УзэзгъэдэIуэнури? Уэлэхьи, мырам узэзгъэдэIуэнур… ПщIэрэ, Гуащэпэж, сэ сытха… Ардыдэри сыт, ауэ сэ сащыщщ тхэныр хьэл мыгъуэ зыхуэхъуахэм. АбыкIи Тхьэм и ней зыщыхуахэм. Насып сиIамэ, адыгэм зыуи кърамыдзэ апхуэдэ IэщIагъэ-делагъэр си натIэ хъунтэкъым сэ. Ауэ уи натIэ къритхамэ, сыт пщIэн?.. (Ди зэхуэдэ гущIагъщIэлъ щэхущ, уэлэхьи, гъуджэ къысхуэIэт зэрыхъурэ соплъэри, а тхыгъэм и лъэужь лъэпкъ мы си натIэм тезмылъэгъуа сэ, ауэ зэгуэрым шейтIаныр къыстекIуэщ, лажьэ зимыIэ тхылъымпIэхэм сащхьэщытIысхьэри, сытхэм-сытхэм, сытхэм-сытхэурэ… Иджы, мис, псоми ди унэхъугъуэти, хьэл мыгъуэ схуэхъуауэ, сыкъэувыIэжыфыркъым)… А тхэныр мыхъуамэ, сытым хуэдиз къулыкъу си насып къихьынкIэ хъунут сэ, езыхэр тхъапIэ защIэрэ щIэныгъэ лъэпкъ ущIиIэни щымыIэу!..
Хъыджэбзу абы сфIигъэкIуэдам я гугъу тщIынкъым. Ахэр адэ, адэ, адэ къыщынащ. Сахуэзэн хуейуэ сызыхуэмыза дахащэхэр. (Усэ тхыным сыхущIигъэхьа?!) Сапылъын хуейуэ сызыпымылъа тхьэIухудхэр. (Комедие тхыным дыкъыдэхуа?!) Ба зыхуэдмыщIу къэна Iупэ бырыб цIыкIуищэхэр. (Трагедие тхыным гукъыдэж къытхуигъэна?!)
Др-р-р-р-р, тхьэмыщкIэжь, иумыгъэлейуэ увыIэж, ахъумэ уи ныбжь къемызэгъын гуэр халъэгъуэнщ а жыпIэхэми, япэрауэ, «лIыжь нэмысыншэ» къыпфIащынщ, етIуанэрауэ, «Адыгэ спискIэм» уратхъыкIыжынщ а спискэр зыIыгъ зи гугъэжу зи тэмакъым гушыIэ тIуалэ щIэмыхуэхэм… Сытми, жыпIэнуракъэ, куэдым, куэд дыдэм сыхигъэнащ сэ а тхэным…
Пэжщ, сэ сыкъулейщ. Хуабжьу сыкъулейщ… гугъэ нэпцIхэмкIэ. Ауэ, Iуэхушхуэ мыгъуэракъэ, гугъэ нэпцIхэм жэмыкуи, кхъуейжьапхъи, тхьэмщIыгъуныби, лы гъур гъэжьаи къахэпщIыкI хъуркъым. (Сэ сытым хуэдэу сфIэфI ахэр!). Гугъэ нэпцIхэр уи фызым тенджэдыгу хуэпщI хъуркъым. Гугъэ нэпцIым уитIысхьэрэ и бжэр къебдзылIэжу «пIиииипI!» жыпIэу ущIэпхъуэж хъуркъым. Гугъэ нэпцIхэр сбербанкхэм, комбанкхэм иплъхьэ хъуркъым. Иджырей Цезархэм я уардэунэхэм хуэдэ гугъэ нэпцIхэм къахэпщIыкI хъуркъым… Гугъэ нэпцI иIэщ, жаIэу укъаубыду депутату ухахынукъым, къулыкъущIэ уащIынукъым, президенту укъагъэлъэгъуэнукъым…
