КъБР-м щыIэ МВД-м къет

ПцIым фIым ухуишэркъым

КъБР-м щыIэ МВД-м экономикэ шынагъуэншагъэмрэ Iулъ­хьэм пэщIэтынымкIэ и IэнатIэмрэ Урысей ФСБ-м и щIыналъэ управленэмрэ я лэжьакIуэхэм къэлъыхъуэныгъэ Iуэхухэр ирагъэкIуэкIыу, илъэс 52-рэ зи ныбжь налшыкдэс цIыхубзым шэч хуащIащ ар гъэпцIагъэм пыщIауэ. 

Хабзэхъумэхэм къызэралъытэмкIэ, коммерческэ IуэхущIапIэхэм язым и унафэщIу, 2022 гъэм, Iуащхьэмахуэ районым ав­томашинэ гъуэгур зэрыщызэрагъэпэщыжамкIэ актхэр игъэхьэ­зыращ цIыхубзым, къагъэсэбэпа материалхэр, абыхэм хуэзэ уасэр дригъэуейщ, ямыгъэзэщIэхха лэжьыгъэхэри къыщигъэлъа­гъуэри. Муниципальнэ IэнатIэм абы къаIэригъэхьа тхылъхэм япкъ иткIэ Iуэхутхьэбзэхэм пэкIуэр иритащ. 
ИрагъэкIуэкIа ухуэныгъэ-техникэ экспертизэм къызэригъэлъэгъуамкIэ, зэфIамыгъэкIа лэжьыгъэм сом мелуани 2-м щIигъу пэкIуащ. 
КъБР-м щыIэ МВД-м и Следственнэ управленэм шэч зыхуа­щIым ехьэлIа уголовнэ Iуэху къиIэтащ УФ-м и УК-м и 159-нэ статьям и 4-нэ Iыхьэм ипкъ иткIэ икIи абы щIыпIэм имыкIыну, хаб-        зэр къызэпимыудыну хуагъэуващ. 

Жэуап ихьынущ

Урысей МВД-м и Бахъсэн къудамэм 2023 гъэм фокIадэм и 11-м зыхуигъэзащ зи ныбжьыр илъэс 71-рэ хъу, ХьэтIохъущыкъуей къуажэдэсым. ЦIыхухъум жиIащ и банк счетым сом 54 679-рэ зэрырахар. 

Уголовнэ къэлъыхъуэныгъэмкIэ къудамэм и лэжьакIуэхэм яубзыхуащ абы къедыгъуар унагъуэм я цIыхугъэ, илъэс 59-рэ зи ныбжь, Бахъсэн районым щыпсэур зэрыарар. ЦIыхубзым зиу­мысыжри, жиIащ хьэщIапIэ здэщыIэм банк картэм и пин-кодыр къызэрищIар. Ныбжь зиIэ цIыхухъур набдзэгубдзаплъэу зэ­ры­щымытыр къигъэсэбэпри, и картэр къищтащ икIи абы илъ ахъ-шэр езыр зыхуей счетым игъэкIуащ. 
Урысей МВД-м и Бахъсэн къудамэм и Следственнэ IэнатIэм уголовнэ Iуэху къиIэтащ Урысей Федерацэм и УК-м и 158-нэ статьям и 3-нэ Iыхьэм «г» пунктым ипкъ иткIэ. 

УАРДЭ  Жантинэ.