«Адыгэбзэр сыт щIэдджынур,
Здынэсыр КъалэкIыхьырщ», -
Ар ауану Iэджэм жаIэр,
Мышыу псалъэм тIэкIу хэчыхьу.
ЩызэхэсхкIэ сэ а псалъэр
А гушыIэр сигу темыхуэ.
Станцым нэскIэ унигъэсмэ,
Ар бзэм дежкIэ уфIэмащIэ? ...
КIыщокъуэ Алим и «Гъуэгу къежьапIэ» усэм щыщ мы сатырхэр си гум илъ зэпытщ. Уи анэдэлъхубзэр зумыпэсмэ, зумыгъащIэмэ, укъэзылъхуа уи анэр, укъызыхэкIа уи лъэпкъыр фIыуэ умылъагъуу аракъэ абы къикIыр? НтIэ, апхуэдэхэр сэ сфIэтхьэмыщкIэщ.
Къалэм сыкъыщыхъуами, сыкъэзыцIыхухэм ягъэщIагъуэу, адыгэбзэмкIэ егъэджакIуэу сылэжьэну сыхъуапсэу, КъБКъУ-м и адыгэбзэ къудамэм илъэсихкIэ сыщеджащ. ИкIи къызэхъулIащ си хъуэпсапIэр. ЕджапIэ нэхъыщхьэр къэзухри фIыуэ слъагъу, сыщеджа си школым адыгэбзэмкIэ егъэджакIуэу згъэзэжауэ сыщолажьэ илъэс ещанэ хъуауэ. СрогуфIэ икIи срогушхуэ абы.
СызэрыцIыкIурэ си анэдэлъхубзэр фIыуэ слъагъурт, сыдихьэхырт. Бзэм ехьэлIа зэпеуэхэми зыри блэзмыгъэкIыу сыхэтт икIи япэ увыпIэхэр къыщысхьырт. Сехъуапсэрт си бзэр фIыуэ зэзгъащIэу ар адрейхэми нэхъыфIу езгъэлъагъуным, къалэдэс сабийхэр абы дезгъэхьэхыу я анэдэлъхубзэмкIэ хуиту псалъэу езгъэсэным.
Университетым сыщыщIэсым егъэджакIуэу сиIа Къардэн Мусадин къысхуигъэфэщауэ щытащ адыгэбзэ зэзыгъащIэ сабийхэм папщIэ ягъэхьэзырауэ щыта «Кавказ Ищхъэрэм и щIэныгъэ лэжьакIуэ ныбжьыщIэхэм я инновацэ проектхэр» зэпеуэм сыхэтыну. СфIэфIу, си гуапэу абыи иужь сихьащ. ЕхъулIэныгъэхэри дыщиIауэ щытащ а Iуэхум: щIыналъэпсо зэпеуэм етIуанэ увыпIэр къыщысхьат, фIыщIэ тхылъи къытхуагъэфэщат. Иджыпстуи сыхэтщ апхуэдэ Iуэхухэм. Псалъэм папщIэ, ди школым къыщызэзгъэпэщауэ гуащэ театр гупжьей щызогъэлажьэ. Абы сабийхэр яфIэфIу къокIуалIэ. ГуащэхэмкIэ джэгуурэ адыгэбзэкIэ зопсалъэ. Езы цIыкIухэми ягу ирихьащи, нэхъыбэрэ дерсым щIэсыну гукъыдэж яIэщ. Зэпеуэхэр едгъэкIуэкIати, абыи дыщытекIуащ. ЦIыкIухэри абы тригъэгушхуащ икIи нэхъ псынщIэу бзэр зэрызрагъэщIэным хущIокъу.
Си щIэныгъэм адэкIи хэзгъэхъуэну сыщIохъуэпсри, Iэмал сиIэху, сокIуэ егъэджакIуэхэм я зэфIэкIым щыхагъахъуэ курсхэм. Апхуэдэ еджэныгъэ сызыхэтахэр хуабжьу щхьэпэ схуэхъуащ. Курсхэм щызэхэсха, щыгъуазэ сызыхуэхъуа Iуэху бгъэдыхьэкIэ пэрытхэм ящыщ куэд, зэзгъэгъуэта щIэныгъэщIэхэр иужькIэ си лэжьыгъэм къыщызгъэсэбэпащ, дэIэпыкъуэгъуи къысхуэхъуащ. Апхуэдэу гукъыдэж сиIэу сыхэтщ бзэмкIэ ди щIыпIэм щекIуэкI щIэныгъэ-практикэ семинархэм, сфIэфIщ лъэпкъ радиом садэлэжьэн.
Сабийхэм бзэр нэхъ тыншу зэрызрагъэщIэн Iэмал куэд щыIэщ мы зэманым, ар дапхуэдэу щытынуми езыхэм къыхахыну хуитыныгъи яIэщ. Сэри дяпэкIи схузэфIэкIымкIэ абыхэм садэIэпыкъунущ я анэдэлъхубзэр фIыуэ ялъагъуу, ар нэхъ куууэ яджыным хущIэкъуу, гъащIэм щащымыгъупщэу къадекIуэкIыфын папщIэ. ЗэрытщIэщи, къыбдалъхуа бзэм нэхърэ нэхъ IэфIу щыIэр ар къыпIурызылъхьа анэм и закъуэщ.