ХъуэпсапIэр нахуапIэ хъуащ

ЦIыхум IэщIагъэ хуэхъунур, и гъащIэр щхьэузыхь зыхуищIыну Iуэхур хэти школым щIэсу, хэти балигъыпIэ иува нэужь къыхех. Аргудан щыщ Бро зэщхьэгъусэхэм - Мухьэдинрэ Маритэрэ – япхъу Анжеллэ пасэу, иджыри сабийуэ, хьэкъ щыхъуат и гъащIэ гъуэгур зытриухуэнур. Хъыджэбз цIыкIум нэгъуэщI хъуэпсапIэ иIакъым дохутыру лажьэ и адэ-анэм я гъуэгум ирикIуэн мыхъумэ. ТIэкIу нэхъ къыдэкIуэтея нэужь, къэзылъхуахэм къыжраIащ а IэщIагъэр зэрыгугъур, абы ирилажьэхэм жэуапышхуэ я пщэ къызэрыдэхуэр, ауэ Анжеллэ апхуэдизкIэ щIэхъуэпсырт дохутыр хъунуи, нэгъуэщI гуэрым хуеджэну и гущхьэм къэкIыртэкъым.

Аргудан дэт езанэ курыт школыр дыщэ медалкIэ къэзыуха Бро Анжеллэ и документхэр Къэбэрдей-Балъкъэр къэрал университетым иритащ икIи химиемкIэ ита экзамен закъуэмкIэ «тху» къихьри, медицинэ къудамэм щIэтIысхьащ. ЕджапIэ нэхъыщхьэр къиуха нэужь, Налшык дэт поликлиникэ №7-м жьэжьей узыр зыпкърытхэм еIэзэ дохутыру лэжьэн щыщIидзащ. И Iуэхур хъарзынэу зэтеувауэ екIуэкIыурэ, и щIэныгъэм хигъэхъуэн, медицинэм ехьэлIа нэгъуэщI IэщIагъэхэми хуеджэн хьисэпкIэ, зэрылажьэм хуэдэурэ ординатурэр, иужькIэ аспирантурэр къиухыжащ. Уз зэрыцIалэхэр зэфыкIхэр гъэхъужыным триухуа и кандидат лэжьыгъэр ехъулIэныгъэкIэ Мэзкуу щыпхигъэкIри, медицинэ щIэныгъэхэм я кандидат хъуащ.

Анжеллэ дохутыру зэреджар кIэщIу щIэтплъыкIыжа щхьэкIэ, а IэщIагъэр фIыуэ зригъэщIэн, абы куууэ хэгъуэзэн, къыщIэмыхуэу къиухын папщIэ сыт хуэдиз зэман тригъэкIуэда - и жей игъэныкъуэу, а зи ужь ихьа Iуэхум темыплъэкъукIыу? Узыпэрыт Iуэхур унагъуэм, Iыхьлы-Iэулэдым къыщыбдаIыгъым, щIэгъэкъуэн къыщыпхуэхъум деж, дауи, уи таучэлыр нэхъ ин мэхъу, уи лъэри нэхъ щIокI. Ар игъэунэхуащ Анжеллэ:

- Ординатурэм, аспирантурэм сыщыкIуа зэманхэм, абы щыгъуэ Псыгуэнсу къуажэм дэс БецIыкIухэ я нысэ сыхъуат, фи нэмыс нэхъ лъагэ ухъуи, быни згъуэтат, зэрэ-тIэурэ къызэпхызгъэIукIат си IэщIагъэкIэ IэнатIэ щызэзгъэгъуэтакIэ, си щхьэри унагъуэри гугъу езмыгъэхьу, хуиту, зыхуей хуэзэу абыхэм я Iуэху дэгъэкIыным зытезухуэмэ, нэхъыфIкъэ, жысIэу. АрщхьэкIэ си щхьэгъусэм идакъым: «ЩебгъэжьакIэ икIэм нэгъэсыж, ущыгуфIыкIыжынщ, сабийхэм щхьэкIэ уигу умыгъэныкъуэ», - жиIэри. Сыт и лъэныкъуэкIи къыздиIыгъащ си Iуэхур: сызыхуеину тхылъхэр згъэхьэзырынри сабийхэм я къалэнри къысщигъэпсынщIащ. Иджы сыщогуфIыкIыж абы щыгъуэ еджэныр IэщIыб зэрызмыщIам. «Уэ медицинэ щIэныгъэхэм я кандидат узэрыхъуар зи фIыщIэр ди малъхъэращ, абы утримыгъэгушхуамэ, упэлъэщыну хъунтэкъым а Iуэхум», - къызжеIэ ди адэм.

