеIэ Феликс, ар фIыуэ егъэджыным гулъытэ хэха зэрыхуэщIыпхъэр нэсу къыгурыIуэу. Псалъэ къудейкIэ мыхъуу, зэфIих Iуэху щхьэпэхэмкIи Хъурейм къегъэлъагъуэ и Iуэху еплъыкIэр. А гупсысэр и гъуэгугъэлъагъуэу, БизнесымкIэ институтым абы къыщызэригъэпэщауэ щытащ Дунейпсо Университет зэIуха (ОМУ). Бзэхэр джынымкIэ щIэныпхъэр щаубзыху институтыр (ИМПЯ) ОМУ-м и къудамэ щхьэхуэщ. Бзэхэр егъэджыным ехьэлIауэ щIэныгъэм къихута щIэныпхъэм (методикэм) хэлъ IэмалыфIхэр тэмэму къыхэгъэщхьэхукIауэ гъэлэжьэн, бзэр езыгъэджхэм ар гурыIуэгъуэ ящыщIын, бзэр джыныр сабийхэм нэхъ тынш ящыщIын - ахэрат и къалэн нэхъыщхьэр ИМПЯ-м. Апхуэдэу езым къызэIуихауэ щыта БизнесымкIэ институтым и программэм нэхъапэм хэмытауэ Хъурейм хигъэхьат анэдэлъхубзэр Iэмал имыIэу егъэджыныр. Феликс и унафэм щIэту ежьа а унэтIыныгъэм Iуэхугъуэ хъарзынэхэр щызэфIахащ. Абы мызэ-мытIэу щрагъэкIуэкIащ методикэщIэм хэлъ IэмалыфIхэр зи лъабжьэ семинархэр, конференцхэр, дерс зэIухахэр. КъинэмыщIауэ, методикэ пособиеу блы къыдагъэкIащ, урысыбзэкIэ, адыгэбзэкIэ тхауэ. «В мире живого слова» тхылъым щызэхуэхьэсащ бзэр джынымкIэ екIуэкIа гъэунэхуныгъэ зэмылIэужьыгъуэхэр я лъабжьэу еджапIэхэм щата дерс зэIухахэр. Теорие нэсри практикэри зэщIэлъу, бзэ щIэныгъэм зезыгъэужьа къэхутэныгъэхэр и лъабжьэу бзэр егъэджыным кърикIуэ ехъулIэныгъэхэр нэрылъагъу къэзыщI, бзэр езыгъэдж псоми яхуэгъэпса лэжьыгъэ щхьэпэщ мы тхылъыр. Ар ехъулIэныгъэу къэплъытэ хъунущ, сыт щхьэкIэ жыпIэмэ нобэкIэ ди сабийхэр зэредгъаджэ тхылъхэр пэжыжьэщ бзэ щIэныгъэм игъуэта зыужьыныгъэм. Апхуэдэ щытыкIэм укъызэрикIын Iэмал гуэр щIэныгъэр и лъабжьэу къыщахутакIэ, ар мызэ-мытIэу утыкум кърахьэурэ и зэфIэкIхэр къыщагъэнэхуакIэ, сыт-тIэ абы етку щIэмыхъур, дыгумызагъэр пэжмэ, ди гур щIэм хузэIухар хьэкъмэ, ди лъэпкъри, ди сабийри, ди IэщIагъэри фIыуэ зэрытлъагъум шэч лъэпкъ къытедмыхьэжмэ? Хъурейм къызэрилъытэмкIэ, цIыхум и гупсысэм зегъэужьынымкIэ бзэр мыпхуэдэ гъэпсыкIэм тету егъэджыным сэбэпынагъышхуэ къешэ. «Iуэху мыублэм блэ хэсщ», - жиIащ пасэрейм. Абы пэджэжащ «мывэ щылъым» теухуа урысей Iущагъри. «Удын зэхэдзэ нэхърэ - акъыл зэхэдзэ» псэлъафэр ди тегъэщIапIэу, мынэхъыфIу пIэрэт псоми ди зэхуэдэ мы Iуэху щхьэпэр ипэкIэ кIуэтэныр нэхъри щIэдгъэпсынщIамэ? Апхуэдэущ а Iуэхум зэреплъар узэщIакIуэ Хъурей Феликси. ЩIэныпхъэхэр щаубзыху институтым сыт хуэдэ Iуэхугъуэ къиIэтми, Феликс и нэIэм щIигъэтащ, методикэщIэр зэрылажьэм кIэлъыплъу. «ЩIэныгъэ зыбгъэдэлъу убж хъунур ищIэр мащIэу къыщыхъужу сытым дежи еджэрщ», - жеIэ абы дапщэщи. А