Лышх узыфэхэмкIэ Ростов къалэм щыIэ къэрал IуэхущIапIэм иджыблагъэ щрагъэкIуэкIащ операцэ хьэлъэ. ЦIыхухъум и щIыбым хищIа лышх шыкъырыр къыхахащ.
Сымаджэм зэрыжиIэмкIэ, илъэс зыбжанэ ипэ джалэри, щIыбкIэ техуат. Абдеж щигъуэта сэкъатыр мыкIыжу, уеблэмэ кIуэ пэтми нэхъ ин хъууэрэ, лIым къеныкъуэкъурт, сыт щимыхуами, сыт хуэдэ хущхъуэ зримыхьэлIами сэбэп къыхуэмыхъуу. Уэтэпсыр щымыгъущым, фэбжьыр къехьэлъэкIыпэ щыхъум лIыр сымаджэщым кIуащ. Дохутырхэр къеплъа нэужь, ар занщIэу яунэтIащ лышх узыфэхэмкIэ Ростов щыIэ IуэхущIапIэм.
- Сымаджэр ди IуэхущIапIэм къыщыкIуам и щIыбым тет шыкъырым сантиметр 30 и инагът. ЕдгъэкIуэкIа къэпщытэныгъэхэм къагъэлъэгъуащ абы щIыфэ лышхыр къеуалIэу, и лым зэрыхыхьэжар. Операцэ тщIыри, лышхыр къыхэдгъэжащ, дгъэкъэбзащ, - жеIэ IуэхущIапIэм и унафэщI, медицинэ щIэныгъэхэмкIэ доктор, академик Кит Олег.
Гу лъытапхъэщи, лышхымкIэ сымаджэщым мызэ-мытIэу щрагъэкIуэкIащ зи гугъу тщIы операцэ лIэужьыгъуэм хуэдэ. ИкIи ростов дохутырхэр иролажьэ микрохирургие операцэхэр зэрагъэзащIэ иужьрей Iэмэпсымэу щIэныгъэм къыхыхьахэм. Абыхэм я фIыгъэкIэ лышх шыкъырри къыхагъэж, лъынтхуэ нэхъ псыгъуэ дыдэхэри зэпадэж, фэм сэкъат иIауэ къыпхуэмыщIэну зэгуадэж, сымаджэри щIэх дыдэ къызэфIоувэж. Мы зы гъуэгу хирургхэм я лэжьыгъэ нэхъри хьэлъэ ящызыщI Iуэхугъуэ щыIэт – кърагъэжа фэмрэ лымрэ зыгъэпцIыжын хуейт.
- Псом япэрауэ, лышхым иубыда щIыфэмрэ лымрэ къыхэдгъэжащ. КъыкIэлъыкIуэу и шхужьым лырэ фэрэ къыхэдгъэжри, и щIыбым телъ уIэгъэшхуэр ддыжащ. ЗэрыгурыIуэгъуэщи, сантиметр 30-р бгъэнщIыжыныр лэжьыгъэшхуэщ, апхуэдиз фэи лыи шхужьым къыпхуихынукъым. Ауэ щыхъум, имплант къэдгъэсэбэпащ, езыр-езыру лыми щIыфэми хэкIэу, зишэщIыжыным къыхуагъэщIар, - жиIащ онколог, медицинэ щIэныгъэхэмкIэ кандидат Аушевэ Татьянэ.
Операцэр сыхьэти 5-м щIигъукIэ екIуэкIащ. Сымаджэр узыншэу щIатхыкIыжакIэщ. Иужьрей мазэ зыбжанэм мыр ещанэ операцэщ, уIэгъэ къызэрыгуэкIыр лышхым хуэкIуэжауэ еIэзэн хуей зэрыхъуар. Абы къыхэкIыу, и чэзум дохутыр зэгъэплъыным куэд зэрелъытар иджыри зэ дигу къагъэкIыж ростов онкологхэм.
