Путин Владимир Урысейм и Президент къулыкъум иджы етхуанэу пэрыуващ, хэхыныгъэхэм щытекIуа нэужь. А Iуэхум иращIэкIа зэхуэсышхуэр сыхьэтым нэблагъэкIэ екIуэкIащ. Накъыгъэм и 7-м щегъэжьауэ къэкIуэну илъэсихым (2030 гъэ пщIондэ) къэралыр зыунэтIынур, абы зезыгъэужьынур Путин Владимирщ.
Кремлым и Андреевскэ, Александровскэ, Георгиевскэ пэшхэм цIыху 2600-м нэблагъэ щызэхуэсат. Зэрыхабзэу, мы Iуэхум ирагъэблэгъат Правительствэм хэтхэр, щIыналъэ унафэщIхэр, Конституцэ судым и хеящIэхэр, УФ-м и ХэхакIуэ комиссэм и лIыкIуэхэр, жылагъуэ, дин лэжьакIуэхэр, Къэрал Думэм и депутатхэр, журналистхэр, дзэ къулыкъум пэрытхэр (дзэ Iуэху хэхам щыIэхэри ящIыгъуу). Абы ирихьэлIащ Къэбэрдей-Балъкъэр Республикэм и Iэтащхьэ КIуэкIуэ Казбек, Президентым зи дзыхь иригъэзу Къэбэрдей-Балъкъэрым къыбгъэдэкIыу хэхыныгъэхэм хэтахэу Дунейпсо Адыгэ Хасэм и тхьэмадэ Сэхъурокъуэ Хьэутий, «Хэкум и зауэлIхэм я унагъуэхэм я комитет» Къэбэрдей-Балъкъэр жылагъуэ зэгухьэныгъэм и унафэщI Ореховэ Каринэ, «Ни шагу назад» волонтёр зэщIэхъееныгъэм и унафэщI Байсиев Темыржан сымэ.
ПсэлъапIэм техьэн ипэ, Путин Владимир фIэхъус ярихащ УФ-м ФедерацэмкIэ и Советым и УнафэщI Матвиенкэ Валентинэ, Къэрал Думэм и спикер Володин Вячеслав, Конституцэ судым и унафэщI Зорькин Валерий сымэ.
Путин Владимир тхьэрыIуэ ищIа нэужь, УФ-м и Къэрал Гимныр къеуащ. АдэкIэ УФ-м и Президентыр къэпсэлъащ. Псом япэу абы къэралым и лIыхъужьхэм, дзэ Iуэху хэхам иджыпсту хэтхэм фIыщIэ яхуищIащ, Хэкум и хуитыныгъэмрэ щхьэхуитыныгъэмрэ хъума хъуным псэемыблэжу зэрыпэрытыр къыхигъэщри.
- Урысейм щыпсэу дэтхэнэми фIыщIэ псалъэкIэ зыхуэзгъэзэну сыхуейщ, я дзыхь къызагъэзу къулыкъур къызэрысхуагъэфэщам папщIэ, - жиIащ Путин Владимир. - Иджыпсту сщIа тхьэрыIуэм къызэрыхэщщи, къэралым и пашэм и къалэн нэхъыщхьэр Хэкур хъумэным-рэ цIыхубэм хуэлэжьэнымрэщ. Ар пщIэшхуэщ икIи жэуаплыныгъэ зыпылъщ. Фыкъызогъэгугъэ адэкIи Урысейм и цIыхубэм я шынагъуэншагъэр си дежкIэ Iуэхугъуэ нэхъыщхьэ дыдэу зэрыщытынумкIэ. Си фIэщ мэхъу зэман нэхъ гугъухэми дыблэкIыу, нэхъ лъэщыж дызэрыхъунур. Ди зыужьыныгъэм ехьэлIауэ мурадышхуэхэр диIэщ. АбыкIэ щIэгъэкъуэныфI къытхуэхъунущ лIэщIыгъуэкIэрэ къыддэгъуэгурыкIуа ди лъэпкъ хабзэхэмрэ унагъуэхэм илъ зэхущытыкIэ дахэхэмрэ. Дэ адэкIи дыхущIэкъунущ Урысейм къыдэлэжьэну хьэзыр дэтхэнэ къэралми зэхущытыкIэ дахэ худиIэхэм хэдгъэхъуэну. КъухьэпIэ къэралхэм Iуэху ядэдмыщIэну жытIэу аракъым. Ауэ абыхэм къыхахын хуейщ: Урысейм и зыужьыныгъэм лъэпощхьэпо адэкIи къыхуэхъуну я мурад хьэмэ мамыру дызэрызэдекIуэкIыну щIыкIэм егупсысыну? Дэ дызыхущIэкъунур