IэпэIэсэ

Гугъуэт-Иуан Бэллэ IэпэIэ-сэщ. Эпоксид сагъызым къы­хещIыкI хьэпшып цIыкIуфэкIу гъэщIэгъуэнхэр. Абы нэмыщI, къэлътмакъ зэрыхъахэр и IэдакъэщIэкIщ. IэпэIэсэным хуе­джакъым, атIэ езыр-езыру зы­хуи­гъэсэжащ. Пэжщ, абыкIэ куэ­ду сэбэп къыхуэхъуащ щы­цIыкIум и анэшхуитIым зы­хуагъэсауэ щытахэр. 

АнэшхуитIым
садэплъейрт

Си анэшхуитIри IэпэIэсэхэт, ­сы­тми хуэIэкIуэлъакIуэу. Си адэм­кIэ си анэшхуэм сызэ­ры­цIыкIурэ сыбгъэдэсащ. Куэ­дым сыхуигъэсащ, игъащIэкIэ си гум изубыда Iущагъ куэд къыз­-жиIащ. И Iэм дыщэ къыпощ, жыхуаIэм хуэдэт: цы зэрихъэрт, дэрт, хидыкIырт, шхыIэн-щхьэнтэхэри хуэщIырт. Си анэмкIэ си анэшхуэм и дей хьэщIапIэ сыкIуэрти, абыи сигъасэрт: цы зэрихъэрт, хидыкIырт. Сэ иджыри школым сыкIуатэкъым, си гуа­щэм фэилъхьэгъуэхэр щы­хузэ­рыс­хъэм щыгъуэ. Си анэ шып­хъухэри   адэ шыпхъухэри ­дэ­­­фырт. Абыхэми зыкъомкIэ ­са­­дэплъеящ. Ауэ а псом си Iэ- ­пэ­хэр еса пэтми,  хьэпшып ­щIэ­­щыгъуэ гуэрхэр зэIусщэу, нэ­хъы­бэм зезгъасэу, сызыIэпишэу сы­зэрелэжьрэ илъэс зыбжанэ хъууэ аращ. 
Коронавирус уз зэрыцIалэр къы­щыхъеям щыгъуэ, унэм пIалъэкIэ дыщIиубыдат. ЗыгуэркIэ зытезгъэун хуей хъуати, си Iэ­пэхэр зэсар къэсщтащ. СщIыну сызыхуейр къыхэсха нэужь, интернетым абы теухуауэ илъхэр щIэспщытыкIащ, мастер-клас­схэм сыкIэлъыплъащ. Егъэ­леяуэ сызыIэпишати, иджыри нэхъ щIэщыгъуэ, нэхъ дахэ гуэрхэр сщIыну сыпабгъэрт.
 
Дахагъэм узыIэпешэ

Япэ дыдэу сщIащ IункIыбзэ- хэр зыфIалъхьэ цIыкIухэр. Си анэм и лэжьапIэм здезгъэхьри, щIэхыу ящэхуащ, иджыри хуей щыIэуи къыщIэкIащ. ИтIанэ ­ручкэ гъэщIэрэщIа щIыным зеспщытащ. Мис ар къызэгу­гъуэкIащ, ауэ зи ужь сихьар зэзмыгъэхъулIэуи хъунутэкъым. Ручкэм и шакъэр иухмэ, нэ­гъуэщIкIэ зэпхъуэкI хъууэ щIын хуейт, армыхъумэ зымащIэкIэ уритхэу хыфIэбдзэжынумэ, мы­хьэнэ иIэтэкъым. Илъэс ныкъуэ хуэдизынкIэ къэслъыхъуащ абы и Iэмалыр. Иджы апхуэдэ къалэмхэр куэдым сагъэщI, цIы­кIу­хэм яфIэгъэщIэ­гъуэнщ. АтIэ ­фIы­къэ уи цIэр тетхауэ ручкэ да-хэ зепхьэну. Класс псом е гуп­жьейхэм зэщхьу яIэн папщIэ куэду щызагъэщI щыIэщ. Къалэм дэт тыкуэн зыбжанэм щIэлъщ си IэдакъэщIэкIхэр.

Хьэпшыпхэр къызыхэсщIыкIыр

Ручкэхэр, брелокхэр, мажьэ­хэр, сурэт игъэувапIэхэр, блокнот­телъхьэхэр, тхьэгъухэр, пщэрылъ­хэр, Iэпщэхъухэр, нэгъуэщI цIы­кIу­фэкIухэри къыхызощIыкI ­эпоксид сагъыз жыхуаIэм. Сагъызыр зыIэрыбгъэхьэныр гугъуу къыщIэкIащ, республикэм зэры­щымыIэм къыхэкIыу. Ауэ абыи ­Iэмал иIэщ - «Озон», «Валдберис» интернет-сату щIыпIэхэмкIэ къызогъэхь. Ауэ ари зэ къебгъэхьу узыхуейм хуэдэу къыпхущIэмыкIынкIэ хъунущ. Ахэр лIэу­жьыгъуэ зыбжанэу зэщхьэщокI. КъыхэпщIыкIым елъытауэ, уи хьэпшыпым нэхъ езэгъынур бгъэунэхуу укъытеувыIэн хуейщ. И зэхэщIэкIэми нэсу зыщыбгъэгъуэзэн хуейщ. Сыту жыпIэмэ, ткIуаткIуэр щызэхэпщIэкIэ хэплъ­хьэхэр къыупщын хуейщ. Эпоксид сагъызым и щхьэхуэныгъэ­хэмрэ и зэхэщIэкIэмрэ ятеухуа тхыгъэ щхьэхуэхэм седжащ, интернетымкIэ зэрызагъасэ роликхэм сыщеплъащ. 

