Адыгэ Републикэр къызэрызэрагъэпэщрэ илъэси I00 щрикъум ирихьэлIэу адыгэбзэр хъумэным, ар сабий гъэсапIэхэмрэ курыт еджапIэхэмрэ щегъэджыным, егъэджэныгъэ Iуэхур федеральнэ хабзэкIэ щIэгъэбыдэным, анэдэлъхубзэм нэхъыбэ къыдегъэхьэхыным теухуа проект куэд пхагъэкIащ. Абыхэм щытепсэлъыхьащ Адыгейм и Iэтащхьэм деж Адыгэбзэр джынымкIэ щыIэ советым хэтхэм я зэIущIэм.
- Дэ псоми фIыуэ къыдгуроIуэ адыгэбзэр ди республикэм и хъугъуэфIыгъуэ нэхъыщхьэхэм зэращыщыр. Ди бзэм и фIыгъэкIэ хъума хъуащ псэкупсэ лъапIэныгъэхэр, лъэпкъ хабзэхэр, шыфэлIыфэр. АР-м и Iэтащхьэм къалэн нэхъыщхьэу къытхуигъэувхэм ящыщщ адыгэбзэр хъумэнымкIэ Iэмалу щыIэр къэгъэсэбэпыныр, къыдэкIуэтей щIэблэр анэдэлъхубзэм дегъэхьэхынымкIэ лэжьыгъэ егъэкIуэкIыныр, - жиIащ премьер-министр КIэрашэ Анзаур.
АР-м егъэджэныгъэмрэ щIэныгъэмкIэ и министрым и къалэнхэр зыгъэзащIэ Лебедевэ Евгение зэрыжиIамкIэ, 2020 гъэм егъэджэныгъэ программэхэмкIэ федеральнэ реестрым адыгэбзэмрэ литературэмрэ ехьэлIа программи 6 хыхьащ. АР-м и адыгэбзэ тхылъыр иджы япэу яхэхуащ зэрырагъаджэ федеральнэ тхылъхэм. Абы ипкъ иткIэ, Адыгейм грант ахъшэу къыIэрыхьащ сом мелуни 8, абыкIэ къыдагъэкI адыгэбзэмкIэ зэрырагъаджэ-методикэ тхылъхэр. Аргуэру сом мелуан I5-кIэ хагъэхьэну дэфтэр ирагъэхьащ.
Иджыпсту республикэм щызэхалъхьэ адыгэ литературэмкIэ I-II-нэ классхэр зэрырагъаджэ-методикэ тхылъхэр. Район I7-м ит сабий гъэсапIэ I5-м анэдэлъхубзэр щрагъэдж. Псори зэхэту а гъэсапIэхэм йокIуалIэ сабий мини 7,I-рэ.
Гуманитар къэхутэныгъэхэмкIэ Адыгей къэрал щIэныгъэ институтым и къудамэм и унафэщI Анчокъуэ Сурет зэрыжиIамкIэ, Егъэджэныгъэмрэ щIэныгъэмкIэ министерствэмрэ щIэныгъэ-къэхутакIуэ институтымрэ я лэжьакIуэхэм мы Iуэхум и пIалъэр Владикавказ щызэрагъащIэ. Осетие Ищхъэрэ-Аланием щыIэ зы гимназием предметхэм я нэхъыбэр осетиныбзэкIэ щрагъэдж. Сурет къелъытэ езыхэри зытета апхуэдэ Iэмалым хуэкIуэжын хуейуэ. КъищынэмыщIауэ, зэIущIэм щытепсэлъыхьащ адыгэбзэкIэ дерсхэм хухах сыхьэт бжыгъэр школхэм щыхэгъэхъуэн зэрыхуейм.
Адыгэ Республикэм адыгеибзэр зэрыщаджыр щIыналъэ, федеральнэ хабзэм сыткIи йозагъэ. КъищынэмыщIауэ, иджыпсту къэрал къулыкъущIэхэмрэ къулыкъущIапIэхэмрэ социальнэ сетьхэм щаIэ напэкIуэцIхэр адыгэбзэкIи зэрагъэкIуэну хуитыныгъэ яIэ хъуащ.
Гуманитар къэхутэныгъэхэмкIэ Адыгей къэрал щIэныгъэ институтым и унафэщI ЛIэужь Iэдэм 20I9 гъэм къызэрагъэпэщауэ республикэм проект зыбжанэ зэрыщагьэзащIэр ягу къигъэкIыжащ. Адыгэбзэмрэ литературэмрэ хъума хъун папщIэ, щIалэгъуалэр дихьэхын щхьэкIэ къызэрагъэпэща «Адыгленд» лъэпкъыбзэ лагерыр Адыгэ къэрал университетым епхауэ мэлажьэ.
КъищынэмыщIауэ, «Пщащэ, щIалэ нэхъ цIыкIу дыдэхэм папщIэ гущэкъу уэрэдхэр» проектым йолэжь, сабий псысэ нэхъ цIэрыIуэхэр адыгэбзэкIэ зэрадзэкI, уеблэмэ телефоным адыгэбзэкIэ псалъэ гуэдзэн хуащIыну я мурадщ.
Адыгэбзэмрэ литературэмрэ хъума хъун папщIэ и гуащIэ къихьу хилъхьэфым тепсэлъыхьащ Адыгей Хасэм и тхьэмадэ ЛIымыщэкъуэ Рэмэзан. Хасэм и жэрдэмкIэ, жылагъуэ лэжьакIуэр, Хасэм хэт нэхъыжьхэр яхуэзащ щIалэгъуалэм, школхэм щIэс ныбжьыщIэхэм, абыхэм я адэ-анэхэм, егъэджакIуэхэм, гъэсакIуэхэм. Апхуэдэуи Осетие Ищхъэрэм анэдэлъхубзэр хъума хъун папщIэ ЮНЕСКО-м ирищIылIа зэгурыIуэныгъэм зыщагъэгъуэзащ. Апхуэдэу Хасэм адыгэбзэм и Iуэхум нэхъыбэ къыхэша хъун щхьэкIэ, Iуэрытххэр къызэрегъэпэщ. Абы хэтщ республикэм исхэм я мызакъуэу, хамэ къэралхэм щыпсэу ди лъэпкъэгъухэри. ЦIыхухэм онлайну диктант ирагъэтх.
ДяпэкIэ Адыгейм и къулыкъущIапIэхэм бзитIкIэ зэрагъэкIуэнущ социальнэ сетьхэм щаIэ напэкIуэцIхэр, ютуб-каналым адыгэбзэкIэ нэтын нэхъыбэ къралъхьэнущ, пэжырытхэм епха псалъалъэхэр къыдагъэкIынущ, адыгэбзэкIэ тха тхыгъэхэм щыуагъэ къыхэзыгъэкI гуэдзэн хуащIынущ.