мамырыгъэмрэ шынагъуэншагъэмрэщ. Тхыдэ къулей диIэщ, ауэ ди блэкIам дерс къыхэтхыфу щытын хуейщ зэманым дызыпэщIигъэувэ гъэунэхуныгъэхэм дыпэщIэтыфын хуэдэу. Нобэ зэрытлъагъущи, цIыхубэм егъэлъапIэ жэуаплыныгъэр, пэжагъыр, цIыхугъэр, лIыгъэр. Хэкум IуэхуфIкIэ, пэжкIэ бгъэдэтхэм къэралым и IэнатIэ псоми увыпIэ лъагэхэр щагъуэтыным си къару псори есхьэлIэнущ. КъыдэкIуэтей ди щIэблэр зэрыдгъэсэнуми гулъытэ хэха хуэтщIын хуейуэ къызолъытэ - Урысейр нэхъ лъэщ хъуныр, къэралым зиужьыныр зэлъытар ахэращ. Къэралым и Президентым и пщэрылъхэр сыт и лъэныкъуэкIи згъэзэщIэну фыкъызогъэгугъэ. Абы щыгъуэми къыхэзгъэщыну сыхуейт зи гугъу сщIахэр къыдэхъулIэныр куэдкIэ дызэрызэкъуэувэм елъытауэ зэрыщытынур. Ди япэ итахэм ехъулIэныгъэ щIаIар сыт щыгъуи Хэкур япэ ирагъэщу зэрыщытарщ. Ар ди щапхъэу къэкIуэну зэманым зыхуэдгъэхьэзырыпхъэщ. Дызэгъусэу сытри тлъэкIынущ.
УФ-м и Президентыр и къулыкъум зэрыпэрыхьам и щIыхькIэ, Кремлым деж топышэ 30 зэдагъэуащ. АдэкIэ Путин Владимир Соборнэ утым щеплъащ Президент полкым хэтхэм ягъэхьэзыра зыкъэгъэлъэгъуэныгъэм. Ар щIалэхэм ехъуэхъуащ полкыр къызэрызэрагъэпэщрэ илъэс 88-рэ зэрырикъумкIэ.
Путин Владимир хэту Благовещенкэ соборым щекIуэкIа тхьэелъэIур иуха нэужь, Патриарх Кирилл къэралым и Президентым ехъуэхъуащ и гур мамыру, зэувэлIа IэнатIэ мытыншыр къехъулIэу лэжьэну.
КъБР-м и Iэтащхьэ КIуэкIуэ Казбек Iуэхур зэрекIуэкIам щытепсэлъыхьым къыхигъэщащ Урысейм дежкIи дуней псом ехьэлIауи мыхьэнэшхуэ зиIэ политикэ Iуэхугъуэ къызэрыхъуар.
- Урысей Федерацэм и Президенту цIыхухэм хаха Путин Владимир и къулыкъум пэрыхьащ. Иджыблагъэ абы Федеральнэ Зэхуэсым Зэрызыхуигъэзам щигъэбелджылащ къэралым зэрызиужьыну гъуэгумрэ ар зэдгъэхъулIэн папщIэ, щIыналъэхэм ди къалэн нэхъыщхьэхэмрэ, - жеIэ КъБР-м и Iэтащхьэм. - Нобэ дигурэ ди щхьэрэ зэтелъу ипэкIэ дыкIуэтэфыну къыщIэкIынтэкъым ди экономикэм и лъабжьэр быдэу щымытамэ, социальнэ Iуэхухэм гулъытэ хэха ямыIамэ, цIыхубэм ди пашэм дзыхь иримыгъэзу щытамэ. Апхуэдэ ехъулIэныгъэхэр зи фIыгъэр ди Президентым лэжьыгъэшхуэ зэрыригъэкIуэкIарщ, Урысеймрэ абы и цIыхухэмрэ ар хуэпэжу зэрыбгъэдэтырщ. Ди Хэкур къарууншэ ящIыныр я гуращэу къытпэщIэува къэралхэм Урысейр хахуэу япэщIэтщ, ди щIалэхэм лIыгъэ яхэлъу ди къэкIуэнур яхъумэ. Къэралым и пашэм и къэпсэлъэныгъэр Урысейм и текIуэныгъэм теухуа псалъэхэмкIэ иухащ: «Дызэгъусэу сыт хуэдэ гъэунэхуныгъэми дыпхыкIыфынущ икIи ди мурадхэр къыдэхъулIэнущ. Дызэкъуэтмэ, дытекIуэнущ!» Къэбэрдей-Балъкъэр щIыналъэм а псалъэхэр ди гъуазэу сыт щыгъуи дыщIыгъунущ ди Президент Путин Владимир!
