Кулиев Къайсын и цIэр зезыхьэ Балъкъэр къэрал драмэ театрым иджыблагъэ щекIуэкIащ Къэбэрдей-Балъкъэрым и цIыхубэ тхакIуэ, КъБР-м щэнхабзэмкIэ щIыхь зиIэ и лэжьакIуэ Моттаевэ Светланэ къызэралъхурэ илъэс бжыгъэ дахэ зэрырикъум траухуа пшыхь.
Куэд щыгъуазэщ Моттаевэр бзэ зыбжанэкIэ зэрытхэм, ар журналист Iэзэу, тхакIуэу, зэдзэкIакIуэу, литературэ критикыу зэрыщытым. Светланэ Урысейм и Журналистхэм, ТхакIуэхэм я зэгухьэныгъэхэм, Журналистхэм я Дунейпсо федерацэм хэтщ.
Моттаевэм и тхыгъэхэр щIэх-щIэхыурэ къытрадзэ республикэм къыщыдэкI газетхэмрэ журналхэмрэ, ар телерадионэтынхэм къыщагъэпсалъэ, жыпIэнуракъэ, республикэм и жылагъуэ-щэнхабзэ гъащIэм жыджэру хэтщ.
- Светланэ нэхъыфIу фэзгъэцIыхун папщIэ абы и гъащIэм щыщ Iыхьэ гуэрхэр нывжесIэжыну сыхуейт, - жиIащ КъБР-м щэнхабзэмкIэ и министр Къумахуэ Мухьэдин зэIущIэм и пэщIэдзэм. - Журналист IэкIуэлъакIуэ, усакIуэ Iэзэ, цIыхугъэ зыхэлъ Моттаевэ Светланэ япэгъунэгъущ икIи къацIыху тхылъыр фIыуэ зылъагъу, цIыхубэ макъамэхэм едаIуэ, театрхэм екIуалIэ, нэхъ кIэщу жыпIэмэ, къэзыухъуреихь дунейм тет дахагъэ псоми гу лъызытэ дэтхэнэми ар и нэIуасэщ. УсакIуэу ущытыныр насыпщ, ауэ щыхъукIи, ар къаруушхуэ пIызых, жэуаплыныгъэ ин зыпылъ IэщIагъэщ. Сыт щхьэкIэ жыпIэмэ, усакIуэхэм я псалъэм къаруушхуэ яIэщ, аращ ар лIэщIыгъуэхэми щIыпхыIукIыфыр, - жиIащ министрым.
АдэкIэ Къумахуэм къызэхуэсахэм ягу къигъэкIыжащ усакIуэ бзылъхугъэм и гъащIэ гъуэгуанэр.
Светланэ Балъкъэр Ипщэ къуажэм щIэныгъэ зиIэ унагъуэм халъхуащ. Абы и анэм педагогикэ техникумыр къиухат, уеблэмэ ар ящыщт япэ парашютистхэм. Светланэ и унагъуэри яхэтащ хэкум ирахуахэм. Адэжь щIыналъэм къигъэзэжа иужь, 1957 гъэм, ар щIэтIысхьащ Къэрэшей-Шэрджэс пединститутым, ещанэ курсым щIэсу КъБКъУ-м и филологие факультетым зыкъригъэдзыжри, ар къиухащ. 1962 гъэм Шэрэдж щIыналъэм ит курыт еджапIэхэм я инспектору Моттаевэм лэжьэн щIидзат. ИтIанэ Жэмтхьэлэ дэт школым и унафэщIым и къуэдзэу, Шэрэдж щIыналъэм и лэжьакIуэ щIалэгъуалэм я школым и унафэщIу щытащ. 1965 гъэм телевиденэм ирагъэблагъэри, щIалэгъуалэ, сабий нэтынхэм я редактору лэжьащ. Абы яужь Моттаевэм и гуащIэ хилъхьащ «Эльбрус» тхылъ тедзапIэм. 2003 гъэм щыщIэдзауэ ар щолажьэ «Кабардино-Балкарская правда» газетым.
КъБР-м и Парламентым къыбгъэдэкI хъуэхъу тхыгъэм пшыхьым къыщеджащ абы и унафэщIым и къуэдзэ Жанатаев Сэлим.
- Сэри си лэжьэгъухэми къабгъэдэкIыу сынохъуэхъуну сыхуейщ. Уи мурад псори къохъулIэну, иджыри илъэс куэдкIэ узыншэу утхуэлэжьэну ди гуапэщ, - жиIащ абы.
Моттаевэм хъуэхъукIэ зыхуигъэзащ Дунейпсо Адыгэ Хасэм и тхьэмадэ Сэхъурокъуэ Хьэутий. Абы жиIащ, Моттаевэм и лъэпкъым и гъусэу гъуэгуанэ гугъу къызэрикIуам емылъытауэ, псэ къабзэ, дуней еплъыкIэ дахэ иIэу къызэрынар.
Моттаевэ Светланэ хуэгъэпса пшыхьым къыщыпсэлъащ тхыдэдж, Урысейм и Журналистхэм, ТхакIуэхэм я зэгухьэныгъэхэм хэт Бейтыгъуэн Сэфарбий, «Горянка» газетым и редактор нэхъыщхьэ, усакIуэ, драматург Къаныкъуэ Заринэ, филологие щIэныгъэхэмкIэ доктор Биттировэ Тамарэ, «Кабардино-Балкарская правда» газетым и редактор нэхъыщхьэ Бжьахъуэ Ранетэ сымэ, нэгъуэщIхэри.
Светланэ и IэдакъэщIэкI усэхэм пшыхьым къыщеджащ артистхэу Моттаев Тимур, Созаев Ильяс, Джаппуевэ Лейлэ, Бауаевэ Iэминэ сымэ. Абы и усэхэр зи лъабжьэ уэрэдхэр ягъэзэщIащ «Иоканто» уэрэджыIакIуэ гупым, Музыкэ театрым и уэрэджыIакIуэ Габуевэ Зухра сымэ.
Пшыхьым зыкърезыгъэхьэлIахэм я гукъыдэжыр къаIэтащ «Кабардинка», «Балкария», «Терские казаки» къэфакIуэ гупхэм.
Сурэтхэр Къарей Элинэ трихащ.