Хэкур фIыуэ лъагъуным хуаущий

Налшык къалэм и полицейхэм къалэ школхэм щеджэхэм лIыгъэм и дерсхэр драгъэкIуэкI. Мурад нэхъыщхьэр хэкупсэу щы­тыныр, адрейхэм щапхъэ яхуэхъуныр яхэпщэнырщ. 

Урысей МВД-м и управленэу Налшык щыIэм полицэм и къудамэ №2-м балигъ мыхъуахэм я IуэхухэмкIэ и инспектор, полицэм и майорхэу Мэкъушэ Расмиерэ Къэмбэчокъуэ Лянэрэ лIыгъэм и дерс къыщызэрагъэпэщащ рес­публикэм и къалащхьэм дэт курыт еджапIэ №21-м. Абы кърихьэлIащ иджыпсту екIуэкI зауэ Iуэхухэм хэтахэу КIыщ Тимур, Ширяев Андрей, Гергиев Аслъэн сымэ, «Дзэ зэкъуэшыныгъэ» урысейпсо ве­теран зэгу­хьэныгъэм и щIыналъэ къудамэм и унафэщI Гелястанов Барэсбий. 
Совет Союзымрэ Урысеймрэ я лIыхъужьхэу зи къалэн зыгъэзащIэу хэкIуэдахэм я фэеплъым пщIэ хуащIу дакъикъэкIэ щымащ къы­зэхуэсахэр. 
ХьэщIэхэр школакIуэхэм ядэгуэшащ я гукъэкIыжхэмкIэ, яхутеп­сэлъыхьащ сэлэтым и щытыкIэ-зыIыгъыкIэхэу дзэ къулыкъум ехьэ­лIа гугъуехьхэм пэзыгъэ­лъэ­щ­хэм, къулыкъур къадезыхьэкIахэм къагъэлъэгъуа лIыхъужьыгъэм и щапхъэ куэд къахьащ. 
- ШколакIуэ ныбжьыщIэхэм ялъэ­гъуащ, зыхащIащ лIыхъужь­хэр я гъунэгъуу зэрыпсэур, хахуа­гъэр, Хэкур фIыуэ лъагъуныр - ахэр цIыху нэсым и фIагъыу зэ­рыщытыр, - къыхагъэщащ Iуэхум и къызэгъэпэщакIуэхэм. 
ЗэIущIэм и кIэухыу хьэщIэхэм ныбжьыщIэхэм жраIащ ехъулIэ­ныгъэхэр яIэну, спортым хэтыну икIи узыншэу псэуну зэрагуапэр, нэхъыжьхэм пщIэ хуащIыну, я Хэкур фIыуэ ялъагъуну къыхураджащ.