Медалибгъу Санкт-Петербург кърахащ

Дзюдо

Санкт-Петербург и «М-1 Арена» спорт комплексым иджыблагъэ щекIуэкIащ Хэку зауэшхуэм и зэманым Ленинград къэухъуреихьыныгъэм къызэрикIрэ илъэс 79-рэ щрикъум хуэгъэзауэ къызэрагъэпэща спорт зэхьэзэхуэр.

Зэпеуэхэр къызэрагъэпэщат алыдж-урым бэнэкIэмкIэ, бэнэкIэ хуитымкIэ, самбэ, дзюдо, джиу-джитсу спорт лIэужьыгъуэхэмкIэ. Абыхэм я зэфIэкI щагъэлъэгъуащ илъэс 12 - 16 зи ныбжь, Урысейм и щIыналъэ 20-м икIа спортсмен 1000-м нэблагъэ.

Зи гугъу тщIы зэпеуэм хэтащ КъБР-м щыщхэри - Ныр Сеф и цIэр зезыхьэ спорт школым и гъэсэнхэр. Абыхэм зыIэрагъэхьащ дыщэ медалу 5, дыжьыну 1, домбеякъыу 3.

ТекIуэныгъэ къахьащ Атабиев Тамерлан (кг 50), Байрамкулов Алим (кг 55-рэ), Уэзы Iэдэм (кг 60), Къущхьэ Тамерлан (кг 66-рэ), Беслъэней Дамир (кг 90). Дыжьыныр зыIэригъэхьащ килограмм 66-рэ зи хьэлъагъхэм я деж утыку къыщихьа Абдулаевэ Салимэ.

Ещанэ увыпIэр яубыдахэщ Бер Руслан, (кг 60), Дудар Дамир (кг 55-рэ), Дер Айдамыр (кг 73-рэ) сымэ.

ЕхъулIэныгъэ къэзыгъэлъэгъуа ныбжьыщIэхэр я гъэсэнщ Иванов Дмитрий, Апхудэ Анзор, Дзухэ Беслъэнрэ Залымджэрийрэ.