гупсысэм щапхъэфI хуохъу езым и дуней тетыкIэри. Хъурейм и институтыр илъэс куэдкIэ къекIуэкIащ ЕГЭ-м зыхуэзыгъэхьэзырхэм дэIэпыкъуэгъу щагъуэт IэнатIэу. ЩIэныгъэлIым абы иригъэблагъэрт ди республикэм, хамэ къэралхэм я IэщIагъэлI цIэрыIуэхэр: дохутырхэр, егъэджакIуэхэр, экономистхэр, щIэнгъуазэм, гъуазджэм я лэжьакIуэхэр, нэгъуэщIхэри, лекцэ гъэщIэгъуэнхэм къыщригъаджэу. Апхуэдэу куэдрэ къыщызэригъэпэщащ щIэныгъэ конференцхэр, нэгъуэщI зэхыхьэхэр. Гукъинэжхэм ящыщщ балъкъэр тхакIуэ Залиханов Жанакъаит къызэралъхурэ илъэс 95-рэ зэрырикъум ехьэлIа конференцыр, адыгэ поэзиер зыгъэбжьыфIэ усакIуэ Iэзэ Къаныкъуэ Заринэ и творчествэм теухуа пшыхьыр. Хъурейм и жэрдэмкIэ дунейм къытехьа тхылъыщIэ зыбжанэм я лъэтеувэхэри гъэщIэгъуэну, купщIафIэу екIуэкIащ. Апхуэдэхэщ ХьэщIэлI МуIэзин и тхылъыщIэр, ХьэцIыкIу Раисэрэ Хъурей (Дзыгъур) Лусенэрэ адыгэбзэр методикэщIэм тету джыным хуэгъэпсауэ къыдагъэкIа зэрагъэунэху пособиехэр. Гум ехуэбылIэ псалъэ куэд хужаIащ си къалэмыпэм къыпыкIа зэреджэ-методикэ пособием, «Живи, Слово!» зыфIэсщам. Абы къыщызэщIэскъуэжащ илъэс куэдкIэ сызэлэжьа гъэунэхуныгъэ хьэлэмэтхэр. Псоми гукъинэж ящыхъуащ Хъурей Феликс и IэдакъэщIэкIхэм ящыщу «Альманах размышлений» жыхуиIэм иращIэкIа лъэтеувэ дахэр. Абы кърагъэблэгъат тхакIуэ, усакIуэ, макъамэтх, уэрэджыIакIуэ, щIэныгъэлI куэди. Авторым и гум къитэджыкI, гупсысэ куу зыщIэлъ Iущагъхэм еджэ псори абы зэригъэпIейтейр гурыIуэгъуэт. «Си гум къихьа гупсысэм къысхуидэркъым ар гъэру сIыгъыну. Аращи, тхылъымпIэ напэм сфIокIуэ. Сэри сыту сщIын гупсысэ гъэр, ар цIыхум сэбэп яхуэхъуну сщIэуэ?» - жеIэ Феликс. Зи гугъу тщIа Iуэхугъуэхэм жыджэру хэт, ахэр зылъагъу щIалэхэмрэ хъыджэбзхэмрэ я нэгум ущиплъэкIэ, гукъыдэжым и гъусэу я псэм къыщыуша гуапагъымрэ гурыщIэ дахэхэмрэ зыхыумыщIэу къанэркъым. «Апхуэдиз дахагъэ зыбгъэдэлъ лъэпкъым хуэфащэу дунейм дытетыфыну пIэрэ?» - гупсысэ-упщIэр абыхэм ящыщ дэтхэнэми и псэм къыщыушу къыпщохъу. АбыкIэ фIыщIэшхуэ бгъэдэлъщ лъэпкъым щIэблэ екIу къыщIэтэджэным зэфIих дэтхэнэ Iуэхугъуэри хуигъэпсу, лъэпкъ фIыгъуэхэм я къигъэхъуапIэр нэхъ куу, нэхъ къабзэ, нэхъ лъэщ щIыным хущIэкъуу дунейм тет Хъурей Феликс. ЩОДЖЭН Галинэ, КъБР-м щIыхь зиIэ и егъэджакIуэ.
Поделиться:
Читать также:
02.05.2024 - 14:22 →
Хэкур зыфIэкIуэдам псори фIэкIуэдащ
02.05.2024 - 12:43 →
Джэш хъурейм яужь йохьэ
02.05.2024 - 12:31 →
Зыпэрыт Iуэхум фIыуэ хэзыщIыкI дохутыр
02.05.2024 - 12:28 →
ТхьэкIумэкIыхь зыгъэхъухэм ящIапхъэщ
01.05.2024 - 13:43 →
«ТекIуэныгъэм и диктантым» зрагъэубгъу
|