КъБР-м щыIэ МВД-м щекIуэкIащ Наркоманиемрэ наркотикхэр щэнымрэ ебэныным и дунейпсо махуэм теухуа зэIущIэ. Абы хэтащ министерствэм дэлажьэ Жылагъуэ советым щыщхэу Бобылев Валентинрэ ЦIыпIынэ Заремэрэ.
Республикэм щыIэ МВД-м Наркотикхэр зэрызэрагъакIуэм кIэлъыплъынымкIэ и управленэм и унафэщI Яхэгуауэ Астемыр тепсэлъыхьащ наркотикхэр щэным пэщIэту ирагъэкIуэкI лэжьыгъэм. ФIыщIэ яхуищIащ абы и лъэныкъуэкIэ къадэлажьэ министерствэхэмрэ ведомствэхэмрэ, апхуэдэуи наркоманием ехьэлIа профилактикэ Iуэхум хэлъхьэныгъэ хуэзыщI школакIуэхэм.
- Къэрал кIуэцI IуэхухэмкIэ министерствэу КъБР-м щыIэм зэтеухуауэ ирегъэкIуэкI наркотикхэм щIэIупщIэр нэхъри гъэмэщIэным хуэунэтIа Iуэхухэр. Ди гуапэщ фэри лъэныкъуэкIэ фыкъызэрымынэр. А гугъуехьым гудзакъэншэу хущымытхэм фи нэгум дыщиплъэкIэ, хьэкъ тщохъу ди къэралым и къэкIуэнур зэрыбыдэр, - къыхигъэщащ Яхэгуауэм.
Я Iуэху еплъыкIэхэр жаIащ КъБР-м узыншагъэр хъумэнымкIэ и министрым и къуэдзэ Батыр Заурбэч, республикэм егъэджэныгъэмрэ щIэныгъэмкIэ министрым и къуэдзэ Мысост Екатеринэрэ щIалэгъуалэм я IуэхухэмкIэ министрым и къуэдзэ Ахъмэт Артуррэ.
Наркоманием пэщIэт Iуэхухэр къызэгъэпэщыным, жылагъуэ Iуэхум, щIалэгъуалэр гъэсэным жыджэру зэрыхэтым папщIэ КъБР-м щыIэ МВД-м и ЩIыхь тхылъхэр хагъэфэщащ республикэм и министерствэ, жылагъуэ IуэхущIапIэ зэмылIэужьыгъуэхэм я лIыкIуэхэмрэ курыт еджапIэхэм я школакIуэхэмрэ, Совет Союзым и
ЛIыхъужь Калюжный Николай и цIэр зезыхьэ курыт еджапIэ №7-м полицэм щиIэ кадет классым и гъэсэнхэри яхыхьэу.
Наркоманием пэщIэт профилактикэ Iуэхухэр къызэгъэпэщынымкIэ къадэлажьэ Анаев Къайтмырзэ иратащ КъБР-м Узыншагъэр хъумэнымкIэ и министерствэм и ЩIыхь тхылъыр.
Налшык къалэм и школакIуэхэу щым езыхэм ящ1а сурэтхэр къратащ КъБР-м щыIэ МВД-м. Курыт еджапIэ №7-м полицэм щиIэ кадет классым къыбгъэдэкIыу Сонэ Алинэ къызэхуэсахэм къахуеджащ къаIэта Iуэхум теухуа усэ.
