Монгол-тэтэрхэм я лъэхъэнэм псэуа, «Шэрджэс-хъан» цIэр зезыхьэу щыта тепщэ гуэрым и хъыбар куэд щIауэ зэхыдох. ГурыIуэгъуэщ ди лъэпкъыцIэ зэрызэрихьэ къудейм ар адыгэ зэримыщIыр. ИтIани, тхыдэ щIэныгъэлIхэмрэ монгол-тэтэрхэр къуэпс къежьапIэ зыхуэхъу лъэпкъхэм я лъахэхутэхэмрэ я деж дызыщымыгъуазэ куэд къыщыдощIэ. Абы и фIыгъэкIэ ди блэкIам и напэкIуэцIхэми еплъыкIэщIэкIэ дыбгъэдыхьэн хуейуэ къыщIокI.
Хэт хъуну Хьэжы-Шэрджэс е Шэрджэс-хъан? Языныкъуэ тхыдэджхэм а цIэр цIыхуитIым зэрахьа хуэдэу хуагъэфащэ, нэхъыбэм - тIури зы цIэм и къэпсэлъыкIэ зэтемыхуэу къалъытэ. Гу зылъытапхъэхэм язщ абыхэм «шэрджэс» псалъэр цIыкIукIэ зытхи къазэрыхэкIыр. Ар тегъэщIапIэ тхуохъу зи гугъу тщIым и цIэ лейр и мылъэпкъ хэсыж дэтхэнэ зыми ейм пагъэувэ хабзэ лъэпкъыцIэу. Хьэжы-Шэрджэсыр е Шэрджэс-хъаныр зы цIыхуу къэтлъытэным дытрегъэгушхуэ ар тIэунейрэ Iуэ Дыщэм (Золотая Ордам) и хъану зэрыщытами. Iэщтырхъан, Астрахань, Хьэжы-Тэрхъан - а цIэхэр зезыхьэ Iуэ Дыщэм и къалэр езым еипэу щытауэ, илъэс зыбжанэкIэ зэрыхъаныгъуэуи и унафэм щIэта хуэдэу зэхыдагъэх 23-нэ хъаным тепсэлъыхьхэм: япэу 1361 - 1369 гъэхэм, етIуанэу: 1369 - 1374 (1375) гъэхэм.
Iуэ Дыщэмрэ адыгэхэмрэ я Iуэху зыIута дыдэр къэзыгъэлъагъуэ тхыдэ лъэужьхэр зэкIэ нэгъэсыпауэ джахэм тхухэбжэнкъым. ИтIани, Псыхуабэ деж щыпсэуа ди лъэпкъэгъухэми КъухьэпIэ Адыгэ Хэкум исахэми монгол-тэтэрхэм пыщIэныгъэ быдэ зэрыхуаIам и тхыдэ щыхьэтхэр мащIэкъым. Сыт и уасэ иужькIэ тепщэ хъуа Iузбэч-хъан ныкъуэкъуэгъухэм ирамыгъэукIын щхьэкIэ, щыцIыкIум «шэрджэсхэм я щIыналъэм» щагъэпщкIуауэ зэрыщытам и закъуэ?!
«Хъаныкъуэр Адыгэ Хэкум щрагъэпIын къыщаубла Атэлыкъ хабзэм и япэ щапхъэм дэ дыщрохьэлIэ Iуэ Дыщэм и къару илъыгъуэм. Иужьрей кърым хъану щыта Шагин-джэрий зэритхыжымкIэ, апхуэдэ насып къызыхуихуар Iуэ Дыщэм и хъан щэджащэ Iузбэчщ: «711 гъэм Тохътэ-хъан и лъэхъэнэм, иужьрейм и къуэш дыдэм и къуэ Iузбэч-хъан адыгэхэм (шэрджэсхэм) ягъэсэну яшауэ щытащ», - етх Хъуэткъуэ Самир. АдэкIэ пещэ: «Шейбанхэм я тхыдэдж Утемиш-хьэжы къеIуэтэж: «Тохътэ-хъаным езым и къуэм тепщэгъуэр лъигъэсын папщIэ, и лъэпкъым хъулъхугъэу исыр щызэтриукIэм, абы и къуэшым и щхьэгъусэ Келин-Байалин и къуэ Iузбэч яукIынкIэ гузавэри, сабийр Шэрджэс къуршхэм гъэпщкIуауэ иригъэшауэ щытащ. ИужькIэ, езыр Тохътэ-хъаным щхьэгъусэу ишэжа нэужь, зи къуэр дунейм ехыжу щIэблэншэу къэна хъаным зыхуиумысащ: «БукIынкIэ сышынэри, щIалэр Шэрджэс щIыналъэм езгъэшат».