Дауи, ахэр тхакIуэм гугъапIэрэ хъуэпсапIэу иIэхэм я нэхъ ин дыдэкъым, (арикI куэдым я фIэщ тхуэмыщI ди пэжхэм ящыщщ дэ, Гуащэпэж), ауэ, уи фIэщ зэрыхъун, си ахърэт хьэщIэ, а гугъэ нэпцI инышхуэхэм я щхьэкъэракъэм ухущхьэрэ ущатэу апхуэдизрэ утесынри мытынш. Абы щыгъуэми, ныдэмыпщеяхэр, ныдэпщеиным хуэщхьэхахэр, апхуэдэ лъагапIэм къыхуимыгъэщIахэр модэкIэ, и лъабжьэмкIэ, зэрыщытхъэжыр плъагъуу. Уи Iуэху зэрымыщIагъуэр ахэми ялъагъурэ, ныпхудэдыхьэшхейхэу. ЗыкъыпхузэкIэщIашхэу. Хъурымэбжьэрымейуэ къащхьэщихыр а узытес лъагапIэм нэс нызэрыдэхьейуэ. ЛIыгъэм зебгъэхьурэ епкъухыну ухэт щхьэкIэ, уи гурыIупсыр «тIымпIэ-сымпIэ» жиIэу а уи гугъэ нэпцI лъагэжьхэм къеткIухыу…
Чэнджэщ гъущэкIэ псапэ къэпхь хъуну щытмэ, а мурадыр сиIэу сэ захузогъазэ тхэным гу хуэзыщIу зи гъащIэ гъуэгур а Iуэхум хуэзыунэтIахэм: флъэкIыххэнумэ, фымытхэ, хъарыпхэ. КъыфхупабжыкIа зэман тIэкIур шакъэкIэ фымыуцIэпI…
Ауэ фи натIэ къритхамэ, е, сэ схуэдэу, щIалагъэ-делагъэкIэ къыщIэвдзэу хьэл мыгъуэ фхуэхъуамэ, − Алыхьым къыфтрилъхьауэ аращи, сыт мыгъуэр фщIэн, − фытхэ! Узытетхыхьын мащIэ: фыдэтхей, фыкъетхых, фыкIуэцIрытхыкI, фыкъыкIуэцIрытхыкIыж… Тхьэ имыIуамэ, зэгуэр зыгуэрым фыкъигъэувыIэжынщ.
Фейдэшхуэ къыпыкIыу фызэрытхэн Iэмалыр фымыщIэмэ, – вжызоIэ: иджырей Цезархэр тхьэпэлъытэ зэрыфщIыным зы хьэрфкIэ фытемыкI…
ТхакIуэ IэщIагъэр зыкъомкIэ ещхьщ афияныр нэрыгъ пхуэхъуным, ар хьэл мыгъуэ зыхуэхъуар къэзыгъэувыIэжыфыну щыIэри уэ зы закъуэрщ, Гуащэпэж. Аращ сэ уэ фIыщэу ущIэслъагъур. Уэращ сэ псэхугъуэ къызэзытыфыну щыIэр. Псэхугъуэ нэс!..
Къалэм сыкъэзыужэгъуар сIэщIэпхынщ, тхылъымпIэ сызыхуэмышэчыжыр пшыхьыжынщ, мис а зи гугъу пхуэсщIа щIалэгъуэм сыкъибгъэхутэжынщ, къауцыпIэ щабэр къысхуэбухуэнщи-и-и… уэрэд цIыкIу гуэрым зэрыхэтым ещхьу, «итIанэ плъэкIмэ»…
Ауэ зэкIэ, мис: си пIэ лъапэм укъытесрэ нащхьэ къысхуэпщIу аркъудейщ.
Ей, а уи нащхьэри уэ а уи нащхьэр! Нобэр къыздэсым зыри IэщIэкIыфакъым.
