Хабзэхэм хоплъэ

КъБР-м и Парламентым и УнафэщI Егоровэ Татьянэ зи чэзу зэIущIэр иджыблагъэ иригъэкIуэкIащ. Абы щы­тепсэлъыхьащ «КъБР-м къалэухуэ лэжьыгъэр къы­зэ­рыщызэрагъэпэщым теухуауэ» КъБР-м и Законым и 2-нэ, 6-нэ Iыхьэхэм зэхъуэкIыныгъэхэр хэлъхьэным и IуэхукIэ» щIыналъэ законым и проектым.

Республикэм и хабзэубзыху IуэхущIапIэм Ухуэны­гъэмкIэ, псэупIэ-коммунальнэ IэнатIэмрэ гъэсыныпхъэ-энергетикэ IуэхухэмкIэ и комитетым и унафэщI Къумал­ ­Заурбэч жиIащ 2024 гъэм дыгъэгъазэм и 26-м къыдагъэкIа федеральнэ закон №486-ФЗ-мрэ Урысей Федерацэм и Правительствэм и Унафэ №162-мрэ (2012 гъэм мазаем              и 9-м къыдэкIам) къыщыгъэлъэгъуахэм тету «КъБР-м къалэухуэ лэжьыгъэр къызэрыщызэрагъэпэщым теухуауэ» КъБР-м и Законым зэхъуэкIыныгъэхэр зэрыхалъхьэр. Ар хуэгъэзащ унэ зэгуэтхэр, уней псэуалъэхэр, спорт, транспорт IуэхущIапIэхэр зытетыпхъэ мардэхэр КъБР-м и Правительствэм и пщэрылъхэм ящыщу къэгъэлъэгъуэным, нэ­гъуэщIхэми. Ар зи къалэн IэнатIэхэр абы хэплъа нэужь, ­КъБР-м и Парламентым и зэIущIэм законопроектыр къыщыхалъхьэнущ. 
Депутатхэр тепсэлъыхьащ «УФ-м и автомобиль гъуэгу­хэмрэ гъуэгу лэжьыгъэмрэ теухуауэ» Федеральнэ законым и Iыхьэхэр 12-щ 13-нэ зэхъуэкIыныгъэхэр хэлъхьэным и IуэхукIэ» федеральнэ закон №981350-8-мрэ УФ-м и хабзэ щхьэхуэхэмрэ я проектхэм. 
КъищынэмыщIауэ, зэIущIэм щыхэплъащ мэкъумэш, егъэджэныгъэ   IэнатIэхэм, псыкIэ къызэрызэрагъэпэ­щымрэ псы щIэжыпIэхэмрэ, апхуэдэуи Урысейм цIыхухэм я узыншагъэр щыхъумэным, къабзагъэмрэ зэIузэпэщыгъэмрэ ятеухуа федеральнэ законхэм я проектхэм. 
ЗэIущIэм и гугъу щащIащ нэгъуэщI щIыналъэхэм я жэрдэмхэми: бгъэIэпхъуэ мыхъу мылъкур къэралым зэры­щрагъэтх щIыкIэм, «Хьэпшып къыщIэзыгъэкI IуэхущIапIэхэм я кIэрыхубжьэрыхухэм ятеухуауэ», «Дыкъэзыухъуреихь дунейм теухуауэ» федеральнэ законхэм халъхьэ зэ­хъуэкIыныгъэхэм, пхъэхэх лэжьыгъэр зэтес щIыным, мототехникэр (питбайкхэр) къызэрагъэсэбэпыну хуит ­хабзэхэр щIэгъэбыдэным, нэгъуэщIхэми ятеухуауэ.
Социальнэ политикэм, мэкъумэш IэнатIэм хэлъхьэныгъэ хуэзыщI лэжьакIуэ зыбжанэ КъБР-м и Парламентым и ЩIыхь тхылъ иратыну унафэ ящIащ.  

БАГЪЭТЫР  Луизэ.