Iузбэч-хъаным дыщрохьэлIэ Псыхуабэ зыщызыплъыхь Ибн БэтIутIэ и дежи. ЗыплъыхьакIуэм и гъащIэ гъуэгур зыджа Тимофеев Игорь «Ибн БэтIутIэ» зыфIища и тхылъым дыкъыщоджэ: «1334 гъэм накъыгъэм и 6-м Ибн БэтIутIэ иджыри Къаир щыIэу зи хъыбар зэхиха Iуэ Дыщэм и тепщэ Iузбэч-хъан и хэщIапIэм нэсащ».
Езы Ибн БэтIутIэ зэритхыжымкIэ, Iэпхъуэ зэпыту щыт хъаным и епсыхыпIэр Беш-Даг (и мыхьэнэкIэ - «бгитху») жыхуаIэ щIыпIэм щыIэт, нэгъуэщIу жыпIэмэ, иджырей Псыхуабэ (Пятигорск) деж.
«Мы бгитхум, - жеIэ Ибн БэтIутIэ, - тыркухэм зыщагъэпскI псы пщтыр къыщIэжыпIэхэр щыIэщ… Езыхэм зэрыжаIэмкIэ, апхуэдэ псым зыщызыгъэпскIым уз зи цIэ къеуалIэркъым…»
Iузбэч-хъан и цIэм дыщрохьэлIэ ТIрахъуэ Рэмэзан «Шэрджэсхэр» зыфIища и тхылъми: «Iузбэч-хъан и ныбжьыр илъэс пщыкIущ ирикъуху адыгэхэм я деж щагъэпщкIуу щытащ, адыгэбзи ищIэрт», - жеIэ абы.
АдэкIэ ТIрахъуэр топсэлъыхь ди тхыгъэр зытеухуа Хьэжы-Шэрджэс: «Тэтэр-монголхэм я щыхьэр Сарай «шэрджэс колониехэр» зыфIаща псэупIэхэр дэтт. Хъан сэрейм щызэрахьэ Iуэхухэм адыгэхэр апхуэдизкIэ хэпщIати, Iузбэч-хъан и къуэрылъху Бердыбэч иужькIэ, хъаныгъуэр Шэрджэс-хъан зи цIэ тепщэм лъысауэ щытащ».
Гусев Владимир Iэщтырхъан и тхыдэр пхэнжу къагъэлъагъуэу къыщохъу. Урысейм и тхыдэдж-архив лэжьакIуэхэм я зэгухьэныгъэм хэт щIалэм къызэрилъытэмкIэ, къалэр куэдкIэ нэхъыжьщ ар тхыдэджхэм къызэрагъэлъагъуэм нэхърэ. И Iуэху еплъыкIэр къыщиIуатэ тхыгъэм Хьэжы-Шэрджэс и гугъу щещI: «Iэщтырхъан и гугъу пщIымэ, абы тIэунейрэ и тепщэу щытащ хъан Хьэжы-Шэрджэс (1361 - 1369, 1369 - 1374). А лIым, Iэщтырхъан зэрыдэсым хуэдэурэ, Iуэ Хужьым (Белая Орда) и унафэр зэрихьэу щытащ илъэс 14-кIэ. 1374 гъэм, Хьэжы-Шэрджэс и тетыгъуэм щыгъуэ, «Хьэжы-Тархъан» жиIэу тегъэуауэ ахъшэ традзэу щытащ. А зэманым «Хьэжы-Тэрхъан» щхьэкIэ «Тарджин» жаIэрт. Апхуэдэущ къызэрежьар Хьэжы-Шэрджэс и цIэр зытет домбеякъ ахъшэхэр».
Хьэжы-Шэрджэс монгол-тэтэрхэм хуэдэу Чингис-хъаным къытепщыкIа къуэпсым щыщу зэрыщымытар къыхощ тхыгъэхэм. Горелик Михаил и лэжьыгъэхэми къыджаIэ адыгэхэм IэщэфI зэращIым къыхэкIыу, езыхэми зауэлI лъэрызехьэ къазэрыхэкIым и хьэтыркIэ, ахэр Iуэ Дыщэм хиубыдэ щIыпIэ щхьэхуэхэм щыпсэууэ зэрыщытар. Апхуэдэ гуэрхэм я зым пашэ щыхъуагъэнщ Хьэжы-Шэрджэси.
