Автомобилистым и махуэр зэдагъэлъапIэ автотранспортым пыщIа псоми: гъуэгуанэ зэмылIэужьыгъуэхэм цIыху къыщезышэкIхэм, машинэхэр зэзыгъэпэщыжхэм, автозаводхэм щылажьэхэм, мыхэм хухэха еджапIэхэм, нэгъуэщIхэми. Мы махуэм епхауэ къалэн нэхъыщхьэу къалъытэр къэралым и экономикэм дежкIэ автотранспортым мыхьэнэ ин зэриIэр къэгъэлъэгъуэнымрэ абы ирилажьэхэм гулъытэ хэха хуэщIынымрэщ.
И къежьэкIэр
1980 гъэм СССР-м къыщащтащ «Автомобилистым и махуэ» зыфIащар. Ар ирырагъэхьэлIащ жэпуэгъуэм и иужьрей тхьэмахуэ махуэм.
КIэлъыкIуэу, 1996 гъэм, а Iуэхугъуэр «Автомобиль транспортымрэ гъуэгу хозяйствэмрэ я лэжьакIуэхэм я махуэу» зэрахъуэкIащ. АрщхьэкIэ, илъэс бжыгъэ фIэкIа дамыгъэкIыу, автомобилистхэмрэ гъуэгуухуэхэмрэ я IуэхущIафэхэр зэрызэщхьэщыкIыр къалъытэри, а тIуми махуэ зырыз хухахащ. ИкIи, УФ-м и Президентым 2000 гъэм гъатхэпэм и 23-м къыдигъэкIа унафэм ипкъ иткIэ, Гъуэгу хозяйствэм и лэжьакIуэхэм я махуэр жэпуэгъуэм и ещанэ, автомомобилым дихьэххэм ейр – иужьрей тхьэмахуэ махуэхэм трагъэхуащ. Ауэ щыхъукIи, 2022 гъэм Автомобилистым и махуэр жэпуэгъуэм и 30-м ирохьэлIэ. Ар мы гъэм ди къэралым 46-нэу щагъэлъапIэ.
ЩрагъэфIакIуэ зэпытщ
Дызэрыщыгъуазэщи, Урысей Федерацэм «ФIагъ лъагэ зиIэ гъуэгу шынагъуэншэхэр» лъэпкъ проектыр 20I8 гъэм къыщащтащ. Ар хуэгъэзащ ди къэралым гъуэгу хозяйствэм нэхъри зыщегъэужьыным.
УФ-м и щIыналъэхэм ящыщу 83-м лэжьыгъэ щхьэпэхэр мы лъэхъэнэми щокIуэкI. Зы махуэм къриубыдэу, ику иту, гъуэгущIэу километри 5-м нэблагъэ къыщызэIуах, километр 75-р щызэрагъэпэщыж, IэнатIэм епха IуэхущIапIэхэм я бжыгъэр, псори зэхэту, мини 3-м нызэрохьэс, абыхэм цIыху мин 750-м нэблагъэ щолажьэ. Къэдгъэлъагъуэмэ, ахэр автомобиль зекIуапIэщIэхэр зыукъуэдий, жьы хъуахэр зэзыгъэзэхуэж ухуакIуэхэрщ, инженерхэрщ, гъуэгухэм я проектхэр зэхэзыгъэувэхэрщ, ирахьэлIапхъэхэр къыщIэзыгъэкIхэрщ.
Гъуэгур экономикэм и Iыхьэ нэхъыщхьэ дыдэхэм ящыщщ. А IэнатIэм зегъэужьыным Къэбэрдей-Балъкъэрми мыхьэнэ ин щыхуащI. Ди республикэм Транспортымрэ гъуэгу хозяйствэмкIэ и министерствэм мы зэманым и нэIэ тригъэтщ цIыхур къезышэкI автомобиль IуэхущIапIэу I9-м, автовокзалрэ автостанцу 7-м, гъущI гъуэгу станцрэ вокзалу 6-м, кхъухьлъэтапIэм, троллейбусхэр зи IэмыщIэ илъ IэнатIэм. Абыхэм, псори зэхэту, цIыху мини 3-м щIигъу щолажьэ.
Гъуэгу лэжьыгъэхэмкIэ я къалэныр зэрагъэзащIэм къыдэкIуэу, а IэнатIэм и къудамэхэр бжьыхьэ-щIымахуэ пIалъэм зэрыхуэхьэзырыр къапщытэ, щIыналъэ мыхьэнэ зиIэ автомобиль гъуэгуу километр миниплIым нэблагъэр зехьэныр икIи зэгъэпэщыжыныр зэкIэлъыхьауэ къызэрагъэпэщ, а Iуэхухэр зэрызэфIахым кIэлъоплъ.
Автомобилистым и махуэм языныкъуэ къалэхэм авто-зекIуэхэр къыщызэрагъэпэщ, жармыкIэу щызэхашэхэм транспорт лIэужьыгъуэщIэу къежьахэр щагъэлъагъуэ икIи щащэ.
