Нэщхъеягъуэ инт къэхъуар

Жэпуэгъуэм и 13 - 14 махуэхэм Къэбэрдей-Балъкъэрым фэ­еплъ Iуэхухэр щрагъэкIуэкI илъэс пщыкIубл хъуауэ. Нобэ республикэм и дэнэ щIыпIи ягу къыщагъэкIыж террористхэр Налшык къыщытеуам насыпыншагъэу ди цIыхухэм къыхуахьар, мамыр псэукIэр къызэтракъутэну зэрыхэтар, унагъуэ куэд ­гуауэм зэрыхадзар. Ауэ щIэпхъаджащIэхэм, зылI и быну, щхьэмыгъазэу япэщIэуват республикэм и хабзэхъумэ IэнатIэхэм я лэжьакIуэхэр. ЛIыгъэ зэрахьэу, я псэ емыблэжу, икIи зэман кIэщIым къриубыдэу абыхэм яхузэфIэкIат цIыхуукIхэр къагъэувыIэн, щIыналъэр зыхадзэнкIэ хъуну щыта гузэвэ­гъуэшхуэм кърагъэлын, зэшзэзауэ кърагъэжьар ягъэуп­щIыIужын. 

Фигу къэдгъэкIыжынщи, 2005 гъэм жэпуэгъуэм и 13-м Налшык къалэ къытеуауэ щытащ боевик 300-м нэблагъэ. Абыхэм яхэтащ гъапцIагъэкIэ а гупым зыхашахэри, я щIалагъэкIэ я акъыл хунэмысу, ирагъэщIэну Iуэхугъуэхэм щымагъуэзэххэу щIэпхъаджащIэхэм къахэхутахэри. 
Террорист щIэпхъаджагъэ зезыхьэну мурад зыщIахэр абы щыгъуэ зэуэ ятеуауэ щытащ республикэм и хабзэхъумэ IэнатIэхэм я хэщIапIэхэм, IэщэкIэ зэщIэузэда къарухэм я къэрал IуэхущIапIэхэм, абыхэм я лэжьакIуэхэм, военкоматым, кхъухьлъатэ телъэтыкIыпIэм, нэгъуэщIхэми – псори зэхэту объект 18-м. 
Нобэ узэплъэкIыжрэ а махуэхэр уи нэгу къыщIэбгъэхьэжмэ, ипэжыпIэкIэ, гузэвэгъуэт къэхъуар. ЩIэпхъаджащIэхэм я мурадыр къайхъулIауэ щытамэ, дэ къуэш зэзауэрэ гуауэкIэ гъэнщIа гъащIэрэт къытпэплъэр. Ахэр зыхущIэкъуар республикэм щыIэ властыр трагъэкIуэту, езыхэм я хабзэхэр щIыналъэм щагъэувыну, зы къупхъэм псори драгъэувэу, кIыфIыгъэм дыхашэжыну арат. Ауэ къайхъулIакъым икIи ди цIыхубэр щыхъума хъуащ а ­гузавэгъуэм, абыхэм япэщIэта лIыхъужьхэм я фIыгъэкIэ. 
Апхуэдэ гуауэ дяпэкIэ къэмыхъун щхьэкIэ къытщIэхъуэ щIэблэм ядэлэжьэн, фIымрэ емрэ зэхащIыкIыу ахэр гъэсэн хуейщ. КъызыхэкIа лъэпкъыр фIыуэ зылъагъум, адэ-анэм я жаIэ щIэтым, Iуэху бзаджэ илэжьынукъым. Жэпуэгъуэм и 13-м къэхъуахэм хуэдэхэм ди щIыналъэм къыщытрагъэзэжынукъым, Iэпэдэгъэлэл тщIыуэ ди щIэблэм датемыплъэкъукIыу щытмэ, абыхэм я гъащIэм къыщекIуэкI Iуэхугъуэхэм зыщыдгъэгъуазэ зэпытмэ, ар зыгъэгуфIэм, зыгъэнэщхъейм хэтщIыкIмэ. Зыщыдгъэгъупщэ ­хъунукъым сом лей хуэпшийкIэ, машинэ, щыгъын лъапIэ сыт-хуэдэхэр къыхуэпщэхукIэ сабийм и гъэсэныгъэр абдежым зэры­щызэфIэмыкIыр. Адыгэм ауэ жиIакъым - гъэсэныгъэр дыщэ жыгщ. ЖыгыщIэ хэпсам узэрегугъум елъытащ абы зэрызиужьынур, къарууэ тебгъэкIуадэм хуэкIуэщ къыпыпхыжынури. 
Ди республикэр щыхупIэм хуэзышэну хэтахэм япэщIэта, ди мамыр псэукIэр тхуэзыхъума лIыхъужьхэм зэрахьа хахуагъэм къытщIэхъуэ щIэблэр щIэпIыкIын хуейщ.