ГъущI гъуэгухэм я зэранкIэ

Куэдыр зэрыщыгъуазэщи, Урысейм и гъущI гъуэгухэм кIуэ пэтми заубгъу, къахохъуэ, зэраныгъэ щхьэхуэхэри зэрымыщIэкIэ къыщыдэкIуэ щыIэу. Апхуэдэу Ростов областым и арбитраж судым (УФ-м и «Росрыболовство» IуэхущIапIэм и КъухьэпIэ - Каспийскэ къудамэм и нэIэ тету) къилъытащ, УФ-м и «РЖД» IуэхущIапIэм иригъэкIуэкI ухуэныгъэхэм Кавказ Ищхъэрэм и псы ежэххэм хэс аргъейм хэщIыныгъэшхуэ яритауэ икIи  абыхэм яхуигъэуващ, псы ежэх къабзэхэм фIэкIа нэгъуэщI щIыпIэ щымыбагъуэ а бдзэжьей лIэужьыгъуэм  и щхьэбжыгъэр  «РЖД»-м езым и мылъкукIэ игъэбэгъуэжын хуейуэ.

Урысейм и «Росрыболовство» IуэхущIапIэм и Кавказ Ищхъэрэ къудамэмрэ «Урысейм и гъущI гъуэгухэр» IуэхущIапIэмрэ зэгурыIуэжу зэращIылIа зэгурыIуэныгъэм ипкъ иту,  Къэбэрдей-Балъкъэрым и псы ежэххэм бдзэжьей къуэлэнхэм (каспийский лосось) я щIэжьейуэ мин 600 иджыблагъэ хаутIыпщхьащ, Урысейм и «Росрыболовство» IуэхущIапIэм и Кавказ Ищхъэрэ къудамэм и нэIэм щIэту.

Мы илъэсым дызэрытехьэрэ бдзэжьейуэ ди псы ежэххэм хаутIыпщхьащ псори зэхэту мин 700-м нэс.