КъБР-м и Iэтащхьэм иригъэкIуэкIа зи чэзу «муниципальнэ сыхьэт» зэIущIэм хэтащ КъБР-м и Правительствэм и УнафэщI Мусуков Алий, абы и япэ къуэдзэ Къуныжь МуIэед, КъБР-м ухуэныгъэмрэ псэупIэ-коммунальнэ хозяйствэмкIэ и министр Бэрбэч Алим, КъБР-м транспортымрэ гъуэгу хозяйствэмкIэ и министр ДыщэкI Аслъэн, щIыпIэ администрацэхэм я унафэщIхэр.
ЗэIущIэм щытепсэлъыхьащ лъэпкъ проектхэр зэфIэхынымрэ къалэхэр псэупIэкIэ тынш щIа зэрыхъуну мардэхэмрэ. Республикэм ит къалэхэмрэ къуажэхэмрэ зыхуей зэрыхуагъэзэну щIыкIэми и гугъу ящIащ.
Мусуков Алий утыку кърихьа бжыгъэхэм япкъ иткIэ, муниципальнэ псэупIэхэм заужьын папщIэ зэфIах лъэпкъ проектхэм 2023 гъэм текIуэдэнущ сом мелард 1,6-рэ. Ар щIыналъэ проектхэу «Сабий псоми зэхуэдэ Iэмалхэр къахузэгъэпэщын», «Щэнхабзэм и дуней», «Творческэ цIыхухэр», «Къалэхэр зэIузэпэщ щIын» хуэдэхэрщ, ущыпсэуну дзыхьщIыгъуэджэ хъуа унэхэм цIыхухэр къыщIэгъэIэпхъукIынри, гъуэгухэр егъэфIэкIуэнри абы хеубыдэ. Мы илъэсым щегъэжьауэ проектыщIэ утыку кърахьэ - «ЩIалэгъуалэм защIыдогъакъуэ». Лъэпкъ проектхэм хэмыту, сом мелард 1,6-рэ щIэныгъэ IуэхущIапIэхэр зэрагъэпэщыжыным хуаутIыпщынущ. Муниципальнэ щIыналъэ къэс зэгурыIуэныгъэ иращIылIащ ахъшэ зэрыхуаутIыпщынум теухуауэ. КIуэкIуэ Казбек унафэ ищIащ проект къэс псынщIэу хэплъэу, хуэчэмхэр халъхьэжыну.
Бэрбэч Алим къызэхуэсахэр щыгъуазэ ищIащ 2022 гъэм къэралым, щIыналъэм, къалэхэм ябгъэдэлъ мылъкур къагъэсэбэпкIэрэ, цIыху зэхуэсыпIэ 31-рэ, пщIантIи 102-рэ зэрызэрагъэпэщыжам. Республикэм щекIуэкIа зэхьэзэхуэм кърикIуахэм япкъ иткIэ, иджыри цIыху зэхуэсыпIэ 12 къагъэщIэрэщIэнущ дызэрыт илъэсым, «Къалэхэр зэIузэпэщ щIын» проектымкIэ цIыху зэхуэсыпIэу 48-рэ пщIантIи 100-рэ ирагъэфIэкIуэнущ. Аруан щIыналъэм IV Урысейпсо зэхьэзэхуэм зэрыщытекIуам ипкъ иткIэ, Нарткъалэ дэт «Нарт» паркыр зэрагъэпэщыжынущ. Мы махуэхэм абы хуаутIыпщащ сом мелуан 85-рэ, езы муниципалитетым щIигъунущ сом мелуани 9,6-рэ.
ЗэIущIэм къыщаIэтащ щIыналъэ къэс щызэфIэхыпхъэ псэупIэ-коммунальнэ, гъуэгу ухуэныгъэм теухуа Iуэхухэри. Республикэм и Iэтащхьэм къапэщылъ къалэнхэм епхауэ унафэ зыбжанэ ищIащ, 2024 гъэм зэлэжьыну ухуэныгъэхэм егупсысынуи къызэхуэсахэм къалэн ящищIащ.