Совет Союзым и дзэхэр Афганистаным къызэрырашыжрэ илъэс 35-рэ зэрырикъур, къэралым и щIыналъэ псоми хуэдэу, Къэбэрдей-Балъкъэрым щагъэлъапIэ, мыхьэнэшхуэ зиIэ жылагъуэ-политикэ Iуэхуу къалъытэу. Абы теухуа пэкIу щекIуэкIащ Афган зауэм хэкIуэда ди лъахэгъухэм я фэеплъу Налшык къалэм и Дэшхуей хадэм итым деж.
А махуэм мемориалым деж щызэхуэсат КъБР-м и Парламентым и депутатхэр, КъБР-м и Правительствэм хэтхэр, Налшык къалэ администрацэм, КъБР-м и дзэ комиссариатым, жылагъуэ ветеран IэнатIэхэм, дин IуэхущIапIэхэм, КъБР-м и щIалэгъуалэ зэгухьэныгъэхэм я лIыкIуэхэр.
ЦIыхум и хуитыныгъэхэмкIэ уполномоченнэу КъБР-м щыIэ, Афганистан республикэм и дзэ чэнджэщэгъуу щыта Зумакулов Борис пэкIур къыщызэIуихым, къызэхуэсахэм ягу къигъэкIыжащ Iуэхухэр щрагъэкIуэкI мемориалыр къызэрызэрагъэпэща щIыкIэр. Абы къыхигъэщащ Къэбэрдей-Балъкъэрым щыщхэм хэкум деж щаIэ къалэныр щIыхь пылъу зэрагъэзэщIар, нобэ ди щIалэхэр лIыхъужьыгъэ яхэлъу, я гъащIэм емыблэжу украин нацистхэм зэрапэщIэтыр.
- Афганистаным къалэныр щезыхьэкIа советыдзэхэм хэтахэм я лIыгъэмрэ лIыхъужьыгъэмрэ, дунейпсо терроризмэм пэщIэту хэкIуэдахэм я фэеплъым пщIэ хуэтщIын хуейщ, - жиIащ республикэм и дзэ комиссар, подполковник Пахомов Дмитрий.
КъБР-м и Муслъымэнхэм я дин IуэхущIапIэм и унафэщI Дзасэжь Хьэзрэталийрэ Налшык, Псыхуабэ, Черкесск щIыналъэхэм я Благочиннэ Бобылёв Валентинрэ я къалэн ягъэзащIэу Афганистаным щыхэкIуэдахэм тхьэ яхуелъэIуащ.
КъБР-м и Парламентым и депутат, «СВАЛВВК» республикэ жылагъуэ правленэм и тхьэмадэ Тхьэгъэлэдж Тимур жиIащ илъэсибгъурэ мазитIым къриубыдэу советыдзэхэм я къалэн ягъэзащIэу СССР-м и ипщэ гъунапкъэхэр дунейпсо терроризмэм пэщIэту зэрахъумам имызакъуэу, Афганистаным демократие къэрал щаухуэнымкIэ дэIэпыкъуэгъу зэрыхъуар.
– Дэ нобэ догъэлъапIэ зауэлI-интернационалистхэр, дзэ Iуэху хэхам и ветеранхэр, пщIэ яхудощI я унэм къэзымыгъэзэжахэм я фэеплъым, - жиIащ абы.
ЗэIущIэм и кIэухыу фэеплъым деж удз гъэгъахэр щагъэтIылъащ.
Махуэшхуэ зэхыхьэ
Iуэхум зэIущIэ гуапэкIэ пащэу, Къэрал киноконцерт гъэлъэгъуапIэм махуэшхуэ концерт щекIуэкIащ.
Абы ирагъэблэгъат республикэм, жылагъуэ зэгухьэныгъэхэм я унафэщIхэр, Хэку зауэшхуэм, Афганистаным, IэщэкIэ зэщIэузэда нэгъуэщI зэпэщIэувэныгъэхэм я ветеранхэр, я къалэн ягъэзащIэу хэкIуэда зауэлIхэм я анэхэмрэ Iыхьлыхэмрэ.
ЗэIущIэр къызэIуахри, республикэм и Iэтащхьэм и Администрацэм и унафэщI Къуэдзокъуэ Мухьэмэд къеджащ КъБР-м и Iэтащхьэ КIуэкIуэ Казбек къыбгъэдэкI фIэхъусым.
АдэкIэ зи махуэр ягъэлъапIэхэм псалъэ гуапэхэмкIэ зыхуагъэзащ КъБР-м и Парламентым и Президиумым хэт Пащты Борис, республикэм и Правительствэм и УнафэщIым и къуэдзэ Къуэшырокъуэ Залым, КъБР-м лъэпкъ Iуэхухэмрэ жылагъуэ проектхэмкIэ и министр КIурашын Анзор, щэнхабзэмкIэ министрым и къуэдзэ Тау Ритэ, лэжьыгъэмрэ цIыхухэр социальнэу хъумэнымкIэ министр Асанов Алим, егъэджэныгъэмрэ щIэныгъэмкIэ министр Езауэ Анзор сымэ. Афган зауэм хэтахэу зэIущIэм кърагъэблэгъахэм иратащ ЩIыхь тхылъхэр, саугъэтхэр.
Къызэхуэсахэм я нэгу зрагъэужьащ, я гукъыдэжыр къаIэтащ ДыщэкI Артуррэ ЦокIыл Азэмэтрэ ягъэзэщIа уэрэдхэм, апхуэдэуи афганцхэм ехъуэхъуащ «Кабардинка», «Балкария» къэфакIуэ гупхэр.
