Псалъэмакъ щхьэпэ

Къэрал кIуэцI IуэхухэмкIэ министру КъБР-м щыIэ, полицэм и генерал-лейтенант Павлов Василий Урысей МВД-м и Краснодар университетым и Кавказ Ищхъэрэ институтым щезыгъаджэхэмрэ курсантхэмрэ ядригъэкIуэкIащ «Нэхъыщхьэм теухуа псалъэмакъхэр» дерс щхьэпэ. 

Министрым гулъытэншэ ищIакъым щIалэгъуалэр хэкупсэу гъэсэным ехьэлIахэри. Къэрал кIуэцI IуэхухэмкIэ ор­ганхэм я лэжьакIуэ зи щIалэгъуэхэр абы къыхуриджащ я ­къалэнымрэ тхьэрыIуэмрэ хуэпэжыну, я Хэкур фIыуэ ялъа­гъуну икIи яхъумэну. 
Павлов Василий зэпкърыхауэ къытеувыIащ унагъуэ лъапIэныгъэхэм. Ахэрщ цIыхур гъэсэным я лъабжьэ нэхъыщ- хьэр. 
- Унагъуэр, абы и лъапIэныгъэхэр сыт щыгъуи дэтхэнэ жылагъуэми и лъабжьэ нэхъыщхьэщ. Я щэнхабзэм емылъытауэ, сабийхэр унагъуэхэм къыщалъху, щагъасэ, къыдэкIуэтейуэрэ нэхъыжьхэм я зэфIэкIымрэ хабзэмрэ зыхалъхьэу, я лъэпкъым я лIыкIуэ нэс хъууэ. Iыхьлыхэм гулъытэ яхуэщIыныр, дзыхь егъэ­зыныр, фIыуэ лъагъуныр, цIыху пэжу щытыныр, гупым яде­кIуэкIыныр икIи жылагъуэм и сэбэп зыхэлъыр япэ игъэщы­- ныр унагъуэрщ щызыхэтлъхьэр,- къыхигъэщащ Павлов Василий. 
Министрым институтым и лэжьакIуэхэм фIыщIэ яхуищIащ хабзэхъумэхэр егъэджэнымрэ я IэщIагъэм хагъэхъуэнымрэ хэлъхьэныгъэшхуэ зэрахуищIым папщIэ. ЕджапIэ нэхъыщ-хьэм и унафэщI, полицэм и полковник Щхьэгъэпсо Заурбий Павлов Василий иригъэкIуэкIа дерс купщIафIэм папщIэ псалъэ гуапэхэр жриIащ. 
 А махуэм институтым щыIащ Налшык къалэм дэт, Совет ­Союзым и ЛIыхъужь Калюжный Николай и цIэр зезыхьэ СОШ №7-м полицэм щиIэ кадет классым щIэсхэр. Абыхэм зыщ­рагъэплъыхьащ хэщIапIэм, спорт залым, хабзэхъумэ IэщIагъэм хэ­хауэ зыщыхуагъэхьэзыр классым, нэщанэуапIэм, апхуэдэуи кадетхэм институтым и музейм щалъэгъуащ гъэщIэгъуэн ящыхъуа тхыдэ экспонатхэр.
АдэкIэ кадетхэм къапэплъэрт IэфIыкIэхэр зытелъ Iэнэ.  Шей зэдефэу здэщысым ахэр зэдэгуэшащ ялъэгъуахэмкIэ икIи полицей IэщIагъэр къыхахыну зэрамурадыр жаIащ. 

 УЭРДОКЪУЭ  Женя.