ЗэрытщIэщи, лъэпкъым къыдэгъуэгурыкIуэ IэщIагъэхэр нэхъ зи пщэрылъу щытар цIыхубзырщ. Унагъуэм къихъуа хъыджэбзыр зыхуамыгъасэ, зыхуамыгъэIущ щыIэу щытакъым. Адыгэ унагъуэм къихъуа цIыхупсэр IэфIу пщафIэрт, дзапэ уэрэдкIи благъэхэр игъэгуфIэрт, мэлэчыпхъухэм я хъарыби зэIуищэрт. ЗыхуэмыIэзэ щымыIэу къагъэхъу дахэр и чэзум щынэсым езым бгъэдэлъ фIымкIэ гуашэрт. Нобэ си псэлъэгъу хъыджэбзыр и зэфIэкIкIэ, и Iуэху зехьэкIэкIэ «Адыгэ псалъэ» газетым и щIэджыкIакIуэхэм къыддогуашэ. Ар Щоджэн Лианэ Арсен и пхъурщ. Малкэ къуажэм къыщалъхуа пщащэм и цIэр фIыкIэ жыжьэ Iуащ. Абы и уагъэ, дыщэидэ лэжьыгъэхэр ехъулIэныгъэ лъагэ яIэу щагъэлъэгъуащ ди къэралми хамэ щIыпIэхэми.
- Лианэ, газет щIэджыкIакIуэхэм нэхъ гъунэгъуу закъебгъэцIыхуамэ, ди гуапэт?
- КIэщIу жысIэмэ, сэ сыегъэджакIуэщ, сысурэтыщIщ, сымодельерщ, сызыхэIэбэ, си Iэпэ къызыпекIуэкI дэтхэнэми адыгэ нэщэнэ зэрыхэслъхьэным сыхущIэкъуу сопсэу. Малкэ къуажэм сыкъыщалъхуащ. Лъэпкъ-кIэ Щоджэнхэ сащыщщ. Жы-лэм дэт курыт еджапIэр къэзуха нэужь, сыщIэтIысхьащ КъБКъУ-м и педагогикэ факультетым. Пэжу, си гуращэу, сызыщIэхъуэпсу щытар журналист-хэр щагъэхьэзыр факультетыр арат, ауэ а зэманым ди университетым апхуэдэ къудамэ иджыри къызэригъэпэщатэкъым. Хамэ щIыпIэ сыкIуэу сыщеджэну сигу къэкIыртэкъым, сыту жыпIэмэ адэ-анэр къэзгъанэу жыжьэ сыкIуэфынутэкъым. Езыхэри сызыщIэтIысхьа факультетымкIэ мыарэзыуэ щытти, нэгъуэщI псалъэмакъкIэ сапихьэртэкъым.
Урысыбзэр фIыуэ зэрысщIэм щыгъуазэ, «Горянка» газетым и редактор нэхъыщхьэ Къаныкъуэ Заринэ и жэрдэмкIэ илъэс зыбжанэкIэ цIыхухэм садэгуэшащ модэм ехьэлIауэ сиIэ Iуэху еплъыкIэхэмкIэ. Тхэныр апхуэдизкIэ сигу ирихьырти, журналистхэр щагъэхьэзыр факультетым сыкIуэну сытегушхуащ мызэ-мытIэу, ар къызэIуаха нэужь. Ауэ сыщеджэ къудамэм и унафэщI Дым Елдаррэ кафедрэр зи IэмыщIэ илъ Къаныкъуэ ФатIи- мэрэ сыкъызэтрагъэувыIащ. Нобэр къыздэсым зи чэнджэщкIэ къысхуэгуапэ, сытым дежи зыкъысщIэзыгъакъуэ Къаныкъуэм сыхуэарэзыщ. ИлъэсиплI хъуауэ Промышленность псынщIэмкIэ Налшык дэт колледжым студентхэм IэщIагъэ щрагъэгъуэт еджапIэм дыщэидэм щыхузогъаджэ, щыхузогъасэ. Сэ зэи хэдыкIым сызыIэпишэну, абыкIэ лэжьыгъэ гъэщIэгъуэнхэр къэзгупсысыну си гугъакъым. Дыкъэзыухъу- реихь дунейм, щIыуэпсым ятеухуа сурэтхэр сщIыуэ сыпсэун си гугъащ, ауэ…
- Сыт апхуэдизу уи гъащIэм къыщыхъуар, узыщIэхъупсам и кIуапIэр нэгъуэщI лъэныкъуэкIэ щхьэ пхъуэжа?
