Гъэмахуэ нэгузыужь

Ди республикэм и щIыналъэхэм пIалъэ лэжьыгъэкIэ къыщызэрагъэпэщ школым къаутIыпща цIыкIухэр.

А Iуэхум теухуауэ Шэджэм щIыналъэм и курыт еджапIэхэм щагъэзащIэ «Илъэс 14 - 18 ныбжьым нэсахэм я гъэмахуэ зыгъэпсэхугъуэм лэжьыгъэ къахуэгъуэтын» щIыналъэ программэр. Абы ипкъ иту ахэр лэжьакIуэ IэщIагъэхэм хогъуазэ, хадэхэкI, мэракIуэхэкI зыщIэхэм, къалэр зэIузэпэщ зыщI коммунальнэ лэжьакIуэхэм  Iэпыдзлъэпыдз яхуохъу. КъызэгъэпэщакIуэхэм зэрыжаIамкIэ, балигъыпIэ имыува куэдым иджыпсту лэжьыгъэ къалъыхъуэ, сом къалэжьын щхьэкIэ. Ар езыхэмкIи адэ-анэхэмкIэ зэранкъым. КъищынэмыщIауэ, гъащIэм, шыIэныгъэм, цIыху хэтыкIэм хуеущий. Псори ауэ къэгъэнауэ, нобэ абыхэм ящIэр пщэдей псэуныгъэ IуэхукIэ къахуэщхьэпэжынущ. НыбжьыщIэхэр лэжьыгъэкIэ къызэзыгъэпэщхэр а Iуэхум теухуауэ мы гъэм къэралым къыщащта хабзэхэм тету Iуэхум бгъэдохьэ. ЦIыкIухэм къыхуагъэлъагъуэркъым я узыншагъэм зэран хуэхъун Iуэху хьэлъэхэр, жэщ лэжьыгъэхэр.

 ЦIыкIухэм я зыгъэпсэхугъуэ зэманыр нэгузыужьу, гукъинэжу зэрагъэкIуэным толажьэ адэ-анэхэри, шэнхабзэм и лэжьакIуэхэри. Абы и зы щапхъэу «Долина Кавказа» хьэблэм иджыблагъэ къыщызэрагъэпэщат бжэIупэ гуфIэгъуэ зэхуэсышхуэ. Абы хэтащ фэтэр куэду зэхэт унэхэм щыпсэу сабийхэмрэ ныбжьыщIэхэмрэ. Ахэр лъакъуэрыгъажэхэмкIэ къызэдэжащ,  лъэпкъ къафэхэмкIэ зэпеуащ.

Шэрэдж Дисэ.