Ибн Хъалдун и «Тхыдэм» къызэрыхэщымкIэ, адыгэ хъаныр Бердыбэч и зэманым дзэзешэу щытащ. Бердыбэч дунейм ехыжа нэужь, Хьэжы-Шэрджэс иубыдар Iэщтырхъан и закъуэтэкъым, атIэ Iуэ Дыщэм и щыхьэру щыта Сарай къалэри иIыгъащ абы. Зэрыкъэралу зэрызехьэм зэщIиубыдэу, хъанхэр зыр адрейм пэщIэувэжа иужь, Хьэжы-Шэрджэс ныкъуэкъуэгъу къыхуэхъуат Урыс-хъан. Хьэжы-Шэрджэс бзаджагъэ хурикъуащ абы и дзэхэр Iэщтырхъан бгъэдихужыну, ауэ иужькIэ тепщэгъуэр зыубыда Айбэч-хъан езым Сарай къалэр IэщIигъэкIыжауэ щытащ. Хьэжы-Шэрджэс иIыгъа щIыпIэр IупщIу къыхощ урым дунеяплъэ зэкъуэшхэу Пицигани Доминикрэ Францискрэ ящIауэ щыта картэм. Ар хуозэ Индылым (Волгэ) пэмыжыжьэу щыт Саратов къалэм и ипщэ лъэныкъуэхэм.
Сорокин Евгений «Зэрыхьзэриишхуэм хиубыда Iуэ Дыщэм и хъанхэм ятеухуауэ» лэжьыгъэм щыжеIэ: «Хъан Хьэсэн булгъархэм я деж кIуа иужь, абы и пIэ къиуват Iэщтырхъанрэ абы и Iэгъуэблагъэмрэ зи лъапсэу щыта Хьэжы-Шэрджэс, Сарай къалэри иубыдат. Хьэсэн и ахъшэхэр Сарайм щытрадзэн щыщагъэтар 1369 гъэрщ. Абдежым къыщыщIэдзауэ унафэр Хьэжы-Шэрджэс къыIэрохьэ. Ибн Хъалдун зэритхымкIэ: «Хьэжы-Шэрджэс Iэщтырхъан дэкIыжу Сарайм Iэпхъуа иужь, Iуэ ЩIыхум (Синяя Орда) и хъан Урыс-хъан Хорезм щIыналъэм дзэ къриутIыпщыкIри, Iэщтырхъан къригъэувыхьащ. Хьэжы-Шэрджэс езым и дзэзешэхэм яз игъакIуэри, ахэр ирахужьэжащ. Ауэ Айбэч хъан езым къебгъэрыкIуэри, Сарай къалэр трихыжауэ щытащ. Абы иужькIэ езым и лъапсэм, хъанхэм я унафэр зылъэмыIэс Iэщтырхъан дэтIысхьэжри, 1369 - 1380 гъэхэм пщIондэ а щIыпIэр зэрихьащ. ИужькIэ Iэщтырхъан зыIэрыхьар Тохъутэмыщщ».
Хьэжы-Шэрджэс и лъэхъэнэм Iэщтырхъан Iэщыр щыбэгъуауэ зэрыщытам и гугъу ещI ищхьэкIэ зи цIэ къыщитIуа Гусев Владимир: «Хьэжы-Шэрджэс щытета зэманым хуэдэу Iэщтырхъан мэлхэри, бжэнхэри, адрей унагъуэ псэущхьэхэри зэи щыбэгъуакъым. Ахэр кърашырт Кавказ Ищхъэрэми, Кавказ ЩIыбми, Iузэв Iуфэми, хы ФIыцIэ Iуфэми, уеблэмэ Азие Курытми. Езы Iэщтырхъани увыIэгъуэ имыIэу хьэпшыпхэр зезышэ чырэхэр икIыурэ, Iуэ Дыщэм и щыхьэрхэу Сарай-Джэдидымрэ Сарай-Мэхърусумрэ ягъакIуэрт».
Iуэ Дыщэм и тхыдэмкIэ нэхъ IэщIагъэлI цIэрыIуэу къалъытэхэм ящыщщ хьэрып тхыдэтх Ибн Хъалдун, Урысейм щыщ тэтэр тхыдэдж Сафаргалиев Магомет («Iуэ Дыщэр зэрылъэлъэжар»). Адыгэ-шэрджэсхэм я гугъу щащI дэтхэнэ напэкIуэцIми купщIафIэу топсэлъыхь газетеджэхэм егъэцIыхужын хуэмей, Адыгейм щыщ ди лъэпкъэгъу тхыдэ щIэныгъэлI Хъуэткъуэ Самири. А псоми я лэжьыгъэхэр къэдгъэщхьэпащ мы тхыгъэм дыщелэжьым.