Спортсмен цIэрыIуэм и фэеплъу

3 мая, 2024 - 14:48
Къэрэшей-Шэрджэсым и Лъэпкъ Зэхуэсым и депутату щыта, самбэмкIэ дуней псом и чемпион Къуныжь Мухьэмэд и фэеплъ зэхьэзэхуэ иджыблагъэ Черкесск къалэм щекIуэкIащ. Ар къызэрыхах зэпеуэу щытащ икIи абы хэтащ Кавказ Ищхъэрэмрэ Урысей Ипщэмрэ я бэнакIуэу 200-м нэблагъэ, я ныбжькIэ илъэс 16-м щIимыгъуауэ.
Къэбэрдей-Балъкъэрым и цIэкIэ зэхьэзэхуэм щыбэна Къудей Беслъэн килограмм 49-рэ хъухэм я деж дыщэ медаль къыщихьащ. Абы зымащIэкIэ къакIэрыхуащ Джэданэ Къантемыррэ (кг 46-рэ), Къанщауэ Темырланрэ (кг 53-рэ). Абыхэм зэхьэзэхуэм и домбеякъ медалхэр зыIэрагъэхьащ. 
Командэр зэхьэзэхуэм хуэзыгъэхьэзырар ПшынащIэ Муратрэ Къарэмышэ СулътIанрэщ. 
Зэхьэзэхуэм щытекIуахэр хэтынущ Урысейм самбэмкIэ пашэныгъэр къыщыхьыным хуэунэтIауэ мы гъэм мэкъуауэгъуэм Кемеровэ къалэм щекIуэкIыну зэпеуэм.
АЛЫДЖЫКЪУЭ Руслан.
  • 35 просмотров
Поделиться: