Сом мелуани 22-м щIигъу

Урысейм и Социальнэ фондым и къудамэу Къэбэрдей-Балъкъэрым щыIэм мы илъэсыр къызэрихьэрэ   медицинэ IуэхущIапIэхэм Iэрагъэхьащ сом мелуан 22-рэ мин 865-рэ  уэндэгъугъэмрэ сабий къазэрыхэхъуамрэ пэкIуэу сертификатхэмк1э  хуащIа Iуэхутхьэбзэхэм папщIэ. 

Сертификатыр уэндэгъу цIыхубзыр зи нэIэм щIэтыну медицинэ IуэхущIапIэр къыхихыну Iэмал къезыт дэфтэрщ. Электроннэ сертификатыр дохутырхэм ягъэхьэзыр цIыхубзыр щыпсэу щIыпIэм епха поликлиникэм зыкIэлъигъэплъыну япэу щекIуэлIам деж. Сертификатыр а IэнатIэм къызэIуимыхамэ, ар лъхуапIэм щыхузэрагъэпэщынущ. Апхуэдэуи сертификатыр итхыфынущ сабийм къыщыкIэлъыплъыну поликлиникэм.
ОСФР-м и къудамэу КъБР-м щыIэм и пресс-IуэхущIапIэм дызэрыщигъэгъуэзамкIэ, нэхъапэм цIыхубзым езым сертификат бланкыр медицинэ IуэхущIапIэм иритын хуейт. Иджы апхуэдэ гугъуехь хэтыжкъым, цIыхубзым теухуауэ фондыр Iэмал имыIэу зыхуеинухэр занщIэу Iэрохьэри. Къапщтэмэ, ахэр теухуащ цIыхубзыр поликлиникэм учётым зэрыщагъэувам, апхуэдэуи, лъхуэныр тэмэму зэрызэфIэкIамрэ сабийр япэ илъэсым я нэIэм щIэтыным пыщIа Iуэхутхьэбзэхэр зэрызэфIахамрэ. 
Электроннэ щытыкIэм зэрыхуэкIуам медицинэ лэжьакIуэхэми ящигъэпсынщIащ дэфтэрыр тхыныр, цIыхубзхэм ящхьэщихащ Iэмал имыIэу тхылъымпIэ бланкыр къыздехьэкIынымрэ хуей щыхъум деж ар зыхуэфащэ IуэхущIапIэхэм егъэлъагъунымрэ. 

                                                                          ГъуэгупщIэ ямыту  

Къэбэрдей-Балъкъэрым щыпсэухэу федеральнэ льготэ зиIэхэм  зыщригъэIэзэну щIыпIэм гъуэгупщIэ щIамыту мафIэгукIэ кIуэнымкIэ 2022 гъэм электроннэ билет 2082-рэ ягъэхьэзыращ. 
 Апхуэдэ хуитыныгъэр цIыху 610-м къагъэсэбэпащ санаторэм кIуэну, цIыху 1472-м – технологие лъагэхэр къыщагъэсэбэп медицинэ дэIэпыкъуныгъэ къыщратыну щIыпIэм нэсын папщIэ.
УФ-м и Социальнэ фондым и къудамэу КъБР-м щыIэм социальнэ программэхэмкIэ и эксперт нэхъыщхьэ Абазэ Мадинэ щыгъуазэ дызэрищIамкIэ, льготэ билетхэм ехьэлIауэ цIыхухэм къагъэсэбэп хъунущ электроннэ талонхэр. Абы щхьэкIэ КъБР-м Узыншагъэр хъумэнымкIэ и министерствэм (Налшык къалэ, КIыщокъуэм и цIэр зезыхьэ уэрам, 100) къыщеIыпхын хуейщ направленэрэ талон №2-мрэ. АдэкIэ, ахэр и лъабжьэу фондым и къудамэм, Арманд Инессэ и цIэр зезыхьэ уэрам, №5-м щыIэм, электроннэ талон щебгъэтхын хуейщ.
Льготэ зиIэм теухуа хъыбарыр занщIэу Iэрыхьэнущ «Урысей гъущI гъуэгухэр» ОАО транспорт IуэхущIапIэм. ПщIэншэу узэрызекIуэну дэфтэрыр РЖД-м и кассэхэм къыщеIыпхыфынущ, паспортымрэ ныкъуэдыкъуагъэ узэриIэмкIэ тхылъымрэ ебгъэлъагъумэ, е интернеткIэ - абы щхьэкIэ rzd.ru сайтым е «РЖД пассажирам»  гуэдзэным зыщебгъэтхын, уздэкIуэну щIыпIэр, ущежьэну зэманыр, вагонымрэ тIысыпIэмрэ къыхэпхын хуейщ. Социальнэ фондым и льготэкIэ билетыр къэпщтэну къыпхуигъэлъагъуэмэ, электроннэ талоным и номерыр, паспортым ехьэлIахэмрэ СНИЛС-мрэ къыщыбгъэлъэгъуэн хуейщ.