- СызыщIэс еджапIэм къигъэув къалэнхэм ящыщ зыт илъэс къэс уэ езым бдыжа, къэбгупсысыжа фэилъхьэгъуэхэр утыку щыбгъэлъэгъуэныр. Адрейхэм илъэсым и кIуэцIкIэ зэ гъэлъэгъуэныгъэ ирагъэкIуэ-кIмэ, сэ тIэунейрэ згъэлъагъуэ хъуащ. Щыгъынхэр адыгэ уагъэкIэ, тхыпхъэкIэ згъэщIэращIэу щIэздзащ. Си жагъуэ зэрыхъущи, дыщэидэм, хэдыкIым куууэ ды хурагъэджакъым еджапIэм, сэ езыр Адыгейм сыкIуэурэ зезгъэсэжауэ аращ. КъызэхъулIэу къэзбжащ хэдыкIыр, ауэ къыжыIапхъэщ си лэжьыгъэхэр адрейхэм зэремыщхьыр. Сэ нэхъыбэу сызэлэжьыр фэращ. Тхыпхъэ тызощIыхь, уагъэкIэ согъэщIэращIэ. Къэзгупсысхэм я нэхъыбэр унэкIуэцIхэм я блынджабэхэр зэрыбгъэщIэращIэ хъунхэщ.
- СызэрыщыгъуазэмкIэ, Лиа-нэ, уи япэ ехъулIэныгъэр Москва къыщожьэрт уэ, бжьыпэ увыпIэри абы къыщыпхуагъэфэщащ.
- Пэж дыдэщ. УагъэкIэ зэIущауэ сщIа лэжьыгъэм Москва увыпIэ нэхъыщхьэр къыщратащ. Абы иужькIэ нэхъри ситхьэ- къуащ дыщэидэм, фэм елэжьыным, уагъэ щIыным. Си псэм щыщ зыхэслъхьа лэжьыгъэхэр 2019 гъэм Налшык щызгъэлъэгъуащ. СщIэхэмкIэ, злэжьхэмкIэ нэгъэсауэ сыарэзыуэ щыткъым, Iэмал зэриIэкIэрэ си щIэныгъэм зэрыхэзгъэхъуэным сыхущIокъу.
Ар си мураду Москва сыкIуэ-ри, абы аспирантурэр къыщызухыжащ. Си егъэджакIуэу щытар дуней псом къыщацIыху, модэм и тхыдэдж Васильев Александрщ. «Мода и стиль» лъэныкъуэмкIэ сиIэ щIэныгъэр нэхъри щезгъэфIэкIуащ абы и деж. Васильевым и арэзыныгъэкIэ сэ сагъэкIуауэ щытащ телевиденэм и япэ каналым къигъэлъагъуэ «Модный приговор» нэтыным. Модельерхэм, дизайнерхэм садэщIыгъуу сылэжьащ, мызэ-мытIэуи си лэжьыгъэхэр утыку кърахьащ. Модэм фIыуэ хэзыщIыкI, журналист, тхакIуэ, артист куэдым щапхъэгъэлъагъуэу яIэ Хромченкэ Эвелинэ и лекцэхэми сыщIэсащ. Абы жиIа, зытепсэлъыхьа куэдыр нобэми къызогъэсэбэп. Ауэ сигу имыкIыж Iуэхугъуэу щытщ Васильев Александр си хэдыкIым папщIэ жиIахэр, ар абы зэригъэлъэпIар. Си хэдыкIыр тыгъэ хуэсщIат Васильевым, ауэ ар сIихакъым. «Апхуэдиз зэманрэ къарурэ зытебгъэкIуэда лэжьыгъэр ауэ къасщтэу си унэ схьыфыну-къым. КъищынэмыщIауэ, мыпхуэдиз дахагъэр къызэрысщэ-хун, абы пэувыфын сом сиIэкъым икIи апхуэдэ мылъкуи щыIэкъым», - жиIащ абы.
