ЦIыхубэр зэрыпагэ, зэрыгушхуэ

КъБР-м и Парламентым и УнафэщI Егоровэ Татьянэ республикэм и хабзэубзыху орган нэхъыщхьэм и Президиумым и зэIущIэ иригъэкIуэкIащ. Ар къыщызэIуихым, Егоровэ Татьянэ депутатхэм ехъуэхъуащ махуэшхуэ къэб­лэгъамкIэ:

- ТекIуэныгъэм и махуэшхуэр къызэрыблэгъамкIэ си гуапэу сынывохъуэхъу. 1945 гъэм ­накъыгъэм и 9-р цIыхубэр зэрыпагэ, зэрыгуш­хуэ, ди къэралым и тхыдэм дыщэпскIэ хатха ­махуэщ. Хэку зауэшхуэм хэта ди адэжьхэм, тылым и лэжьакIуэхэр сыт щыгъуи ди щапхъэу щытынущ, яхэлъа лIыгъэмрэ хахуагъэмрэ, Хэкур фIыуэ зэралъэгъуамрэ зэрыхуэпэжамрэ тщыгъупщэнукъым. Абыхэм я фэеплъырщ дэ лъэрызехьэ ды­зыщIыр, сыт хуэдэ гъэунэхуныгъэми дыпхызыгъэкIыр. Апхуэдэ махуэшхуэхэм Урысейм щып­сэухэр дызэкъуегъэувэ, иджыпсту дзэ Iуэху хэхам хахуэу хэт ди лIыхъужьхэр тре­гъэгушхуэ, - жиIащ КъБР-м и Парламентым и УнафэщIым.
Егоровэ Татьянэ къызэхуэсахэм ехъуэхъуащ узыншагъэ быдэ щымыщIэну, бэIутIэIуншэу псэуну, ехъулIэныгъэхэр яIэну. 
ЗэIущIэм депутатхэр щыхэплъащ «Хэхыныгъэхэмрэ референдумхэмрэ ятеухуа республикэ закон щхьэхуэхэм зэхъуэкIыныгъэхэр хэлъ­хьэ­ным и IуэхукIэ» КъБР-м и законым и проектым. КъБР-м и Парламентым Законодатель­ствэмрэ щIыпIэ унафэр зехьэнымкIэ и ко­митетым и унафэщI Мэлбахъуэ Борис къы­зэрыхигъэщамкIэ, законопроектыр ягъэхьэ­зыращ «УФ-м и хабзэубзыху акт щхьэхуэхэмрэ УФ-м щыпсэухэр референдумым хэтыну яIэ ­хуитыныгъэхэм я лъабжьэм теухуауэ» Феде­ральнэ законым зэхъуэкIы­ныгъэхэр хэлъхьэным ехьэлIауэ» Федеральнэ законыр къызэ­ращтам ипкъ иткIэ. Дэфтэрым хэлъхьэжыпхъэхэр къагъэлъэгъуа нэужь, КъБР-м и Парламентым и зи чэзу зэIущIэм къыщащтэну къы­халъхьэнущ.
Депутатхэр тепсэлъыхьащ мэкъумэшым зэран хуэхъу псэущхьэхэм ехьэлIа гугъуехьхэм, мэзым щыщ щIы Iыхьэ 2024 - 2025 гъэхэм бэджэнду щаткIэ хуагъэув уасэ нэхъ мащIэр яубзыхуным, балигъ ныбжьым нэмысахэр унэм зэрыщрагъаджэ щIыкIэм, нэгъуэщIхэми ятеу­хуауэ щIыналъэхэм я хабзэ жэрдэмхэмрэ зэрызыхуагъазэмрэ. 
ЗэIущIэм зэрыщаубзыхуамкIэ, КъБР-м и Парламентым и зи чэзу зэIущIэр накъыгъэм и 23-м екIуэкIынущ. Депутатхэр арэзы техъуащ республикэм и щэнхабзэм хэлъхьэныгъэ хуэзыщI цIыху зыбжанэ КъБР-м и Парламентым и ЩIыхь тхылъкIэ зэрагъэпажэнум.