КъБР-м и Правительствэм и УнафэщI Мусуков Алий иригъэкIуэкIащ Iуэхугъуэ щхьэхуэхэр щызэпкъраха зэIущIэ.
КъБР-м узыншагъэр хъумэнымкIэ и министр Къалэбатэ Рустам тепсэлъыхьащ КъБР-м медицинэмкIэ и лэжьакIуэ щхьэхуэхэм я улахуэм зэрыхущIагъунум и проектым. ЗыдэIэпы-
къунухэм хеубыдэ 2023 гъэм и щIышылэм щегъэжьауэ ОМС-м и базэм хэт медицинэ лэжьакIуэхэр: щIыналъэ, участковэ сымаджэщхэм, медицинэ дэIэпыкъуныгъэ псынщIэ щрат къудамэхэм щыIэхэр. Абыхэм яIэрыхьэнущ мазэм къриубыдэу сом мини 4,5-м щегъэжьауэ сом мин 18,5-м нэблагъэ. ДэIэпыкъуныгъэхэр зэхуэзыгъэкIуэнур (операторыр) социальнэ фондырщ. Проектым щхьэхуэу къыхагъэщащ ОМС-м и базэм къыщымыгъэлъэгъуа медицинэ лэжьакIуэхэм щIыналъэм и мылъкум къыхэкI ахъшэкIэ зэрадэIэпыкъуну щIыкIэр. ЩIыналъэр ядэIэпыкъун хуейщ дифтиатрием, психиатрием, наркологием я лэжьакIуэхэм, ВИЧ узыфэ зэрыцIалэ зыпкърытхэм якIэлъыплъхэм.
Медицинэм и лэжьакIуэхэм иратыну ахъшэр ягъэбелджылынущ унафэ ягъэувам тету: амбулаторэхэм я дохутырхэм - мазэм хуэзэу сом 14 500-рэ; медицинэ дэIэпыкъуныгъэ псынщIэр зэфIэзыгъэкIхэм - сом 11 500-рэ; медицинэм и курыт лэжьакIуэхэм - сом 6 500-рэ, фельдшерхэмрэ медсестрахэмрэ - сом 7 000, лъэсакIуэхэмрэ сымаджэхэм я тепIэнщIэлъынхэм кIэлъыплъхэмрэ - сом 4 500-рэ.
Проектым хэтщ ищхьэкIэ къэтхьа гупым химыубыдэ медицинэ лэжьакIуэхэм папщIэ щхьэхуэу ягъэбелджыла дэIэпыкъуныгъэр: биологиемкIэ щIэныгъэ нэхъыщхьэ зиIэ дохутырхэм мазэм къриубыдэу - сом 11 500-рэ, лъэсакIуэхэм - сом 3 000.
Медицинэ лэжьакIуэхэм илъэсым и кIуэцIым зэрадэIэпыкъунум текIуэдэнущ республикэм и мылъкум щыщу сом мелуан 90.
Налшык къалэ муниципальнэ мылъкум хиубыдэу Кулиевым и цIэр зезыхьэ уэрамым тет унэ №12-р Къэбэрдей-Балъкъэр Республикэм и къэрал мылъкум зэрыхагъэхьэжым теухуауэ къэпсэлъащ КъБР-м щIы, мылъку зэхущытыкIэхэмкIэ и министр Тэхъу Аслъэн. Метр зэбгъузэнатIэ 6357-рэ хъу IуэхущIапIэр къигъэсэбэпынущ КъБР-м щIалэгъуалэм я IуэхухэмкIэ и министерствэм къегъэщIылIауэ щыIэ къалэн куэд зыгъэзащIэ щIалэгъуалэ центрым.
КъБР-м и Правительствэм и ахъшэ гъэтIылъам щыщ КъБР-м Ухуэныгъэмрэ псэупIэ-коммунальнэ хозяйствэмкIэ и министерствэм етыным щытепсэлъыхьащ зэIущIэм. Мылъкур хуаунэтIынущ республикэм и цIыхухэм захъумэжын хуей хъужыкъуэмэ, телевиденэмрэ радиомрэ занщIэу эфирым хъыбар щатыфыным тещIыхьауэ системэ зэтраублэным. Абы къытеувыIащ КъБР-м ухуэныгъэмрэ псэупIэ-коммунальнэ хозяйствэмкIэ и министр Бэрбэч Алим. Iуэхум текIуэдэнущ сом мелуани 5-рэ мин 894,150-рэ.
Республикэм щыщу ветеран е цIыху ныкъуэдыкъуэ зэрыс унагъуэхэу псэупIэ хуэныкъуэу муниципалитетхэм я учётым щытхэм я бжыгъэр зэрагъэуIужынущ. Абы тещIыхьа проектым текIуэдэнур федеральнэ мылъкум къыхэкIынущ, республикэм и бюджетри дагъэIэпыкъунущ. 2023 гъэм абы хухахынущ сом мелуан 26,3-рэ. Ветеранхэм хуаунэтIынущ сом мелуан 1,8-рэ, зауэм и ветеранхэм сом мелуани 4,3-рэ, ныкъуэдыкъуэхэмрэ абыхэм я унагъуэхэмрэ, сабий ныкъуэдыкъуэ зиIэхэм хухахынущ сом мелуан 22-рэ.
КъБР-м и Правительствэмрэ «Северокавказская пригородная пассажирская компания» акционер зэгухьэныгъэмрэ 2023 гъэм къриубыдэу республикэм гъущI гъуэгу транспортыр зэрыщызекIуэнум теухуауэ зэраухылIа зэгурыIуэныгъэр игъэбелджылащ КъБР-м транспортымрэ гъуэгу хозяйствэмкIэ и министр ДыщэкI Аслъэн. ЗэхъуэкIыныгъэхэр халъхьащ Беслъэн - Минеральные Воды, Минеральные Воды - Прохладный, Прохладный - Владикавказ гъуэгухэм мафIэгур зэрырикIуэну зэманхэм (график).
«Егъэджэныгъэ» лъэпкъ программэм щIэблэр хэкупсэу гъэсэнымкIэ и Iыхьэм хиубыдэу республикэм егъэджэныгъэмкIэ и IуэхущIапIэхэм лэжьыгъэ щхьэхуэхэр щрагъэкIуэкIынущ. Апхуэдэуи, еджапIэхэр къызэрагъэпэщынущ къэралым и гербкIэ, гимнкIэ, ныпкIэ. Ар жиIащ КъБР-м егъэджэныгъэмрэ щIэныгъэмкIэ и министр Езауэ Анзор. 2023 гъэм Iуэхум текIуэдэну сом мелуан 25,31-м щыщу сом мелуан 24,781-р федеральнэ мылъкущ, сом мин 250-р республикэм и бюджетым къыхахынущ.