Зыужьыныгъэшхуэхэр щокIуэкIУзыншагъэр хъумэнымкIэ IэнатIэр егъэфIэкIуэным хуэунэтIауэ республикэм лэжьыгъэшхуэ щызэфIагъэкI. IэнатIэм зегъэужьыным хуэунэтIа Iуэху нэхъыщхьэхэр къэрал программэхэмрэ лъэпкъ проектхэмрэ япкъ иткIэ ягъэзащIэ. Апхуэдэу «Къуажэ дохутыр» программэр Къэбэрдей-Балъкъэрым щагъэзащIэ 20I9 гъэ лъандэрэ. А зэманым къриубыдэу республикэм и медицинэ IуэхущIапIэхэм лэжьыгъэ щагъуэтащ унэтIыныгъэ зэхуэмыдэхэмкIэ IэщIагъэлI 205-м. Программэм и фIыгъэкIэ узыншагъэр хъумэнымкIэ IэнатIэр зыхуримыкъу IэщIагъэлIхэмкIэ къызэгъэпэща мэхъу, апхуэдэуи къэралым мылъку хъарзынэкIэ дохутыр щIалэхэм защIегъакъуэ. 2025 гъэм республикэм и район сымаджэщхэм ягъэкIуэнущ дохутыр 23-рэ курыт щIэныгъэ зиIэ IэщIагъэлIу 8-рэ. Программэм къызэригъэувымкIэ, жылагъуэ нэхъ пхыдзахэм ягъакIуэ дохутырхэм сом мелуан 1,5-рэ, фельдшерхэм сом мин 750-рэ иратынущ. ЦIыху мин 50-м нэблагъэ зыдэс къуажэхэм щылэжьэну дохутырхэм сом мелуан яIэрыхьэнущ. IэщIагъэлI ныбжьыщIэхэр здэкIуа щIыпIэхэм илъэситхукIэ щыIэнущ. Iуэху щхьэпэр ягъэзащIэ «Узыншагъэр хъумэнымкIэ IэнатIэм зегъэужьын» къэрал программэм къызэригъэувым тету. Фигу къэдгъэкIыжынщи, 2024 гъэм къэралым и щIыналъэхэм а программэр зэрагъэзащIэмкIэ Къэбэрдей-Балъкъэрыр а Iуэхум псом нэхърэ нэхъ ехъулIэу къагъэлъэгъуащ. «ЦIыхухэм япэ медицинэ дэIэпыкъуныгъэ щыхуащIэ IуэхущIапIэхэр къэгъэщIэрэщIэжын» щIыналъэ программэм ипкъ иткIэ зэфIагъэкIари мащIэкъым, адэкIи лэжьыгъэхэм къыпащэ. Иджыблагъэ КъБР-м узыншагъэр хъумэнымкIэ и министр Къалэбатэ Рустам зригъэлъэгъуащ Белая Речкэ, Старэ Шэрэдж, Шэрэдж Ищхъэрэ, Светловодскэ, Дей, Къубэ-Тэбэ къуажэхэм щаухуэ амбулаторэхэм щекIуэкI лэжьыгъэр. Ахэр мы илъэсым хьэзыр ящIыну я мурадщ. Унэхэр къызэфIагъэуващ, абы и пэшхэр зэрыщытыну щIыкIэр зэхагъэщхьэхукIащ, щхьэгъубжэ блыпкъхэр хагъэуващ. Министрым жиIащ ирагъэкIуэкIа лэжьыгъэм арэзы къызэрищIар, абы къыдэкIуэуи ухуакIуэхэр къыхуриджащ Iуэхур нэхъ щIагъэхуэбжьэну, унэм инженер коммуникацэхэр ешэлIэным егугъуну, апхуэдэуи цIыхухэм медицинэ Iуэхутхьэбзэхэр яхуэщIынымкIэ щыIэ жыпхъэщIэхэм къызэрагъэувым тету IэщIагъэлIхэм я пэшхэм я зэкIылъыхьыкIэм гулъытэ хуащIыну. 2025 гъэм республикэм амбулаториеу 8 къыщызэIуахынущ. Зи гугъу тщIахэм къищынэмыщIауэ, апхуэдэ медицинэ IуэхущIапIэхэр щахуэ Прохладнэ щIыналъэм и Красносельскэ къуажэмрэ Налшык округым хыхьэ Кэнжэ жылэмрэ.
Поделиться:
Читать также:
18.02.2025 - 15:00 →
Шэриймрэ Жыласэмрэ я медалхэр
18.02.2025 - 15:00 →
Процент 21-м щIигъукIэ нэхъыбэ
18.02.2025 - 14:00 →
Монголиер къахохьэ
17.02.2025 - 18:56 →
КъБР-м и щIыналъэхэм
17.02.2025 - 17:08 →
КъБР-м и щIыналъэхэм
|