ЖармыкIэхэр,
гъэлъэгъуэныгъэхэр

«Дея» сату щIыпIэм деж Iэпэ­Iэ­сэхэм я IэдакъэщIэкIхэр щагъэ­лъагъуэ жармыкIэ щрагъэкIуэкI хабзэщи, абы зрызогъэхьэлIэ, си хьэпшыпхэр щызощэ. Абхъаз утыкум хьэпшыпхэм я гъэлъэ­гъуэныгъэ къыщызэрагъэ­пэщ­мэ, абыи си IэрыкIхэр сохь. Куэд дэмыкIыу Налшык щекIуэкIынущ удз гъэгъахэм я фестиваль - ари сфIэгъэщIэгъуэнщ, сыхэтынущ. 

Къэлътмакъхэр

Къэлътмакъ сщIыхэм хуэдэ ­нэхъ здэщыIэр Бразилиеращ. Абыи интернеткIэ зезгъэсащ, тынш дыдэуи къызэхъулIащ, ­дэн-зэрыхъэнхэм сызэры­хуэIэи­жьым и фIыгъэкIэ. Нэхъ сызэ­лIэлIар интернетым илъ ролик хуэдэхэм хамэбзэкIэ кIэщIэтхахэм къарыкIхэр къэзгъуэтынырщ. 
Япэ дыдэу къэлътмакъ хуэс­щIащ си анэм. Иджыри къэс зэрыз-тIурытIурэ къыщIэуп­щIэ­хэм яхуэсщIауэ аращ. Иджы коллекцэ согъэхьэзыр, тыкуэным щIэслъхьэну си гугъэщи. Си къэлътмакъхэм хуэдэ республикэм щыIэкъым, цIыхухэм щIа­гъуэу яцIыхуркъым иджыри, и модэр къэсакъым, нэгъуэщIу жы­­пIэмэ. ЗыщIэхэм, зигу ды­хьэхэм сагъэщI, щырыщ-плIы­рыплIу зыIэрызыгъэхьи яхэтщ. 
Иужьу интернетым сыщрихьэ­лIащ удз гъэгъахэр хэзу хэщIы­хьауэ зы къэлътмакъ гъэщIэ­гъуэн. Абы и щIыкIэм зезгъэсэнущ Iэмал имыIэу. 

Сызыхуеджар

Къэбэрдей-Балъкъэр къэрал университетым географием сы­щыхуеджащ. Школым дыщы­щIэсым ар сфIэфIт икIи хэс­щIыкIырт. Университетми сыдихьэхыу сыщеджащ. Ауэ срилэ­жьакъым а IэщIагъэм. ЕджапIэ нэхъыщхьэр къыщызухым щы­гъуэ, стажировкэ дагъэкIуат Налшык дэт школхэм ящыщ зым. ЩIэ гуэр къащIэну ехъуапсэу си гугъэу сызыхыхьа школакIуэхэр еджэну хуэмейуэ къысщыхъуащ, телефонхэр нэхъ я щIэщыгъуэт. А Iуэхугъуэм сIэпиудащ си гукъыдэжыр. 
СщIэркъым, сызыхуеджам зэгуэр срилэжьэнкIи хъунщ. Си ­гуащэр схуохъуапсэ, школым егъэ­джакIуэу сигъэкIуэну - езыр илъэс куэдкIэ егъэджакIуащи, и гур абыкIэ щыIэщ.

Сабиигъуэр

Сабиигъуэм епха си гукъэ­кIыжхэр хуабэщ. Иджырей цIы­кIухэм ялъагъуркъым дэ диIа сабиигъуэм хуэдэ. Дэ дунейр зэ­рыдахэр къытфIэIуэхут, хадэм дихьэн тфIэфIт, дунейр щыуэ­фIым деж пщIантIэм дыщыджэгурт, ди адэ-анэм дадэIэпыкъурт, ди нэхъыжьхэм я чэнджэщхэр къытлъысырт. 
СыщыцIыкIум сехъуапсэу щытащ сурэт щIыным сыхуеджэну. Сыдехьэх абы иджыри, зритезгъэууэ сщIын сфIэфIщ, къызо­хъулIэ. Теплъэ гуэр си нэгу къыщIэзгъэхьэурэ схуэщIыркъым, ауэ слъэгъуар сощIыжыф. 
Тхылъхэм ящыщу сызэ­ры­цIыкIурэ седжэн сфIэфIщ детективхэм. Киноуи аращ сызэп­лъыр. НэхъыфI дыдэу солъагъу Кристи Агатэ. Абы и тхылъ куэду диIэт. 

Таурыхъищ

Си анэшхуэм хъыбар гъэщIэ­гъуэн куэд къызжиIэжу щытащ. И щIалэгъуэр зэрекIуэкIам, хабзэу яхэлъахэм, я IуэхущIафэу, къагъэсэбэпу щыта Iэмэпсымэхэм - куэдым, куэдым я гугъу къыс­хуищIырт. Сэри апхуэдэ хъыбархэмкIэ зызгъэнщIыртэкъым. 
Таурыхъищ зэпымыууэ къыз­жи­Iэжырт сыщыцIыкIум. Абы щыгъуэ ахэр зэрызмытхар сигу къоуэж. СощIэж таурыхъхэр зы­теухуар, ауэ зэгъэкIуауэ нанэ зэ­рыжиIэжу щытам хуэдэу хъума хъуамэ фIыт.
ГУГЪУЭТ  Заремэ.