«ГъащIэм хуэщIа инфраструктурэ» лъэпкъ пэхуэщIэм ипкъ иткIэ, щыIэ мардэм 2026 гъэм кърагъэтIэсэнущ турист ухуэныгъэхэм ухуэзышэ, къэралым и щIыналъэ автомобиль гъуэгухэм хыхьэу щIыпIэ 340-м щIигъу, къитащ КъБР-м и Iуэхухэр зегъэкIуэнымкIэ и центрым (ЦУР).
Абыхэм хохьэ ди щIыпIэ дахэхэм, тхыдэ, архитектурэ мыхьэнэ зиIэ ухуэныгъэхэм, хэхауэ ягъэлъапIэ щIыпIэхэм уахуэзышэ гъуэгухэр.
«Урысейм автомобиль туризмэм зыщиужь зэпытщ, нэхъыбэу ар нэрылъагъу щыхъур накъыгъэм и гуфIэгъуэ, зыгъэпсэхугъуэ махуэхэрщ. Мыхьэнэ иIэщ туристхэм зыщагъэпсэху, я нэгу зыщрагъэужь, зыщаплъыхь щIыпIэхэр шынагъуэншэу щытыным, абыхэм тыншу укIуэфыным. Мис апхуэдэ Iуэхугъуэхэм хуэгъэпсауэ мэлажьэ «ГъащIэм хуэщIа инфраструктурэ» лъэпкъ пэхуэщIэр икIи, абы ипкъ иткIэ, щIыпIэ телъыджэхэм, архитектурэ, тхыдэ мыхьэнэ зиIэ фэеплъхэм ухуэзышэ гъуэгухэмрэ лъагъуэхэмрэ зыхуей хуагъазэ, къагъэщIэрэщIэж.
Апхуэдэ лэжьыгъэ инхэм я фIыгъэкIэ турист лъагъуэхэм я бжыгъэм къахохъуэ, зэман гуэркIэ яIэщIэхуауэ щыта щIыпIэхэр къагъэщIэрэщIэж, щыIэхэри ирагъэфIакIуэ, абыхэм зрагъэужь», - жиIащ УФ-м и Правительствэм и УнафэщIым и къуэдзэ Хуснуллин Марат.
Урысей Федерацэм и Правительствэм туризмэм зегъэужьынымкIэ и комиссэм иджыблагъэ иригъэкIуэкIа зэIущIэм къызэрыщыхагъэщамкIэ, 2026 гъэм и щIышылэм – мазаем къриубыдэу ди къэралым туристхэм я бжыгъэм проценти 2,6-кIэ щыхэхъуащ, нэгъабэ и апхуэдэ пIалъэм щыIа бжыгъэхэм елъытауэ. Абы къегъэлъагъуэ УФ-м и щIыналъэхэм я щIыпIэ дахэхэм щIэупщIэ нэхъыбэ яIэ зэрыхъуар икIи, абы къыхэкIыу, гъуэгу инфраструктурэр егъэфIэкIуэн, абы зегъэужьын зэрыхуейр.
«ГъащIэм хуэщIа инфраструктурэ» лъэпкъ пэхуэщIэм ипкъ иткIэ турист автомобиль гъуэгухэм щрагъэкIуэкI лэжьыгъэхэм лъэныкъуэ куэд къызэщIаубыдэ. Псалъэм къыдэкIуэу, гъуэгухэм асфальтыщIэхэр тралъхьэм и закъуэ мыхъуу, лъэс лъагъуэхэри зыхуей хуагъазэ, зэхыхьэпIэ-зэхэкIыпIэхэр къыщыхагъэщхьэхукI, къэухьхэр, гъуэгу дамыгъэхэр щагъэув, уэздыгъэхэр щыпадзэ, шынагъуэншагъэм хуэгъэпса нэгъуэщI Iуэхугъуэхэри щрагъэкIуэкI.
Гъуэгу IэнатIэм и лэжьакIуэхэм зэрыжаIэмкIэ, иджыпсту лажьэ пэхуэщIэхэм я фIыгъэкIэ, цIыхухэм я шынагъуэншагъэр къызэрызэрагъэпэщым имызакъуэу, хьэрычэт IэнатIэ мыинымрэ курытымрэ я IуэхущIапIэхэми заужь, лэжьыгъэ IэнатIэхэр къызэIуах.
Иджыпсту щыIэ, «ГъащIэм хуэщIа инфраструктурэ» лъэпкъ пэхуэщIэм ипэкIэ илъэсихкIэ лэжьа «ГъуэгуфI шынагъуэншэхэр» проектым и фIыгъэкIэ турист щIыпIэхэм уахуэзышэ автомобиль гъуэгуу псори зэхэту километр мини 9,7-м щIигъу къэралым зэIузэпэщ щащIащ.
ЖыпIэнурамэ, ди республикэм и турист лъагъуэ куэд зыхуей хуагъэзащ, нобэ зэлэжьхэри щыIэщ. Абыхэм ящыщщ псори зэхэту километр 25-рэ зи кIыхьагъ, Шэджэм аузым ухуэзышэ Шэджэм ЕтIуанэ – Булунгу автомобиль гъуэгур. Мыбы зэпещIэ Шэджэм псыкъелъэхэр, «Флай Шэджэм» паркыр, «Шэджэм Ипщэ» комплексыр, Кулиев Къайсын и фэеплъ унэ-музейр, Кум-Тюбе тафэр.
А щIыпIэхэм щрагъэкIуэкI лэжьыгъэхэм щыщу километр 12 зи кIыхьагъ гъуэгур нобэкIэ зэрагъэпэщыжащ, лъэмыжу 14 къагъэщIэрэщIэжащ, километри 10-м хуэдизым уэздыгъэ щыпадзащ. Дызэрыт илъэсым къриубыдэу ахэр и кIэм нагъэсын мурад щыIэщ.
IэщIагъэлIхэм зэрыжаIамкIэ, къэралым и транспорт IэнатIэм и зыужьыныгъэм къыгуэх имыIэу хохьэ турист лъагъуэхэм уахуэзышэ автомобиль гъуэгухэр зыхуей хуэгъэзэныр. Абы къыхэкIыуи, 2026 гъэм лэжьыгъэхэм пащэнущ икIи, щыIэхэр егъэфIэкIуэным къыдэкIуэу, лъагъуэщIэхэри къызэрыхашэнум хущIэкъунущ. А Iуэхугъуэхэр псори хуэунэтIащ къэралым къыщызыкIухь ди туристхэм я бжыгъэм къыхэгъэхъуэным, гъуэгу инфраструктурэм зегъэужьыным, цIыхухэм я шынагъуэншагъэр къызэгъэпэщыным.
