ЩIымахуэ шылэр икIыху

Налшык къалэ администрацэм гъуэгу хозяйствэмрэ къалэр зэIузэпэщ щIынымкIэ и Дапартаментымрэ подряднэ организацэхэмрэ я IэщIагъэлIхэр шылэр икIыху гъуэгухэм хуэбэлэрыгъынукъым.

Коммунальнэ IуэхущIапIэхэм я лэжьакIуэхэмрэ спецтехникэхэмрэ пщэдджыжьым жьыуэ я къалэнхэм пэрохьэ: тещтыкIауэ нэху къекIа гъуэгухэм пшахъуэ, шыгъу тракIутэ, лъэс зекIуапIэхэм зэкIэ я гугъу ящIыркъым, шэджагъуэ нэужьхэм хуэзэу мащIэу къызэрыпсыIэм къыхэкIыу.

Мы махуэхэм дунейм и щытыкIэм зэрызихъуэжым елъытауэ, абыхэм къадэIэпыкъунущ КъБР-м Транспортымрэ гъуэгу хозяйствэмкIэ и министерствэри «Горзеленхоз» IуэхущIапIэри. Гъуэгухэм ямызакъуэу, ахэр кIэлъыплъынущ фэтэр зэтетхэм я унащхьэхэм ирищIэкI Iумылхэми. Куэдрэ къохъу къэтIэсхъа мылыр зэуэ къехуэхыу, лъэс зекIуапIэхэм я курыкупсэм къыщытехуэ. Апхуэдэхэм нэхъ ущрохьэлIэ лъэс зекIуапIэхэр унэхэм бгъурытыпэу здрикIуэ Хъураным, ПащIэм, Лермонтовым, КIыщокъуэм я уэрамхэм.

Коммунальщикхэм апхуэдэу я нэIэ тетщ лъэс зекIуапIэхэм (скверхэм) щызэблэкI гъуэгу цIыкIухэм, щIымахуэ пщэдджыжьхэм жьы къабзэкIэ бэуэну хуейхэм тыншу къыщакIухьын хуэдэу. Ипэ ита илъэсхэм къащхьэщыкIыу, дыгъэгъазэм дытехьэху жыгхэм мыхъейуэ япыта пщIащэхэм я нэхъыбэр, уэсыр зэуэ къатесэри, щIиуфащ. Дыгъэ кIапэ къызэрыкъуэкIыу ахэри мащIэ - мащIэурэ къыхагъэкъэбзыкI, гъатхэм жыг щIагъхэр къабзэу техьэн хуэдэу.