IэщIагъэ зыкъом щыIэщ дунеижьыр кIэрэхъуэхункIэ, цIыхур псэухункIэ дыхуеину. Ахэр, дауи, я мыхьэнэкIи зэхуэдэкъым. Ауэ егъэджакIуэмрэ дохутырымрэ япэ ибгъэщ хъун IэщIагъэ щыIэу си фIэщ хъуркъым. ЦIыху сымаджэм и узыр щхьэщызых, и нэр зыгъэплъэж, дунейр щIэщыгъуэ щызыщIыж, зи IэнатIэм псэ хьэлэлкIэ бгъэдэт дохутырым сыт хуэдэ щытхъури хуэфащэщ. АбыкIэ щапхъэщ Анжеллэ. Мазэм къриубыдэу цIыху 400-м щIигъум я узыншагъэр къэппщытэныр, дэтхэнэми бгъэдыхьэкIэ щхьэхуэ къыхуэбгъуэтыныр, я узыр ящхьэщыпхыныр Iуэху къызэрыгуэкIыу зэрыщымытыр бэянщ. Зыбгъэдэт лэжьыгъэмкIэ жэуапышхуэ зэрихьыр, бащэкIэ къыщыгугъыу къыхуэкIуэ дэтхэнэ зыми сэбэп зэрыхуэхъуным, арэзы зэрищIыным хуэщIэкъуу и Iуэхур зэрехьэ БецIыкIум.

ЦIыхум и нэхъыбэр, псом хуэмыдэу адыгэр, дохутырым деж щыкIуэр я узым къыхигъэзыхьу хуежьа нэужьщ. Апхуэдэ Iуэху бгъэдыхьэкIэр зэрымытэмэмыр Анжеллэ и псалъэхэм хьэкъ пщащI:

- ЦIыхур узым къыхимыгъэзыхьмэ, дохутыр зригъэплъын хуейуэ къилъытэркъым. Ар щыуагъэшхуэщ: зи узыр къамыхута цIыху щыIэщ, ауэ зыгуэр зимылажьэ гъуэтыгъуейщ. Дэтхэнэми и узыншагъэр зыхуэдэр зригъэщIэн хуейщ дохутырым и деж, илъэсым зэ нэхъ мыхъуми, кIуэуэ. Къыхимыгъэзыхьыщэу, ауэ мащIэу цIыхум уз гуэр къеныкъуэкъумэ, абы йосэжри къыфIэIуэхукъым. Абдежым Iэпкълъэпкъым уз гуэр зэрыщыщыIэр зыкъыуигъащIэу аращи, ар гулъытэншэу къэбгъанэ хъунукъым. Узыншагъэр къригъэпщытэн щIидзэмэ, анализхэр итмэ, УЗИ, ЭКГ хуэдэхэр щIэкIа нэужь, сэтей къохъу абы уз гъэтIылъа гуэрхэр зэриIэр. Ахэр хэтIасэмэ гъэхъужыгъуейщ. Абы къыхэкIыу зэманышхуэ думыгъэкIыурэ уи узыншагъэм кIэлъыбгъэплъыпхъэщ - узыр нэхъ пасэу къэпхутэху нэхъ уполъэщ…

БецIыкIу Анжеллэрэ абы и щхьэгъусэ Олегрэ унагъуэ дахи яIэщ, быниплI зэдапI - Инал, Линэ, Елдар, Алим сымэ. НэхъыжьитIыр анэм и лъагъуэм ирикIуэжащ - ахэр щоджэ Саратов дэт медицинэ институтым, нэхъыщIитIыр школакIуэщ. Мыбдеж къыхэгъэщыпхъэщ Нарткъалэ дохутыру щылажьэ я адэ-анэм я гъащIэр щапхъэ зыхуэхъуар Анжеллэ зэримызакъуэр, атIэ и шыпхъу Алими дохутырщ.

ФIыуэ плъагъу IэщIагъэм урилажьэу, сымаджэхэм фIыщIэ къыпхуащIу, узыхэт гупри къыпхуэарэзыуэ, уи унагъуэкIи уигурэ уи щхьэрэ зэтелъу укъэгъуэгурыкIуэмэ, ар насыпкъэ? А насыпыр иIэщ БецIыкIу Анжеллэ.