- Ар куэд и уасэщ, Лианэ, дуней псом пщIэрэ щIыхьрэ щызиIэ цIыхум гулъытэ лъагэ уи IэдакъэщIэкIым къыхуищIыныр… Апхуэдизу ягъэлъапIэу, уасэншэу къалъытэ уи лэжьыгъэхэр дэнэ щIыпIэ щыбгъэлъэгъуа?
- Си гъэлъэгъуэныгъэхэр, мастер-классхэр мызэ-мытIэу щекIуэкIащ ди щIыналъэм, Ингушым, Адыгейм, Осетие Ищхъэрэ-Аланием, Чехием, Тыркум. СурэтыщIхэм я дунейпсо зэгухьэныгъэм иригъэкIуэкI гъэлъэгъуэныгъэхэм куэдрэ сашэ.
Гулъытэ гуапэ щызогъуэт сыщалъхуа щIыналъэми. Телевиденэм нэтынхэр щагъэхьэзыр си творчествэм теухуауэ, зэIущIэ зэмылIэужьыгъуэхэм срагъэблагъэ. Иджыблагъэ, Урысей щIалэгъуалэм я махуэр щагъэлъапIэм, КъБР-м и Iэтащхьэ КIуэкIуэ Казбек зыIущIа гупым сахэтащ. Абы псалъэ къыщызатати, си хъуэпсапIэу щыт, сызытелажьэ проектыр къызэхъулIэну, абыкIэ щIэгъэкъуэн сиIэ- ну сызэригуапэр жысIащ. КIуэкIуэ Казбек хуэзгъэхьэзыра тыгъэри IэщIэслъхьащ - дыщэидэу щIауэ КIуэкIуэ лъэпкъым я дамыгъэр.
- Зи гугъу пщIы проектым къытхутепсэлъыхьыт, Лианэ.
- Ар щIалэгъуалэр щызэIущIэ, щызэдэлажьэ утыку къызэзгъэпэщынырщ. СыщIохъуэпс абы лъэпкъым къыдэгъуэгурыкIуа IэщIагъэхэмкIэ гъэзэщIа хъуа лэжьыгъэхэр наIуэу цIыхухэм я пащхьэ щыдгъэлъэгъуэну. КъищынэмыщIауэ, ди блэкIам ижь зыщIихуауэ нобэм дахагъэ хуэхъуауэ ар фащэ ирехъу, арджэну е уагъэкIэ зэIуща хьэпшыпу щрырет, пщIэ, гулъытэ нэс хуащIыну сыхуейт. Ди республикэм и унафэщIым зи гугъу сщIам теухуауэ стха лэжьыгъэм зэрыщыгъуазэри къыхигъэщащи, абы гугъэшхуэ сегъэщI си мурадыр къызэхъулIэнымкIэ. Сыхуейщ дэтхэнэ си зы студентми дыщэидэу хидыкIымрэ IэпхъуамбэкIэ зэIуищэмрэ уагъэ хьэлэмэту къызэрыкIыу, хъарыбэу ищIым налъэ-налъэу щызэрихъэм гукъыдэж дигъуэту псэуну.
- Уи мурадыфIхэр къохъулIэну си гуапэщ, Лианэ. Адыгэ унагъуэм щапIа, адыгэ хабзэр зи бзыпхъэ, блэкIам пщIэ хуэзыщI, къэкIуэну гъащIэм зи лэжьыгъэкIэ хуэтыгъэ уэ пхуэдэхэращ щIалэгъуалэм щапхъэ екIу яхуэхъур. Уи Iэдакъэ къыщIэкI хьэпшыпхэм дахагъэ куэд цIыхухэм халъагъуэу щытынри сфIэмахуэщ!